VOV4.K’ho - Ngai 11 nhai 1 pa do, tàm Hà Nội, Ủy ƀan Zân tộc neh bơyai lơh Pơrjum tơn jơh broă lơh jăt Kơrnoăt sồ 45 bơh Thủ tướng Cíñ phủ bè broă “Ai ờ uă broă lơh sră, ƀăo tus tàm tiah làng bol kòn cau mờ tiah kơh bơnơm, tiah kal ke in” tơngai bơh nam 2019 tus 2021 mờ lơh jăt kơnòl tàm ală nam pơn jăt tai. Tàm pơrjum, ală kwang bàng sồr tơngai tus pal tơnguh tai ală broă yal tơngit di pal mờ broă yal tơngit bè pờ tơlik jơnau đơs, ai tơngu me kỹ thuật nàng làng bol geh git mờ ală tơngu me sồ jơh tàm internet.

Tơnơ̆ mờ 3 nam lơh jăt neh geh mờr 34 tơlăk pang bơh 19 bơta ƀăo mờ sră ƀăo ai ờ sa priă tus tơl xã, ƀòn ai rơlao 424 rơbô nă cau là làng bol kòn cau mờ làng bol kis tàm tiah kơh bơnơm, tiah ngài in bơh 54 càr tàm gùt lơgar.

                                              Anih pơrjum pơrjum tơlik tàm internet

Ală sră, ƀăo pơgồp bal tàm broă lam sồr gùng dà broă lơh adăt boh lam bơh Đảng mờ Dà lơgar đơs bal mờ broă kòn cau, broă dong kờl kòn cau đơs is pơgồp bal tàm broă lơh jăt broă lơh jăt jơnau kờñ dà lơgar tơnguh bơtàu lơh sa mpồl bơtiàn tiah làng bol kòn cau, tiah kơh bơnơm tơngai bơh nam 2021 tus 2030; bơtơl rài kis chài rơgơi, nùs nhơm ai làng bol kòn cau in, tơnguh uă jơnau git wă drơng broă lơh sa, rài kis làng bol in; mờ ai geh uă, lơh gơguh bal uă bơta niam chài rơgơi bơh làng bol ală kòn cau dê.

Tàm pơrjum, ală kwang bàng tus Pơrjum kung đơs niam ală cồng nha lơh jăt Kơrnoăt sồ 45 bơh Thủ tướng Cíñ phủ tơngai bơh nam 2019 tus 2021 ai tiah làng bol kòn cau mờ tiah kơh bơnơm in. Ala măt Ƀan Zân tộc ală càr kung dan geh uă broă lơh nàng lơh jăt kơnòl niam rơlao tàm tơngai bơh nam 2022 tus 2025 bè tơnguh tai ală broă lơh yal tơngit di pal mờ jơnau tơngit bè pờ tơlik jơnau đơs, ai tơngu me kỹ thuật nàng làng bol in git ală tơngu me sồ jơh tàm internet. Ồng Lê Ngọc Vinh, Kwang atbồ Ƀan Zân tộc càr Dăk Lăk đơs: “Bơcri priă nàng lơh, blơi phan ndrờm bal ală anih pờ tơlik jơnau đơs, sơnđio rùp tàm xã. Do là gah yal tơngit kuơ màng, mùl màl mờ geh cồng nha ngan tàm broă lam sồr gùng dà broă lơh bơh Đảng, adăt boh lam bơh Dà lơgar dê, jơnau tơngit cíñ trị mờ yal jơnau git wă tàm rài kis mờng chài broă lơh sa, prăp gàr mờ tơnguh bơta niam chài rơgơi kòn cau”.

                Ƀộ trưởng Củ ñiệm Ủy ƀan Zân tộc ồng Hầu A Lềnh geh jơnau đơng lam tàm pơrjum

Ală kuang bàng kung ai geh uă broă lơh nàng lơh jăt kơnòl niam rơlao tàm tơngai bơh nam 2022 tus 2025 bè: tơnguh uă gơnoar bơh Ƀan Zân tộc ală tiah; tam gơl broă ai jơnau tơngit (tơnguh tai broă lơh ƀăo rùp, lơh jăt sồ jơh tơngu me tàm ală internet, bơcri priă ndrờm bal tàm broă lơh pờ tơlik jơnau đơs, ai phan lơh broă ntrờn ngăc ngar...); lam sồr làng bol geh bơta mờng sền ƀăo; di tŭ lơh niam wơl mờ pờ ơnàng cau geh dờp broă lơh do; tơnguh uă ngan bơta niam, tơnguh tai tơngu me, gah jơnau cih bè: hơ mblàng adăt boh lam, bơta niam chài rơgơi; crơng gơs gah pờ tơlik nàng pơgồp bal, tam pà bal, tam gơl bal jơnau tơngit...

Đơs pơn dŭt pơrjum, Ƀộ trưởng Củ ñiệm Ủy ƀan Zân tộc ồng Hầu A Lềnh đơs tờm: Gùng dà ai ờ uă ƀăo, sră ƀăo ờ sa priă tàm tiah làng bol kòn cau mờ tiah kơh bơnơm là gùng dà, broă lơh di pal ngan bơh Đảng mờ Dà lơgar dê. Tàm tơngai tus geh pơn jăt tai ai ală ƀăo, sră ƀăo mờ ală pang sră ndai tus tàm tiah làng bol kòn cau mờ tiah kơh bơnơm in. Tài ală bơta yal tơngit do ờ mìng dong kờl tơnguh jơnau git wă, tam gơl broă lơh, bơhiàn lơh sa mờ gam là gah yal tơngit mùl màl nàng lơh tơngu me tờm tàm broă lơh niam wơl, bơtơl, tam gơl gơs broă lơh tus mờ làng bol kòn cau. Ƀộ trưởng ồng Hầu A Lềnh đơs loh: “Bơh 3 nam lơh jăt mờ lơh ngan bơh he dê tơngai 5 nam bơh tŭ do tus nam 2025, neh geh gùng dà, he neh tơn jơh ing, sền wơl bloh, tus do geh gùng dà nàng lơh jăt bloh, broă là he lơh bè lơi gơdê. Nàng lơh bè lơi jơh ală anih lơh broă sră ƀăo, ală anih lơh broă pơlam bơh ală ƀộ, gah lơh broă dà lơgar tus bal pơlam ai ală ƀộ gah lơh broă dà lơgar pơgồp bal mờ Ủy ƀan Zân tộc lơh jăt niam rơlao”.

Nàng ală jơnau tơngit, gùng dà, broă lơh... geh tơlik niam rơlao tus mờ làng bol kòn cau mờ tiah kơh bơnơm, jăt Củ ñiệm Ủy ƀan Zân tộc ồng Hầu A Lềnh đơs, pal tơnguh uă bơta niam, tam gơl broă lơh, tơngu me bơh ală pang sră ƀăo jăt gùng dà di pal, di pal mờ mùl màl broă kờñ jơnau tơngit bơh làng bol ală kòn cau dê.

Tàm broă tơnguh bơtàu bal, dờng ơnàng bơh ală bơta sră ƀăo tàm uă bơta, ƀăo cih gam là bơta pràn gơwèt mờ tiah làng bol kòn cau, den tàng, pal tơnguh bơta pràn bơh ƀăo cih tàm broă lam sồr tus mờ làng bol. Bơdìh hơ̆ tai, Củ ñiệm Ủy ƀan Zân tộc kung dan ală ƀộ, gah lơh broă dà lơgar, ală càr, ƀòn dờng gơrềng bal pal tus pơgồp bal pràn rơlao nàng lơh di pal mờ gùng dà, broă lơh, pơgồp bal tàm broă tơnguh uă rơlao tai cồng nha lơh jăt Kơrnoăt sồ 45 bơh Thủ tướng Cíñ phủ ngai 09 nhai 1 nam 2019 dê.

Cau mblàng Ndong Brawl