VOV4.K’ho- Jăt tơrgùm kờp bơh Sở Lao động, Thương binh mờ Xã hội càr Dăk Lăk dê, bơh nhai 07 tus tŭ do, jơh gùt càr geh rlau 75 rbô nă làng bol bơh ală càr rê wơl. Mìng is bơh bồ nhai 10 tus tŭ do, geh mờr 26 rbô nă cau.

Dong kờl cau lơh broă rê wơl tàm càr bơh tiah geh kòp

Tàm hơ̆, uă ngan là công nhân gam lơh broă tàm ală tiah lơh sa mờ măy mok tàm Bình Dương, Đồng Nai, ƀòn dờng Hồ Chí Minh. Nàng dong kờl mpồl cau do, Sở neh lùp mờ ală tiah geh jơnau kờñ jòi cau lơh broă nàng tàm tơrbŏ bal jơnau kờñ cau lơh broă mờ jơnau kờñ lơh broă tŭ ală hìu măy lơh broă wơl bè ờs tơnơ̆ tơngai gơbàn kòp dờng. Mìng is gơwèt mờ ală cau lơh broă geh jơnau kơ̆p kờñ lơh broă tàm càr, Sở kung sồr phòng lao động ală kơnhoàl, thị xã mờ ƀòn dờng tơrgùm cih mat nàng geh broă rơndăp lơh dong kờl dipal. Jăt tàm jơnau cih tàm Kơrnoăt 128 bơh Chính phủ dê tam dră mờ kòp mơkung bơtàu tơnguh wơl lơh sa, tàm Dăk Lăk, gơwèt mờ ală cau lơh nền ơm wơl, càr geh pơn jăt tai sền gròi kờp dŭ ală gùng dà broă lơh dong kờl broă lơh dipal, dong bè ờs wơl rài kis tàm bơta pa.

  Cau mblàng Lơ Mu K’Yến