VOV4.K’ho- Tơnơ̆ 9 ngai lơh broă sùm, jal mhar, pơrjum dơ̆ dùl, Quốc hội khóa XV neh lơh gơs jơh broă lơh ai tơlik mờ lơh geh cồng nha niam bơnĕ. Đơs tơn jơh pơrjum,Chủ tịch Quốc hội ồng Vuơng Đình Huệ hòi jà làng bol, cau ling, cau tĕ khà gùt lơgar, ală mpồl lơh sa kă bro, mpồl bal, mpồl cau, làng bol he tàm lơgar ndai tơnguh bơhìan tam klac, lơh jat nền nòn ală gùng dà, broă lơh bơh Đảng, adat boh lam bơh dà lơgar dê, tơrgùm ală bơta pràn nàng sền gròi gơtùi kòp Covid-19, sền gàr màng kis, pràn kơldang să jan, ờdo ờdă làng bol dê in.  

Pơrjum dơ̆ dùl, Quốc hội khóa XV là pơrjum kuơmàng, geh lơh tàm tŭ tơngai kòp Covid-19 gơlik geh kal ke, bơ tờp uă tàm ƀòn dờng Hồ Chí Minh, ờ uă càr tiah đah jum dà lơgar mờ pơhìn bơ tờp tus uă tiah. Ală anih lơh broă geh gơnoar, mpồl lam lài mờ jơh gùt mpồl chính trị gam pal lơh ngan tơrgùm lam lơh ală broă lơh jơh nùs rơcang sơndră kòp nàng sền gàr niam ngan rlau jơh pràn kơldang să jan, màng kis, rài kis bơh làng bol dê in. Tềng đap bơta hơ̆, Quốc hội neh ring bal uă mờ jơnau lơh nền tơrmù tŭ tơngai bơyai lơh pơrjum 8 ngai pơndrờm mờ kờp dŭ lài, mờkung tam gơl broă lơh, cribơyai mờ bơ tơl tàm Nghị quyết bal bơh pơrjum dê ală broă lơh jal mhar, rơcang sơndră kòp Covid-19. Bơta do ai gŏ, Quốc hội neh lơh jat jơnau sồr ngan ngồn, lơh broă ngac ngar, di tŭ tài jơnau kờñ lài ngan mờ kuơmàng ngan rlau jơh là sền gròi mờ sền gàr pràn kơldang să jan làng bol dê: “Git wă uă tềng đap ală kal ke, bơta lòng dờng ngan tài bơh kòp Covid-19, Quốc hội, ală kuang bàng Quốc hội neh tơnguh uă ngan rlau jơh nùs nhơm geh kơ nòl mờ kơp kờñ tă pơgồp, ngui uă ngan rlau jơh tŭ tơngai, lơh broă mờ bơdìh tŭ jơ pơrjum ngan ngồn mờ lơh broă tai tàm ală ngai rlô, tam gơl pa, bơceh pa, tă pơgồp uă jơnau đơs jơh nùs, ală jơnau đơs niam ngan dipal nàng Quốc hội sền sơ wì, ring bal mờ bơta ring bal uă, ai tơlik 29 Nghị quyết. Ờ mìng di tŭ bơsong ală broă jal mhar tềng đap mat, mờ gam lơh nền ală broă kuơmàng cèng bơta jŏ jòng, jŏ tơngai, pơgồp bơnah lơh gơs dùl dơ̆ pơrjum geh cồng nha tàm uă gah, geh làng bol mờ cau tĕ khà cih dờp, ring bal, đơs niam”.

Dơ̆ tơn jơh pơrjum dơ̆ dùl, Quốc hội khóa XV

Tàm pơrjum dơ̆ dùl tơngai lơh broă pa do, Quốc hội neh lơh gơs kơ nòl broă kuơmàng là sền sơ wì, lơh nền rơndap tap sèng mpồl lơh broă mờ pồ, ring bal tơn pồ kuang bàng dờng màng bơh Mpồl kuang bàng duh broă dà lơgar dê, gàr tơl khà, ală bơta pal geh, di broă rơndap lơh, sră nggal jat jơnau sồr bơh Đảng mờ jơnau cih bơh adat boh lam dê. Mờ bơta ring bal kung bè pin dờn uă, Quốc hội neh pồ Chủ tịch lơgar, Chủ tịch Quốc hội, Thủ tướng Chính phủ mờ ală gơnoar broă đơng lam bồ ndai. Bal mờ hơ̆, Quốc hội neh sền sơ wì, lơh nền ală broă rơndap lơh tơngai 5 nam, bơh nam 2021 tus nam 2025: Broă rơndap lơh bơtàu tơnguh lơh sa- mpồl bơtìan; Broă rơndap lơh priă jền dà lơgar, càn, tơm dồs dà lơgar; Broă rơndap lơh bơcri priă dà lơgar di mơ tơngai. Mờ kung sền sơ wì, lơh nền gùng dà bơcri priă Broă lơh jơnau kờñ dà lơgar bơt bơtàu ƀòn lơgar pa mờ Broă lơh jơnau kờñ dà lơgar tơrmù rƀah kơ̆ kơljap tơngai bơh nam 2021 tus nam 2025.

Broă sền sơ wì, lơh nền jơh ală broă rơndap lơh, broă lơh di mơ tơngai 5 nam tàm dơ̆ pơrjum sơn rờp bơh tơngai lơh broă dê là bơta lơh ngan dờng ngan bơh Quốc hội, Chính phủ, ală anih lơh broă geh gơ rềng dê; geh gơtha kuơmàng ngan gơ wèt tus mờ bơta bơtàu tơnguh bơh dà lơgar dê, lơh gơlik bơta niam nàng Chính phủ, ală anih lơh broă, ală gah broă lơh, ală kấp, ală tiah mhar rơcang lài lam lơh jat ală Nghị quyết bơh Quốc hội dê kung bè Nghị quyết pơrjum dờng dơ̆ 13 bơh Đảng dê. Cribơyai, sền sơ wì cồng nha lam lơh broă rơndap lơh bơtàu tơnguh lơh sa- mpồl bơtìan, kes priă dà lơgar 6 nhai bồ nam mờ ală broă lơh 6 nhai lồi nam 2021, Quốc hội jờng rơ broă lơh ngan bơh Chính phủ dê tàm broă đơng lam, pơlam lơh jat jơnau kờñ dơ̆ lĕ bal ờ mìng rơcang sơndră kòp Covid-19 mờ gam bơtàu tơnguh lơh sa, gàr khà gơguh lơh sa, sền gròi rài kis, sền gàr pràn kơldang să jan làng bol.

Chủ tịch Quốc hội  ồng Vuơng Đình Huệ đơs tơn jơh pơrjum

Quốc hội sồr tơ nơ̆ pơrjum, Chính phủ, Thủ tướng Chính phủ, ală anih lơh broă tàm mpồl duh broă dà lơgar pơn jat tai tam gơl pa, tơnguh bơta niam, cồng nha lơh broă, tơnguh broă tam pà kấp, tam pà gơnoar di pal, gơ jat bal mờ sơlơ gròi sền, sền sơ wì, pơgồp bal mờ kơ nòl mblàng lơh loh bơh Mpồl cau, cau dùl nă să dê, ngan là cau atbồ. Chủ tịch Quốc hội ồng Vuơng Đình Huệ sồr, ală anih lơh broă bơh Quốc hội dê, Mpồl kuang bàng Quốc hội mờ ală kuang bàng Quốc hội pơn jat tai tam gơl pràn kơldang, tơnguh bơta niam, cồng nha lơh broă, sơlơ tơnguh broă gròi sền broă lơh jat ală Nghị quyết bơh pơrjum dê: “Sồr ală kuang bàng Quốc hội jal mhar yal mờ cau tĕ khà gùt lơgar in bè cồng nha bơh dơ̆ pơrjum dê, sùm gàr bơta gơ rềng kơ̆ kơljap mờ cau tĕ khà. Quốc hội hòi jà làng bol, cau ling, cau tĕ khà gùt lơgar, ală pồl lơh sa kă bro, làng bol he tàm lơgar ndai tơnguh uă bơhìan tam klac, tàm kờñ gơboh, dong kờl bal kòn bơnus, dong kờl bal mờ gơp, lòt bal, pin dờn, kờñ, lơh jat nền nòn ală gùng dà, broă lơh bơh Đảng, adat boh lam bơh dà lơgar dê, tơrgùm tŭ tơngai, bơta pràn mờ dà kơl hề nàng sền gròi gơtùi kòp Covid-19, sền gàr màng kis, pràn kơldang să jan, ờdo ờdă làng bol dê in”.

Cồng nha bơh pơrjum dơ̆ dùl, Quốc hội khóa XV dê là bơta sơn đờm niam bơnĕ ai tơngai lơh broă pa in. Bơh kơ nòl broă geh jàu jat jơnau cih bơh sơnua boh lam mờ adat boh lam dê, git loh ală kơ nòl broă tờm, ală jơnau ai tơlik lài gùng dà kuơmàng tàm jơnau đơs tơn jơh pơrjum bơh Tổng Bí thư ồng Nguyễn Phú Trọng dê, lơh gơs niam broă lam lơh jat Nghị quyết pơrjum dờng Đảng gùt lơgar dơ̆ 13, mờ nùs nhơm sùm tam gơl pa, lơh lơh sir is, tơnguh bơhìan pơn iờ să 75 nam, tềng đap bơta đơng lam bồ bơh Đảng, bơta pin dờn mờ ring bal bơh làng bol, cau tĕ khà gùt lơgar, làng bol he tàm lơgar ndai mờ gơp bơyô dunia dê, Quốc hội khóa XV geh lơh gơs niam kơ nòl broă geh Đảng mờ làng bol jàu.

Cau mblàng K’Duẩn