VOV4.K’ho– Bơh lồi nhai 4 tus tŭ do, càr Dăk Lăk neh dờp rlau 137 rbô nă cau rê bơh ală càr, ƀòn dờng tiah đah jum dà lơgar. Bal mờ ală broă lơh sền gàr rài kis tềng đap mat, càr gam ngui bơnah priă càn chính sách, ai lài cau lơh broă pa rê wơl tàm càr in càn nàng bơtàu tơnguh lơh sa, gàr kơ̆ kơljap rài kis tàm ƀòn tờm. Do là kung ală broă lơh dong kờl jơh nùs, di tŭ dong làng bol sơrlèt gan kal ke bơh kòp dờng dê.

Tề 3 nơm kơnrồ nàng ê tàm ƀlàng nhơt thôn 6, xã Cư Kty, kơnhoàl Krông Bông, ồng Tăng Ngọc Thịnh pà git, khà kơnrồ do pa blơi pơgap mờ do rlau 1 nhai bơh bơnah pruă càn ngân hàng chính sách xã hội dê. Bồ nam lài, ùr bơklau ồng mut tàm càr Bình Dương lơh broă khat gơboh nàng geh tai priă jền. Mơya kòp Covid-19 bơtờp ua, broă lơh ờ kơ̆ kơljap den tàng nhai 6 pa do, ùr bơklau ồng pal rê wơl hờ ƀòn tờm nàng kis. Ờ geh ù tiah, ờ geh priă bơcri lơh sa, ồng geh mpồl tềm pềr mờ ai càn priă tàm thôn pơlam lơh sră mờ geh leng 50 tơlak đong bơh Ngân hàng chính sách xã hội mờ tơngai càn 10 nam, priă cồng 7,92% tàm dùl nam mờ ờ duh pal geh bơna nàng lơh sră càn priă.

Ồng Tăng Ngọc Thịnh ngui priă càn nàng blơi kơnrồ

Ồng Tăng Ngọc Thịnh pà git: “Kòp kal ke ir ờ gơtùi lơh broă tai hơ̆ sồng rê wơl ƀòn tờm den geh broă lơh dong kờl bơh đah chính sách dê ai càn 50 tơlak đong nàng blơi 2, 3 nơm kơnrồ ròng. Añ gŏ broă lơh do niam ngan, dong ală cau kal ke bè añ.”

Tàm 2 nhai do, neh geh rlau 20 hìu bơnhă làng bol tàm kơnhoàl Krông Bông geh cau rê wơl bơh ală càr tiah đah jum dà lơgar geh càn priă dong kờl priă cồng mờ kờp jơh priă ai càn rlau 1 tơmàn đong. Do là dùl tàm ală kơnhoàl sơn rờp tàm càr Dăk Lăk lam lơh bơnah ai càn dong kờl cau lơh broă rê wơl bơh ală càr.

Ồng Nguyễn Tử Ân, Kuang atbồ Ngân hàng Chính sách xã hội càr Dăk Lăk pà git, Ngân hàng neh rơcang lài pơgồp bal mờ gơnoar atbồ kấp hơ đơm kòp sền, git jơnau kờñ mờ dong làng bol càn priă nàng bơtàu tơnguh lơh sa, gàr kơ̆ kơljap rài kis tàm ƀòn tờm. Ngân hàng neh dan dà lơgar bơtơl tai 19 tơmàn đong lời ai ală hìu bơnhă geh cau bơh ală càr, ƀòn dờng rê wol in càn.

Ala mat Ngân hàng chính sách xã hội lòt sền broă ngui priă càn bơh làng bol dê

Bal mờ hơ̆, gơ wèt mờ ală hìu bơnhă geh rài kis kal ke, dilah neh càn priă den Ngân hàng geh tơn ruc tơngai tơm dồs halà ai càn bơ tơl nàng làng bol in geh priă bơcri lơh sa: “Khi pal geh rơndap broă ngan ngồn rê lơh sa tàm ƀòn lơgar, kuơmàng khi pal tus bal tàm ală mpồl tềm pềr, càn priă gam geh tàm ală tiah. Tàm ală mpồl do den khi geh pơlam bơta chài ngui priă càn, bơta chài lơh sa, kă bro tàm bơta geh ngan tàm ƀòn lơgar mờ tơnơ̆ tơngai jŏ jòng ờ ơm tàm ƀòn lơgar mờ đơs bal là ală hìu bơnhă do pal ngui priă càn gơ dờp mờ tŭ tơngai pa nàng gàr niam cèng wơl cồng nha.”

 Cau mblàng K’Duẩn