VOV4.K’ho– Tàm ală ngai pa do, càr Dak Lak bơyai lơh tìp mat cau tĕ khà mờ ală cau tơlik mat tĕ khà kuang bàng Hội đồng Nhân dân càr khóa 10, tơngai lơh broă bơh nam 2021 tus nsm 2026 tàm ală mpồl tĕ khà tàm càr.

Tàm ală anih tìp mat, tơnơ̆ tŭ iat jơnau yal bè cau tơlik mat tĕ khà mờ jơnau kờp dŭ broă lam lơh bơh tơl nă cau tơlik mat tĕ khà dê tŭ geh pồ lơh kuang bàng Hội đồng Nhân dân càr khóa 10, tơngai lơh broă bơh nam 2021 tus nam 2026, ală cau tĕ khà neh geh jơnau đơs đơs bơta kơp kờñ he dê tus mờ ală cau tơlik mat tĕ khà, song dơpă cribơyai, làng bol lơh tờm ală broă kơh bal 2 gah sền gròi.

Tàm jơnau kờp dŭ broă lam lơh, ală cau tơlik mat tĕ khà neh jat tàm gah broă lơh tŭ do nàng yal ală broă lơh, gùng dà lơh broă tŭ geh pồ lơh kuang bàng Hội đồng Nhân dân càr, nàng kờñ pơgồp bơnah bơtàu tơnguh lơh sa- mpồl bơtiàn, tơnguh kơnòl broă lùp sền, sền sơwì mờ sền gròi bơh Hội đồng Nhân dân dê, sền gàr gơnoar kuơ dipal bơh làng bol dê.

Tàm ală dơ̆ tìp mat, jat cau tĕ khà đơs, ală tơngume lơh broă bơh cau tơlik mat tĕ khà dê cèng bơta tơrgùm bal mờ ai tơnggŏ gơnoar broă bơh cau ala mat gơnoar kuơ bơh làng bol dê. Bulah bè hơ̆, 2,3 tơngume lơh broă kung gam ờ hềt loh làng, ờ hềt geh tơngume tờm, ờ hềt gơtùi yal ală broă lơh ngan ngồn wèt tus tàm broă bơsong ală bơta gam ờ hềt niam gam gơlik geh tàm 2, 3 gah broă lơh.

Cau tĕ khà jòi git bè jơnau tơnggit cau tơlik mat tĕ khà dê

Cau tĕ khà Nguyễn Quyền ơm tàm sơnah ƀòn Tân Thành, ƀòn dờng Buôn Ma Thuột geh jơnau đơs: “Ală broă lam lơh bơh ală cau tơlik mat tĕ khà dê lơh bè lơi pal cèng bơta ngan ngồn, đơs pal gơ jat bal mờ lơh. Ai tŭ do mờ broă rơndap lơh đơs uă mơya lam lơh ngan ngồn ờ hềt wil tơl, ờ hềt jat bơta kơp kờñ bol hi dê. Den tàng bol hi sền gŏ là, do là tŭ niam làng bol lơh tờm nàng đah làng bol mờ ală cau ala mat làng bol in gơtùi đơs mờ gơp ală broă lơi mờ he pal lơh nàng bơt bơtàu dà lơgar gơnoar adat boh lam ngai sơlơ pràn kơldang, kơ̆ kơljap, den hơ̆ là bơta kơp kờñ bơh tơl nă cau tĕ khà dê”.

Cau tĕ khà kung song dơpă lùp ală cau tơlik mat tĕ khà bè 2, 3 tơngume gơ rềng tus gah broă lơh mờ he gam drơng lơh, ngan là tàm ală gah bè phan bơna gùng lòt, ală broă lơh drơng rài kis làng bol; ală rơndap broă geh lam lơh, bơcri priă mờ lơh gơs mơya ờ gơtùi tơnguh cồng nha, ờ cèng wơl bơta kuơ làng bol in. Cau tĕ khà sồr ală cau tơlik mat tĕ khà dilah geh pồ tàm tơngai lơh broă tus pal iat jơnau đơs bơh làng bol dê, ngan là tàm ală dơ̆ tìp mat cau tĕ khà mờ lam lơh ngan ngồn mờ broă lơh ờ di mìng hơ pơrgon mờ jơnau đơs lơm ờ.

Bơh cribơyai, ală cau tơlik mat tĕ khà đơs nền geh sùm rềp mềr, iat jơnau đơs bơh cau tĕ khà dê nàng đơng lam bơsong tơn halà đơs mờ anih lơh broă geh gơnoar bơsong ală bơta kơp kờñ dipal bơh làng bol dê; lơh niam kơnòl broă bơh cau ala mat làng bol pồ dê. Ală jơnau đơs bơh cau tĕ khà dê geh là tơngume kuơmàng nàng cau tơlik mat tĕ khà pơn jat tai lơh sir broă lam lơh he dê tàm jơh gùt tơngai tĕ khà kung bè tơnơ̆ tŭ gơ gơs là kuang bàng Hội đồng Nhân dân càr khóa tus.

Dơ̆ tìp mat cau tĕ khà tàm sơnah ƀòn Tân Thành, ƀòn dờng Buôn Ma Thuột

Mò Vi Thị Kiều Chi, gơ wèt mpồl tĕ khà sồ 1, ƀòn dờng Buôn Ma Thuột pà git: “Tơnơ̆ tŭ iat ală jơnau đơs tă pơgồp bơh cau tĕ khà dê den să tờm añ kung gŏ broă pơlam tàp, lơh broă he dê pal pơn jat tai sơlơ tơnguh rlau, lơh ngan kơlôi sơnơng mờ lơh jat bơta ngan ngồn kung bè git loh broă tàm ƀòn làng bol ơm kis, geh bè hơ̆ den bơta niam lơh broă, cồng nha lơh broă kung bè tơnơ̆ do dilah geh pồ lơh kuang bàng Hội đồng Nhân dân càr den kung geh bơnàng jă nàng să tờm añ in pơn jat tai lơh niam broă lơh he dê”.

Tàm mpồl tĕ khà sồ 9, kơnhoàl Cư Kuiñ, ală cau tơlik mat tĕ khà neh tìp mat mờ rlau 150 nă cau tĕ khà ală xã Cư Êwi mờ Ea Hu. Broă lam lơh bơh ală cau tơlik mat tĕ khà dê tơrgùm tàm broă git bơta ngan ngồn tàm ƀòn lơgar nàng gơtùi ai tơlik ală broă lơh tơnguh bơta pràn tàm broă bơtàu tơnguh lơh sa mpồl bơtiàn dùl bă geh cồng nha mờ kơ̆ kơljap, tàm hơ̆ tơrgùm tàm broă bơt bơtàu ală tiah lơh sa suơn sre ngui công nghệ cao; tơnguh bơta ƀuơn bơh tơl xã dê nàng bơt bơtàu phan bơna geh pơn rơ jat jơnau đơs “Tơl xã dùl phan bơna”; lơh ngan bơt bơtàu ƀòn lơgar pa, lam lơh niam broă gàr tơl niam rài kis mpồl bơtiàn, ngan là broă lơh tơn jơh jơgloh tơrmù rƀah, sền gàr kơ̆ lơngap lơngai chính trị, ờdo ờdă mpồl bơtiàn tàm ƀòn lơgar.

Pơrjum geh 17 dơ̆ geh jơnau đơs bal mờ rlau 30 jơnau đơs, jơnau dan. Tàm hơ̆, cau tĕ khà kơp kờñ ală cau tơlik mat tĕ khà dilah geh pồ den geh sền gròi lam lơh niam broă lam lơh he dê; tơnguh kơnòl broă bơh cau ala mat Hội đồng Nhân dân dê tàm broă cribơyai ai tơlik ală nghị quyết geh cồng nha, di mờ bơta geh ngan bơh tiah do dê; lơh jat jơnau đơs “đơs pal gơ jat bal mờ lơh”, sền gròi rài kis làng bol dê; lơh ngan lơh geh jai pha jơnau kờñ lam kơnhoàl Cư Kuiñ gơ gơs là kơnhoàl pas bơh càr dê. Pơrjum nàng kờñ lơh gơlik bơta niam nàng cau tĕ khà in tìp mat mờ git loh ală cau tơlik mat tĕ khà, bơh hơ̆, sền sơwì, sac rơwah, pồ ală cau tơl khà lơh kuang bàng Hội đồng Nhân dân càr Dak Lak khóa 10, tơngai lơh broă bơh nam 2021 tus nam 2026.

 Cau mblàng K’Duẩn