Kàl mìu càl rơbŭt dờng nam lài, ală dơ̆ càl pồt pràn lơh hìu ơm bơh hìu bơnhă mò Nguyễn Thị Dung (ơm tàm tiah Sơn Hà, ƀòn drà dềt Na Dương, kơnhoàl Lộc Bình, càr Lạng Sơn) sơlơ ờ kơnhăp ngan. Mut tàm kàl mrềt, càl mrềt puh mut tàm loh gơ cèng bal dà sơtŭ mrềt mut tàm tơl gah loh tàm hìu dềt dê. Bulah neh lơh ngan lời tềm pềr priă jền uă nam mơya lơh sa kal ke, den bơta kơ̆p kờñ bơh hìu bơnhă mò Dung dê kờñ bè geh dùl nơm ơm ờ geh càl mut, kơnhăp digơlan ờ tŭ lơi geh ngan... Den tàng, sa tềp do geh wă rò nam pa tàm hìu ơm ơnàng rlau 40 thơk vuông geh kơlik kră kơnhăp, rơkàng hìu kơnhăp, lă sơmang kơnhăp lơh mò Dung chờ hờp tus ờ gơtùi bĭc uă mang tơn: “Bơklau añ den gơtìp kòp gơ drồl mhàm dơngoh bơh nam 1991, añ den kòp jê gùt nam sơl, kòn ƀăn añ den gơ bàn kòp gơ drồl mhàm dơngoh neh chơ̆t 2 nam do, gam mìng dồ nă kòn klau rcang phan sa ai jơh 5 nă cau tàm hìu in den rài kis kal kal ke ngan. Bơh tŭ geh broă lơh tơn jơh hìu lơh ing, Đảng, Cíñ phủ, Ƀộ Kwang àng, ală mpồl, gah broă, mpồl cau, cau geh nùs nhơm niam neh sền gròi dong kờl hìu bơnhă lơh geh dùl nơm hìu dờng niam, sàng goh, hìu bơnhă añ ƀrơn brài mờ chờ hờp ngan”.

 Mờ nùs nhơm “ờ gŏ lời dồ nă cau lơi gơtìp lời wơl bơh ngkời” kơnhoàl Lộc Bình, càr Lạng Sơn gam lơh mhar tŭ tơngai lơh 292 nơm hìu kơnhăp ai ală hìu bơnhă rƀah, hìu bơnhă pa lik klàs rƀah, hìu bơnhă geh sră dong kờl Dà lơgar dê. Tơl nơm hìu geh priă tă lơh pơgăp 110 tơlak đong, tàm hơ̆ Ƀộ Kwang àng dong kờl 70 tơlak đong. Ồng Trịnh Tuấn Đông, Củ tịc Anih duh broă Làng bol kơnhoàl Lộc Bình, càr Lạng Sơn pà gĭt, ală tiah tàm kơnhoàl gam tàm toăt pơrlòng mờ tŭ tơngai nàng lơh sir jơnau kờñ geh ai: “Broă lam lơh Ală jơnau neh lơh nền tơn jơh hìu lơh ing, hìu sèt ñhăt dà mìu là gùng dà broă lơh dờng bơh Đảng mờ Dà lơgar mờ geh kwơ màng uă ngan, dong làng bol is ồn là ală hìu bơnhă rƀah, hìu bơnhă pa lik klàs rƀah, hìu bơnhă geh sră dong kờl Dà lơgar geh dờp bơta sền gròi bơh ală kấp dê. Bol he tàm sơm bat tê bal nàng tơn jơh hìu lơh ing, hìu sèt ñhăt dà mìu, cèng tus làng bol in ală hìu ơm tàm tơngai nam pa ram mhŭ ngan. Tàm tŭ lam lơh jat bol añ neh hòi jà tă pơgồp jơh ală rơnàng làng bol tàm ù tiah do dê mờ nùs nhơm cau lơi geh bơta lơi pơgồp bal bơta hơ̆, nàng lơh bè lơi lơh geh 292 nơm hìu dong làng bol in wă rò sa tềp bơhiàn Dà lơgar chờ hờp chờ hờñ mờ ram mhŭ ngan”.

Kờp tus ngai 17/12/2024, Anih duh broă Mặt trận Dà lơgar Việt Nam càr Lạng Sơn neh dờp rlau 77 tơmàn đong, tàm hơ̆ neh tam pà (pà ing) priă ai ală kơnhoàl in lơh hìu pa ai ală hìu bơnhă kal ke in mờ kờp jơh priă tă lơh mờr 51 tơmàn đong. Kờp jơh ală hìu bơnhă geh dong kờl hìu ơm là rlau 2 rơbô 400 hìu bơnhă, tơngai mut lơh lơh geh rlau 80%. Ồng Hồ Tiến Thiệu, Củ tịc Anih duh broă Làng bol càr Lạng Sơn đơs nền, tiah do lơh ngan tơn jơh mờr 2 rơbô 500 hìu lơh ing, hìu sèt ñhăt dà mìu ai ală hìu bơnhă rƀah, hìu bơnhă pa lik klàs rƀah, hìu bơnhă geh màng mờ Dà lơgar geh rài kis kal ke... lài mờ nhai 4/2025:“Bol añ neh tơrgùm uă ngan nàng jơh nùs lơh ngan tơn jơh hìu lơh ing, hìu sèt ñhăt dà mìu tàm nam 2024-2025, neh hòi jà tă pơgồp bal ală priă jền bơh mpồl bơtiàn mờ kờp jơh khà priă pơgăp 160 tơmàn đong. Tŭ do broă lơh gam geh lam lơh jơh nùs ngan, di mờ gùng dà broă lơh, nùs nhơm sồr lơh bơh Thủ tướng dê là lơh geh srơh bal ai jơh gùt mpồl bơtiàn in, nàng tơl nă cau in tàm sơm bat tê bal tă pơgồp dà kơl hề ờ gŏ di là mìng 1 mpồl cau lơi hơ̆, srơh neh geh bơta gơ rề uă dờng, lơh geh bơta pin dờn, bơta brơn brài ai làng bol in. Do là broă lơh geh kwơ niam ngan mpồl bơtiàn in, tơngŏ bơta sền gròi bơh Đảng mờ Dà lơgar dê tus mờ làng bol, is ồn là ală hìu bơnhă kal ke. Ală hìu bơnhă mờ ờ hềt geh hìu ơm dờng niam den tus tơngai sa tềp Ất  Tỵ do rơ̆p geh hìu ơm pa, do là bơta pơndờm pơnđiang mờ là bơta brơn brài dờng ngan gơwèt mờ hìu bơnhă tàm ù tiah do in”.

 Nam pa gam tus, ală hìu ơm “Tam klăc dờng”, geh lơh ờ mìng cèng bơta kwơ niam nùs nhơm dong kờl bal uă ngan, tơngŏ nùs nhơm tàm dong tàm kờl bal bơh mpồl bơtiàn lơm mờ gam là bơta pơndờm pơnđiang, lơh geh tai bơta gơn kơnờm nàng làng bol tàm càr tiah kơh bơnơm tiah nhàr lơgar Lạng Sơn in iang nùs bơtàu tơnguh lơh sa, kơ̆ kơl jăp rài kis, brồ guh lik klàs rƀah.