VOV4.K’ho- Càr Dak Lak geh mờr 11 rbô nă cau bơsram dờng gam bơsram tàm ală hìu bơsram đại học, cao đẳng tàm gùt càr, tàm hơ\ cau bơsram dờng kòn cau geh mờr 15%. Càr geh 2 hìu bơsram kấp 3 kòn cau ơm wơl mờ 16 hìu bơsram phổ thông kòn cau ơm wơl kấp kơnhòal. Ală nam do, Sở Giáo dục mờ Đào tạo càr neh tơrgùm tă pria\ bơt bơtàu phan bơna ai ală hìu bơsram in, kươmàng là ală hìu bơsram phổ thông kòn cau ơm wơl.

Tus tu\ do, gùt càr geh 6 tàm 16 hìu bơsram phổ thông kòn cau ơm wơl tơl khà dà lơgar mờ gam lơh gơs lơh pa hìu bơsram kấp 3 kòn cau ơm wơl Đăm San tàm thị xã Buôn Hồ. Tàm ală nam do, cồng nha bơ to bơsram bơh ală hìu bơsram phổ thông kòn cau ơm wơl dê ngai sơlơ gơguh jơnhua. Tàm gah bơ to bơsram tờm ngan, càr geh ua\ kơ nòm bơsram kòn cau geh cồng nha jak ngan tàm ală dơ\ pơrlòng kơ nòm bơsram jak kấp càr mờ kấp dà lơgar, pơrlòng khoa học kỹ thuật ală kấp.

Cau mblàng K’Duẩn