VOV4.K’ho- Ủy ban Nhân dân càr Dăk Lăk pa ai lơh jăt Chỉ thị bal mờ 9 mpồl kơnòl broă tờm lơh jăt tàm nam bơsram 2021- 2022. Jăt mờ hơ̆, bal mờ broă rơcăng lài rơndăp lơh mờ lam lơh jăt broă rơndăp lơh nam bơsram 2021- 2022 ngac ngar, dipal mờ bơta kòp Covid-19 gơbàn tàm tiah he dê, ală hìu bơsram pal kờp sền koh tơrmù mờ tềm pềr uă ngan rlau jơh ală priă tă nàng gàr bè ờs, ờ gŏ di tơnguh priă tă bơsram pơndrờm mờ nam bơsram 2020- 2021; geh broă lơh dong kờl, ờ sa, tơrmù mờ tơn jŏ tơngai tơm priă tă bơsram, dong kờl di tŭ sră giăo khoa gơwèt mờ ală kơnòm bơsram geh rài kis kal ke; ngan là ờ gŏ di lời gơlik geh jơnau sơmờm tă priă bồ nam bơsram.

Kuang đơng lam bồ Sở Giáo dục mờ Đào tạo càr Dăk Lăk pơndờm pơnđiang kơnòm bơsram mờ cau pơgru

Gơwèt mờ ală tiah kal ke, tiah kơh bơnơm ờ geh tơl bơta bơto bơsram tơn tàm internet, hìu bơsram rơcăng lài pơgồp bal mờ mè bèp kơnòm bơsram dê bơyai lơh ai kơnòm bơsram in bơsram bơh ală broă lơh ngac ngar nàng lơh sir broă rơndăp lơh nam bơsram, sền gàr cồng nha bơto bơtê; ờ gŏ di bơyai lơh bơto bơsram pờ tơn tàm internet gơwèt mờ bơto bơtê mầm non; tơrgùm pơgồp bal, bơto pơlam, dong kờl mè bèp kơnòm bơsram ròng gàr, sền gàr, bơto bơtê kơnòm dềt tàm hìu jăt ală gah dipal.

Cau mblàng Lơ Mu K’Yến