VOV4.K’ho- Tơnơ̆ rlau dùl nhai lam lơh jăt Kơrnoat 68 bơh Chính phủ dê mờ Kơrnoat 23 bơh Thủ tướng Chính phủ dê bè bàr pe broă dong kờl cau lơh broă mờ cau ngui cau lơh broă tìp kal ke tài bơh kòp Covid-19, tus tŭ do, càr Dăk Lăk neh dong kờl geh mờr 49 rbô nă cau bal mờ kờp jơh khà priă mờr 18 tơmàn 200 tơlak đong.

Càr Dăk Lăk neh lam lơh jăt geh 8 tàm 11 mpồl broă dong kờl jăt jơnau sồr. Càr gam pơn jăt tai kờp sền mờ lơh jăt mpồl broă dong kờl cau lơh broă ờ geh sră pơrgon lơh broă mờ dong kờl hìu bơnhă lơh sa kă bro. Mìng is gơwèt mờ broă dong kờl cau ngui cau lơh broă bơto bơtê, tề lam, tơnguh uă bơta jak chài lơh broă nàng gàr sùm broă lơh ai cau lơh broă in den tŭ do ờ hềt geh anih lơi dan dong kờl.

Gơkòl dờng ngan rlau jơh tŭ do là broă kờp sền, lòt sền ală cau geh dờp bơta dong kờl. Dăk Lăk tŭ do geh uă ngan làng bol tàm ală càr ndai rê, ală càr do gam lơh jăt jơnau sồr ơm yah ngài mpồl bơtiàn den tàng broă tàm pơndrờm, tơrgùm kờp, kờp sền tìp uă ngan kal ke. Mơya, càr gam lơh ngan lơh jăt ală broă lơh nàng kờñ sền gàr dong kờl mhar ngan rlau jơh, di tŭ mờ di cau.

Cau mblàng Lơ Mu K’Yến