VOV4.K’ho– Mìng gam rlau 1 nhai tai là geh lơh dơ̆ tĕ khà Quốc hội mờ Hội đồng Nhân dân ală kấp. Nàng gàr bơta làng bol lơh tờm mờ cồng nha bơh dơ̆ tĕ khà do dê, càr Dak Lak neh tơnguh broă lơh mblàng yal bal mờ uă broă lơh krơi is, ngan là gơ wèt tus mờ cau tĕ khà là cau jơi bơtiàn kòn cau dùl êt nă cau tàm ală tiah sar lơgar ngài.

Tơnơ̆ tŭ jơh sa mang, ồng Lò Khái Phụ, kra ƀòn tàm thôn Ea Rớt, xã Cư Pui, kơnhoàl Krông Bông, càr Dak Lak gơ jă gơ jal ià đèng pil nàng lòt tus ală hìu tàm thôn mblàng yal bè dơ̆ tĕ khà. Gam tàm tơngai tơnhàu bùm blàng den tàng ồng pal lòt tàm trồ mang hơ̆ sồng gơtùi tìp mat làng bol. Pah tŭ trồ mang, ồng Phụ lòt tus pơgap bơh 4 tus 5 hìu nàng mblàng yal làng bol in git bè ală tơngume mờ broă lam lơh tĕ khà. Tài làng bol tàm thôn ndrờm là cau H’Mông den tàng ală tơngume ndrờm geh ồng Phụ mblàng wơl mờ dà kòn cau H’Mông nàng làng bol in git loh: “Añ kung geh kơnòl mblàng yal, lam sồr oh tàm tĕ khà, tơl nă cau pal tus bal tơl làm, tài hơ̆ là adat boh lam bơh dà lơgar dê mờ kơnòl bơh tơl nă làng bol dê. Broă mblàng yal là tŭ pơrjum thôn den he mblàng yal, dilah hìu bơnhă lơi ờ hềt git wă den he pal tus tàm hìu nàng mblàng yal, lam sồr khi in”.

Cư Pui là xã tiah ngài bơh kơnhoàl Krông Bông dê, geh gal làng bol jơi bơtiàn kòn cau dùl êt nă cau ơm kis, geh uă thôn, ƀòn ngài tiah tờm xã mờr 20 kơi sồ, gùng lòt kal ke. Den tàng nàng dong làng bol ndrờm git jơnau yal bè dơ̆ tĕ khà mờr geh lơh, mpồl tĕ khà xã Cư Pui neh geh uă broă lơh nàng yal jơnau tơnggit tus mờ làng bol.

Cau lơh broă anih pờ tơlik jơnau đơs xã mblàng yal bè tĕ khà

Ồng Nguyễn Văn Tâm, Chủ tịch Ủy ban Nhân dân xã Cư Pui pà git, dơ̆ tĕ khà do xã Cư Pui geh 10 mpồl tĕ khà mờ khà pal pồ là 30 nă kuang bàng Hội đồng Nhân dân. Bơh 2 dơ̆ cribơyai neh lơh nền mat 65 nă cau tơlik mat tĕ khà mờ kung neh bơyai lơh jơh broă ai jơnau đơs tàm tiah ơm kis gơ wèt tus mờ ală cau tơlik mat tĕ khà nàng rơcang ai broă lơh cribơyai dơ̆ 3 in. Xã kung neh lơh gơs broă cih mat cau tĕ khà mờ mờr 7 rbô 200 nă cau tĕ khà geh tus bal tĕ khà tàm 13 mpồl tĕ khà.

Jat ồng Nguyễn Văn Tâm pà git, tus tŭ do, broă rơcang lài mờ ală broă rơndap lơh lam lơh tĕ khà ndrờm geh lơh jat di mờ jơnau sồr. Nàng gơtùi lơh geh bơta do, broă lơh mblàng yal bè tĕ khà geh lam lơh sùm, mờ geh bơta dong kờl jơh nùs ngan bơh ală cau kra ƀòn, cau atbồ thôn mờ cau geh bơngă pin dờn tàm ală ƀòn làng bol ơm kis: “Mờ bơta krơi is là dùl xã geh gal làng bol jơi bơtiàn kòn cau dùl êt nă cau mờ ƀòn làng bol ơm kis bơh xã dê ờ tơrgùm bal, nàng broă mblàng yal dipal mờ xã den bol hi lơh uă broă lơh. Broă lơh mblàng yal geh cồng nha ngan rlau jơh hơ̆ là mblàng yal tàm ƀòn làng bol ơm kis, ală tiah làng bol ơm kis. Bol hi bơyai lơh ală rơndeh loa lòt làm bă tiah tus mờ ƀòn làng bol ơm kis nàng mblàng yal. Dơ̆ 2 là bơh ală gơnoar broă bơh cau kra ƀòn, cau atbồ ƀòn, cau geh bơngă pin dờn, cau kơđơng yàng, cau duh broă yàng den khi dong kờl ai broă lơh mblàng yal in geh cồng nha ngan”.

Tơngume mblàng yal tĕ khà geh pơgồp bal mờ ală jơnau đơs niam chài đơs crih tamya

Ndrờm bè hơ̆ sơl, tàm xã Yang Reh, kơnhoàl Krông Bông, càr Dak Lak, broă lơh mblàng yal bè tĕ khà kung geh tơnguh pràn sơl. Ồng Y Mui Niê, atbồ ƀòn Yang Reh, xã Yang Reh pà git, tàm ƀòn geh 4 cụm loa pờ tơlik jơnau đơs ờ geh che, pah ngai pờ tơlik jơnau tơnggit mblàng yal bè dơ̆ tĕ khà tus mờ làng bol. Bơdìh hơ̆ tai, kuang bàng Văn hóa- Thông tin xã sùm mut tàm ƀòn nàng mblàng yal tơn bè dơ̆ tĕ khà. Să tờm ồng Y Mui Niê kung sùm pơgồp bal mblàng yal bè dơ̆ tĕ khà tàm ală dơ̆ pơrjum ƀòn; lam sồr làng bol, hòi jà cau tờm tàm hìu bơnhă gam lòt lơh broă ngài tus ngai 23/5 tus rê wơl tàm ƀòn nàng lòt tĕ khà: “Làng bol git jơnau tơnggit mblàng yal adat tĕ khà kung kơnờm bơh loa pờ tơlik jơnau đơs pah ngai tàm ƀùi drim mờ ƀùi mho, tàm ƀòn geh 4 yô loa. Broă lơh dơ̆ 2 là mờ áp phích hơ̆ sồng tìp mat cau tĕ khà. Mờr tus tĕ khà kuang bàng Hội đồng Nhân dân den kung lơh jat, rơcang nùs nhơm lòt pồ nàng rơ wah ală kuang bàng geh nùs nhơm, geh pràn jak nàng drơng làng bol in”.

Jat ồng Bùi Duy Thích, Chủ tịch Ủy ban Mặt trận dà lơgar Việt Nam kơnhoàl Krông Bông đơs, jơh gùt kơnhoàl geh 25 jơi bơtiàn kòn cau ơm kis bal, tàm hơ̆ 40% làng bol là cau jơi bơtiàn kòn cau dùl êt nă cau. Den tàng nàng dơ̆ tĕ khà bơyai lơh geh cồng nha, bơdìh mờ mblàng yal mờ pano, áp phích, băng rôn, kơnhoàl neh lip ală băng, điã mblàng yal tĕ khà pơyua Ủy ban Nhân dân 14 xã, thị trấn in. Anih pờ tơlik jơnau đơs- sơñio rùp kơhoàl pờ tơlik jơnau đơs 2 dà đơs dà yoan mờ dà Rơđê, mblàng yal bè tĕ khà pah ngai. Tus tŭ do, ală broă lơh tĕ khà ndrờm geh lam lơh di mờ tŭ tơngai hơ pơrgon, mat cau tơlik mat tĕ khà kung neh geh lơh sir, mờ neh bơyai lơh cribơyai dơ̆ 3: “Bol hi neh bơyai lơh ai jơnau đơs tàm tiah ơm kis tàm 140 thôn, ƀòn, tổ dân phố mờ 87 nă cau tơlik mat tĕ khà kấp kơnhoàl mờ 666 nă cau tơlik mat tĕ khà kấp xã. Mặt trận ală kấp kung gam bơyai lơh tơrgùm jơnau đơs nàng yal pơrjum cribơyai dơ̆ 3 in. Tŭ do, tàm kơnhoàl jơh ală anih pờ tơlik jơnau đơs xã kung neh sùm mblàng yal bè broă lơh tĕ khà, tàm ală dơ̆ pơrjum bơh thôn, ƀòn, tổ dân phố kung neh pơgồp bal broă lơh mblàng yal bè tĕ khà. Ală mpồl lơh broă, mpồl cau kung jơh nùs mblàng yal bè broă lơh tĕ khà Quốc hội mờ Hội đồng Nhân dân ală kấp”.

Pano, áp phích, băng rôn geh yồng tàm uă tiah tàm ală thôn, ƀòn

Tàm dơ̆ tĕ khà dơ̆ do, càr Dak Lak geh 20 mpồl tĕ khà tam pà jat ală kơnhoàl, thị xã mờ ƀòn dờng. Mờ bơta krơi is càr geh ù tiah dờng ơnàng, gal làng bol jơi bơtiàn kòn cau dùl êt nă cau, uă tiah kal ke tàm broă git jơnau yal. Den tàng, nàng gàr bơta làng bol lơh tờm mờ cồng nha ai dơ̆ tĕ khà kuang bàng Quốc hội khóa 15 mờ kuang bàng Hội đồng Nhân dân ală kấp tơngai lơh broă bơh nam 2021 tus nam 2026, Dak Lak gam tơnguh broă mblàng yal mờ uă broă lơh; kuơmàng sền gròi tus broă mblàng yal bè dơ̆ tĕ khà tàm tiah sar lơgar ngài, tiah làng bol jơi bơtiàn kòn cau dùl êt nă cau.

 Cau mblàng K’Duẩn