VOV4.K’ho– Mờ jơnau đơs “Sră nggal kàr lơi den bơsong jơh kàr hơ̆”, càr Dăk Lăk gam lơh ngan lam lơh ală broă lơh dong kờl mpồl lơh sa kă bro mờ cau lơh broă gơtìp kal ke tài bơh kòp Covid-19. Kơnờm bơh hơ̆, tus tŭ do, neh geh mờr 3 rbô mpồl lơh sa kă bro mờ rlau 50 rbô 500 nă làng bol geh dờp ală broă lơh dong kờl jat Nghị quyết sồ 68 bơh Chính phủ dê.

Tơnơ̆ tŭ lơh gơs ală sră nggal jat jơnau pơlam bơh anih lơh broă bảo hiểm xã hội càr Dăk Lăk dê, kong ti cổ phần lòs Đông Nam Á tàm anih lơh sa mờ măi mok Hòa Phú, ƀòn dờng Buôn Ma Thuột, càr Dăk Lăk neh geh tơrmù mờr 200 tơlak đông. Do là khà priă ndrờm mờ 0,5% khà tong priă blơi bảo hiểm rềs àr lơh broă, kòp broă lơh ai rlau 600 nă cau lơh broă tàm pơgap 1 nam in, kờp bơh nhai 7 nam do tus nhai 6 nam tơnơ̆. Mò Lê Thị Tuyết Hà, Phó Kuang atbồ Kong ti pà git, bulah ờ uă, mơya broă lơh dong kờl do là bơta pơn jờng, tam pà bal gơ wèt tus mờ kong ti tàm tơngai kal ke tŭ do: “Kờp jơh kes priă priă nhai kong ti bol hi dê pơgap 3 tơmàn đông dùl nhai, tŭ geh tơrmù 0,5% den ndrờm mờ 15 tơlak đông dùl nhai. Tŭ do den khà geh dong kờl bơh Nghị quyết fô 68 đah kong ti neh blơi phan lơh sơnơm, măi mok rơcang sơndră kòp mờ gròi sền rài kis ai kuang bàng công nhân, cau lơh broă in, kơlôi rơcang kung bè tơnguh broă dong kờl priă jền ai kong ti in tàm tơngai kal ke do”.

Tềng đap broă gơlik geh kal ke bơh bơta bơtờp kòp Covid-19 dơ̆ 4 dê, ƀòn dờng Buôn Ma Thuột neh uă dơ̆ lam lơh ơm yah ngài mpồl bơtiàn jat jơnau sồr sồ 16, sồ 15 mờ 15+. Uă mpồl lơh sa kă bro pal ơm ing broă lơh sa, kă bro halà geh rơndap broă lơh sa, kă bro dipal nàng gàr ờdo ờdă rơcang sơndră kòp. Broă lơh mờ priă jền lơh geh cau lơh broă dê kung gơtìp gơ rềng sơl. Bơnah dong kờl bơh Nghị quyết sồ 68 dê neh dong ală mpồl lơh sa kă bro geh tai dùl bơnah priă jền nàng gròi sền, dong kờl cau lơh broă, pơn jờng khi iang nùs lơh broă. Bi Trần Trung Tiến, cau lơh broă kong ti cổ phần lòs Đông Nam Á tàm anih lơh sa mờ măi mok Hòa Phù, ƀòn dờng Buôn Ma Thuột pà git: “Tŭ kòp bơtờp gơlik geh kal ke den bulah bơta pràn lơh broă mờ cồng nha lơh broă gơmù uă, priă jền lơh geh kung gơmù sơl. Mơya mpồl đơng lam bồ kong ti sền gròi ngan tus cau lơh broă mờ geh ală rơndap broă lơh, lài ngan là dong kờl tai ală dơ̆ sa bơtơl tàm tŭ oh mi lòt lơh broă, dong kờl tai priă xăng lòt rê mờ geh tŭ gròi sền tus cau lơh broă in là jòi anih ơm, hìu ơm ơpah rềp rlau, ờdo ờdă rlau nàng cau lơh broă in pleh tiah ngòt rơngơt, tiah geh kòp gam bơtờp uă nàng gơtùi lơh broă mờ pơn jat tai tă pơgồp kong ti in”.

Bảo hiểm Xã hội Dăk Lăk dong kờl dờp geh ngan ai mpồl lơh sa kă bro, cau lơh broă ơm lơh broă halà ơm tă tong priă bảo hiểm xã hội nàng geh dong kờl jat Nghị quyết sồ 68

Jat ồng Nguyễn Khắc Tuấn, Kuang atbồ Bảo hiểm xã hội càr Dăk Lăk pà git, lam lơh ală broă lơh dong kờl jat Nghị quyết sồ 68, bảo hiểm xã hội càr neh tơrmù khà priă tă bảo hiểm rềs àr lơh broă mờ kòp broă lơh ai mờr 3 rbô mpồl lơh sa kă bro mờ cau ngui cau lơh broă in bal mờ mờr 44 rbô nă cau lơh broă. Kờp jơh khà priă tơrmù là 13 tơmàn đông. Ơm ing tă tong kes priă jơh sơnam rê rlô lơh broă mờ chơt să ai 4 mpồl lơh sa kă bro in mờ khà priă mờr 800 tơlak đông. Bảo hiểm xã hội càr kung là rbàng tơrbŏ dờp bơta geh ngan ai mpồl lơh sa kă bro mờ cau lơh broă ơm lơh broă in tài bơh kòp halà ơm ờ tă priă bảo hiểm xã hội mơya ờ geh sa bảo hiểm ờ geh broă lơh nàng geh dong kờl bơh Nghị quyết sồ 68. Tus tŭ do, broă lam lơh jat Nghị quyết sồ 68 tàm gah bảo hiểm xã hội ƀuơn mờ niam ngan. Kơnờm bơh hơ̆ dong cau lơh broă mờ mpồl lơh sa kă bro gơtùi tơrmù tŭ tơngai kơp gơn tŭ neh lơh gơs ală sră nggal: “Tàm broă lam lơh do den bol hi neh ring bal bơh dà lơgar tus kấp hơđơm là lam lơh gùng dà bơh Chính phủ dê mờ kuang đơng lam gah bảo hiểm dê. Bảo hiểm xã hội Việt Nam sồr là tàm dùl ngai pal dờp geh ngan ai cau lơh broă mờ mpồl lơh sa kă bro in tŭ geh tơl sră nggal den mìng is anih lơh broă Bảo hiểm xã hội Dăk Lăk, bol hi neh đơng lam tàm jơh gùt gah do là tŭ sră nggal pơyua tus anih lơh broă bảo hiểm xã hội den tàm pơgap 1 jơ pal dờp geh ngan ai mpồl lơh sa kă bro in nàng lơh gơlik bơta ƀuơn ngan rlau jơh ai mpồl lơh sa kă bro mờ cau lơh broă in geh dờp bơta dong kờl bơh Nghị quyết sồ 68 dê”.

Bơnah dong kờl bơh Nghị quyết sồ 68 neh dong ală mpồl lơh sa kă bro geh tai dùl bơnah priă jền nàng gròi sền, dong kờl cau lơh broă, pơn jờng khi iang nùs lơh broă

Ồng Nguyễn Quang Thuân, Phó Kuang atbồ Sở Lao động- Thương binh mờ Xã hội càr Dăk Lăk pà git, tus tŭ do tàm Dăk Lăk neh lam lơh geh 9 tàm 11 mpồl broă lơh dong kờl jat tơngume Nghị quyết sồ 68. Tàm hơ̆, geh 3 mpồl broă lơh geh lam lơh niam là broă lơh tơrmù khà priă tă tong bảo hiểm rềs àr lơh broă, kòp broă lơh; broă lơh ơm ing tă tong kes priă jơh sơnam rê rlô lơh broă mờ chơt să, broă lơh dong kờl viên chức lơh broă niam chài mờ cau pơlam nhơl chờ. Tŭ do, Sở gam jơh nùs lam lơh ală broă lơh chồl pràn mblàng yal, cribơyai mờ Ủy ban Nhân dân càr jàu gơnoar ring bal dong kờl rê ai Ủy ban Nhân dân ală kơnhoàl, thị xã mờ ƀòn dờng in nàng gàr tŭ tơngai, broă rơndap lơh, tơngume mờ di cau geh dờp bơta dong kờl. Sở kung crơng gơs ală mpồl lơh broă nàng gròi sền, chul chồl broă lam lơh jat Nghị quyết sồ 68 tàm kấp hơđơm: “Nàng lơh niam rlau tai kơnòl broă do tàm tơngai tus den Sở kung neh geh rơndap broă cribơyai, pơgồp bal mờ Sở Thông tin- Truyền thông, ală Sở, gah broă lơh geh gơ rềng, kuơmàng là ală tiah sơlơ tơnguh broă mblàng yal ală mpồl lơh broă dong kờl gơ wèt tus mờ ală mpồl cau nàng rơcang gàr di sră nggal, di cau mờ bơt bơtàu jơnau pơlam ai ală mpồl broă lơh dong kờl do in nàng bơh hơ̆ sơlơ tơnguh broă mblàng yal nàng ală mpồl cau geh dờp kuơ in ndrờm git loh ală bơta do”.

Mờ jơnau đơs “Sră nggal kàr lơi den bơsong jơh kàr hơ̆, ờ lời làng bol mờ mpồl lơh sa kă bro pal kơp gơn”, tŭ do ală kấp, ală gah broă lơh tàm Dăk Lăk gam sơlơ tơnguh broă pơgồp bal lam lơh kờp sền, cih mat nàng lam lơh dong kờl gơ wèt tus mờ cau lơh broă, cau ngui cau lơh broă jat jơnau sồr. Kơrnuat dong kờl pal gàr di tŭ, di cau, loh làng, song dơpă, ờ lời gơlik geh bơta sơmờm broă dong kờl.

 Cau mblàng K’Duẩn