VOV4.K’ho- Mờ cau lơh broă sa rƀah, broă tus bal tàm khà priă càn nàng bơcri lơh sa ờ di là bơta ƀuơn dùl ết lơi ờ, tài bơh khi ờ geh phan bơna kuơ màng, geh tŭ hìu đam, suơn chi kung gam ờ geh hềt sră pơ àr dờp gơnoar ngui ù sơl den ai phan lơi nàng càn priă tàm pơgơl mờ phan bơna? Ală nam do, Ngân hàng Chính sách xã hội neh gơ gơs là cau dong kờl, ai tơl bơta ai uă ngan hìu bơnhă in geh càn priă ờ tàm pơgơl mờ phan bơna, bơcri priă bơtàu tơnguh lơh sa, hời rơ hời tơn jơh jơgloh tơrmù rƀah.

Ồng Trần Đình Ý lam bol añ lòt còp suơn plai táo tàm hìu jàl bơh he dê. Ồng Ý lời nggùl suơn ơnàng 8 rơbô thơk vuông nàng lơh hìu jàl tam plai táo. Táo geh tam tàm hìu jàl ờ gơtìp tu cuh aniai, den ờ gŏ ngui sơnơm sền gàr phan tam ờ. Bơta do lơh cồng nha tơnhào suơn tờm plai táo dê gơguh uă, mờ tăc plai táo kung ƀuơn ngan sơl. Ồng Ý pà gĭt, kàl tơnhào nam lài kờp bal tơl tờm táo geh 100 kĭ plai, cau kă bro mut blơi tàm suơn tơn mờ giă tăc bơh 20 tus 25 rơbô đong dùl kĭ. Ờ kờp ală priă bơcri, tơl tờm táo ồng dê lơh geh priă cồng 1 tơlak đong. Geh kơnờm mờ suơn plai táo do là kơnờm khà priă càn bơh Ngân hàng Chính sách xã hội kơnhoàl Buôn Đôn dê. Bal mờ tờm táo, ồng Ý gam geh priă nàng tam plai bung kơltau tơlir, kơphê, tiêu tai sơl, priă lơh geh mờr 100 tơlak đong pah nam, den neh lik klàs bơh sră cih mat hìu bơnhă rƀah. Ồng Ý neh lơh hìu dờng kơ̆ kơljap, kung neh blơi măy tính ai kòn ùr in pa mut bơsram ơdŭ 6, nàng bơsram tơn tàm internet. Ồng Ý đơs: Bulah ờ hềt pas sơm, mơya rài kis geh bè ngai do là bơta mờ ồng ờ hềt tŭ lơh kơlôi tus tŭ mut ơm kis mờ lơh broă tàm thôn Ea Mthar 3, xã Ea Nuôl, kơnhoàl Buôn Đôn do dê.

Geh càn mờ khà priă bơh Ngân hàng Chính sách xã hội dê den kung bơh khà priă càn hơ̆ mờ añ neh bơcri lơh ală hìu gŭ, hìu jàl do nàng tam suơn plai táo. Tus tŭ do den sền gŏ cồng nha gơ dê cèng wơl uă ngan. Mìng tàm pơgap 1 nam añ neh gơtùi tơm priă càn bơh Ngân hàng Chính sách xã hội dê mờ khà priă càn bơh sơnrờp. Añ tam neh geh 4 nam bloh, kờp ngan là tơl tờm plai táo añ lơh geh 1 tơlak đong pah nam.

Gĭt nđờ rơbô hìu bơnhă làng bol jơi bơtiàn kòn cau geh càn priă bơtàu tơnguh lơh sa

Ồng Đào Danh Canh, cau atbồ Mpồl càn priă thôn M’Thar 3, xã Ea Nuôl pà gĭt, mpồl càn priă bơh ồng dê geh 40 nă cau. Khi là ală hìu bơnhă rƀah, hìu bơnhă gơlơh bè rƀah ờ geh phan bơna nàng càn priă tam pơ gơl mờ phan bơna mờ ală Ngân hàng ndai nàng càn priă bơcri lơh sa. Ală nam do, kơnờm khà priă càn bơh Ngân hàng Chính sách mờ ală hìu bơnhă do geh tơl ală bơta hời rơ hời tơn jơh jơgloh tơrmù rƀah. Tàm 40 nă cau mpồl càn priă, tŭ do neh geh 4 hìu bơnhă neh lik klàs rƀah, khi neh tơm jơh priă càn.

Làng bol geh dờp priă càn rê nàng bơcri tàm broă tam kơphê mờ tiêu, ròng kơnrồ mờ be neh geh cồng nha ngan. Làng bol neh lik klàs rƀah, bàr pe hìu bơnhă neh tơm jơh priă tờm ai Ngân hàng chính sách in.

Bi H’Ly Kbua, ơm tàm ƀòn Ko Edung A, nam do 31 sơnam. Bau neh mờr 10 nam do mơya tài bơh ờ tơl ù lơh sa den rài kis bơh ùr bơklau bi dê kal ke ngan tàm hìu bơnhă rƀah ờ geh phan kuơ lơi. Pơgap mờ do 5 nam, geh càn 30 tơlak đong bơh Ngân hàng chính sách xã hội dê, bi H’ Ly neh blơi sơltìl kơphê rê tam mờ blơi 2 nơm kơnrồ me. Tŭ do, bulah kung gam sơl tàm hìu bơnhă rƀah, mơya pơndrờm mờ lài do den rài kis hìu bơnhă bi dê ờ gam bơta siơ̆u siar bè lài do tai.

Tŭ do, hìu bơnhă añ geh 8 nơm kơnrồ, añ neh tăc 3 nơm bloh, kung geh 23 tơlak đong mờ tŭ do kung gam 5 nơm tai sơl. Añ ưn ngài Đảng, dà lơgar ai tơl bơta mờ dong kờl añ geh càn priă nàng bơtàu tơnguh lơh sa mờ geh rài kis niam rlau tai.

Uă hìu bơnhă lik klàs rƀah kơnờm ngui priă càn nàng ròng phan mờ tam phan

Mò H’ Nhát Buôn giá, cau atbồ mpồl càn priă bơh ƀòn Ko Edung A, pà gĭt: mpồl mò dê geh 70 nă cau. Jơh ală cau tàm mpồl ndrờm ngui khà priă càn di mờ jơnau kờñ là blơi phơng sih sơng ka sền gàr phan tam, blơi kơnrồ me nàng ròng. Ờ hềt geh cau lơi lơyài tàm broă tơm priă cồng pah nhai bơh ngân hàng dê.

Tŭ do, làng bol ơm tàm mpồl bơh añ dê geh càn priă Ngân hàng chính sách xã hội, dà lơgar neh ai tơl bơta mờ ai priă càn ai làng bol in blơi kơnrồ, blơi sur, tam kơphê. Tơl hìu bơnhă tàm do ròng ết ngan rlau jơh bơh 3 tus 4 nơm kơnrồ, khi lơh ngan ròng mờ càn tai priă bơh Ngân hàng chính sách dà lơgar dê nàng bơtàu tơnguh lơh sa. Kơ̆p kơnờm tàm tơngai tus, dà lơgar geh ai tơl bơta mờ ai priă càn uă rlau tai nàng làng bol in geh priă lơh sa, hời rơ hời tơn jơh jơgloh, tơr mù rƀah.

Ồng Võ Khắc Huy, Kuang atbồ Ngân hàng Chính sách xã hội kơnhoàl Buôn Đôn dê pà gĭt: Tŭ do, geh 9 rơbô 480 hìu bơnhă, tàm hơ̆ geh 4 rơbô 900 hìu bơnhă làng bol jơi bơtiàn kòn cau, geh càn priă ờ tam pơgơl mờ phan bơna mờ khà priă 342 tơmàn đong. Jơh ală hìu bơnhă càn priă ndrờm ngui khà priă di mờ jơnau kờñ, lơh jat niam cồng nha tơn jơh jơgloh tơrmù rƀah, den khà dồs ờ niam, dồs jŏ tơngai ir mìng geh 236 tơlak đong, lơh geh khà 0,6 %.  Jơh ală cau do lơyài tơm dồs, dồs ờ niam ndrờm bơh broă ờ jai tơm là tài bơh trồ tiah lơh aniai mờ kòp jê lơm.

Ngân hàng geh uă broă lơh nàng tơrmù ƀà bơta kal ke ai năc càn priă in mờ broă lơh tơn jŏ tơngai tơm dồs, ai càn priă mìng tơm priă cồng ờ duh plai tơm priă tờm tŭ tus tơngai tơm dồs... Dilah bè hìu bơnhă ờ jai tơm dồs den bol añ gơtùi lời wơl dồs ai khi in jat jơnau sồr bơh Dà lơgar dê. Bơdìh hơ̆ kung dan mờ Ngân hàng kấp hơđang là tơnguh tai priă càn tài bơh bơta kal ke bè do den làng bol kờñ ngan geh khà priă càn do.

Jat VOV Tây Nguyên- Cau mblàng K’Hạnh