VOV4.K’ho- Gah bơto bơsram càr Dăk Lăk gam lơh ngan lam lơh ală broă lơh dong kờl kơnòm bơsram tàm nam bơsram pa 2021- 2022. Tàm hơ̆ sền gròi mờ dong kờl uă ngan rlau jơh ai ală kơnòm bơsram là cau F0, F1 mờ kơnòm bơsram tàm tiah gơtìp wàng se tài gơ rềng bơh kòp Covid-19.

Tus ngai 15/9, jơh ală kơnòm bơsram càr Dăk Lăk ngan ngồn mut tàm nam bơsram pa. Gơ jat tàm broă gơlik geh ngan ngồn tàm càr, ală hìu bơsram geh rơ wah broă lơh bơsram dipal. Bulah bè hơ̆, jat khà kờp bơh Sở Giáo dục mờ Đào tạo càr Dăk Lăk dê, gùt càr tŭ do geh mờr 90 nă kơnòm bơsram là cau F0 mờ rlau 13 rbô 200 nă oh gơ wèt cau tam cah is mờ kis tàm tiah gơtìp wàng se, nàng dong kờl ală oh gàr niam nùs nhơm, iang nùs tàm tơngai tam cah is mờ sơm kòp, Sở Giáo dục mờ Đào tạo neh sồr ală hìu bơsram tơnguh broă mblàng yal, pơn jờng mè bèp, kơnòm bơsram lơh jat nền nòn ală jơnau sồr bè rơcang sơndră kòp Covid-19.

Cau mblàng K’Duẩn