VOV4.K’ho- Tơnơ̆ 12 nam ơm kơ̆p sùm, bơh nhai 03 nam do, làng bol tàm xã Cư San, kơnhoàl M’Drăk, càr Dăk Lăk dê là tiah lơh rơndăp broă lơh bơtơ̆t dơng dà jơh 4 rbô 400 tơmàn đong Krông Pách Thượng, gam geh ntrờn rê ơm tàm tiah ơm kis pa tàm xã Cư Elang, kơnhoàl Ea Kar, càr Dăk Lăk. Jơh ală anih lơh broă chính trị tàm tiah do neh tơrgùm jơh ală cau, phan bơna, phan ngui dùl bă uă ngan rlau jơh ală broă dong kờl bơh dà lơgar dê nàng dong làng bol sơrbac mhar kơ̆ kơl jăp rài kis tàm tiah ơm pa.

Rlau dùl nhai do, tiah ntrờn ơm kis pa tàm thôn 1, xã Cư Elang, kơnhoàl Ea Kar, càr Dăk Lăk dê gơlơh bè dùl anih bơ̆t bơtàu dờng, tŭ pah ngai geh tai ală hìu pa geh lơh. Do là tiah ntrờn ơm kis pa sồ 1 lời ai ală hìu bơnhă ntrờn lik bơh tiah dơlam tơnau dà Krông Pách Thượng, gơwèt xã Cư San, kơnhoàl M’Drăk. Jăt jơnau kơ̆p kờñ bơh làng bol dê, ala tài lơh dùl ròt ală hìu ntrờn ơm kis pa, dà lơgar dong kờl làng bol ntrờn jơh ală hìu đam, phan bơna tus tiah ơm lài do tus lơh wơl tàm tiah ơm pa. Dùl tàm ală hìu bơnhă bơh sơnrờp rê tàm do ơm kis kơ̆ kơl jăp, bi Ma Văn Cường pà gĭt: bulah gam sơl ală bơta kal ke ờ hềt chài, mơya geh bơta dong kờl jơh nùs ngan bơh gơnoar ătbồ bal mờ mpồl cau tàm tiah do dê, rài kis bơh hìu bơnhă bi dê neh rơhời kơ̆ kơl jăp, mờ ờ gam tai pal kơlôi rơcăng sùm tài bơh rơngòt dà tih dà cò. Bi Ma Văn Cường, yal: Añ rê tàm do neh mờr 4 poh do rao. Ơm tàm tiah do den kung iang nùs sơl gơ, tŭ do neh kơ̆ kơl jăp ngan.

Tiah ntrờn ơm kis pa sồ dùl tàm dơlam xã Cư Elang, hơ pơrgon dùl rài kis niam bơnĕ ai làng bol in ntrờn bơh tiah dơlam tơnau dà Krông Pách Thượng

Gơwèt mờ hìu bơnhă bi Lều Văn Sùng, pa ntrờn rê tus tiah ơm kis pa tàm thôn 1, xã Cư Elang, hìu lơh mờ mpàn gơlơh bè tam gơl soh àu pa, mpờl gŏ ngan tàm trồ tơngai niam àng gơcrà sàng loh. Bi Lều Văn Sùng, yal: Bơh chờm den kung gŏ gơlơh rơcăng sơl, mơya tŭ neh rê ơm tàm do den gŏ gùng dà kung geh lơh jơh sơl, hơ̆ sồng ồs đèng, dà ngui sa phan lơi kung geh tơl lơm, kuang bàng xã khi kung sền gròi uă ngan, den añ kung neh iang nùs ngan gơ ì. Tŭ do, mìng kờñ pal tơryăng tơryồng lơh sre tai mờ añ pin dờn là dilah lơh ngan den rài kis tơnơ̆ do geh niam rlau.

Tàm dơ̆ lòt ntrờn bơh sơnrờp, neh geh 44 hìu bơnhă bal mờ 207 nă cau bơh Cư San rê tus tiah ntrờn ơm kis pa sồ 1. Tàm do, tơl hìu bơnhă geh pà 400 thơk vuông ù ơm mờ mờr dùl lồ ù lơh sa nàng mhar bè ờs wơl rài kis. Tŭ do, ală mpồl lơh broă geh gơnoar bơh 2 kơnhoàl: M’Drăk mờ Ea Kar dê kung gam pơn jăt tai lơh dơ̆ 2, ntrờn làng bol lik bơh tiah dơlam tơnau dà Krông Pách Thượng. Digơlan tàm dùl nhai tai là tiah ntrờn ơm kis pa tàm Cư Elang geh rơndăp tơl bal mờ kờp jơh 230 hìu bơnhă, jơh ală là cau jơi bơtiàn Mông lơm. Ồng Trần Văn Thanh Chủ tịch Ủy ban Nhân dân xã Cư Elang, kơnhoàl Ea Kar, pà gĭt: Ală anih lơh broă geh gơnoar tàm M’Drăk mờ Ea Kar bol hi dê neh pơgồp bal mờ gơ̆p niam ngan, jơh bal đah anih lòt kung bè anih tus. Bơh gùng dà, broă rơndăp lơh bơh Ủy ban Nhân dân kơnhoàl dê den bol hi neh geh kuơ ngan hòi tơrgùm ală mpồl ling griăp ƀòn, đoàn ơruh pơnu mờ ală mpồl cau bơh xã dê, pơgồp bal mờ ală mpồl cau bơh kơnhoàl dê rơhời ntrờn mờ dong kờl làng bol lơh pơđàu wơl hìu đam kung bè sền gàr ai tơl ală jơnau kờñ pal geh bè dà sàng goh, ồs đèng, nàng lơh bè lơi tŭ làng bol tus tàm tiah ơm pa pal sền gàr geh rài kis.

Ồs đèng, dà ngui sa geh lơh tơl rơcăng tus tàm tơl hìu “ơm kơ̆p” cau ơm kis

Jăt ồng Lê Đình Chiến Phó Chủ tịch Ủy ban Nhân dân kơnhoàl Ea Kar dê yal, nàng dong làng bol sơrbac mhar ơm kis kơ̆ kơl jăp tàm xã Cư Elang, kơnhoàl Ea Kar neh hòi tơrgùm jơh ală mpồl cau bơh 16 xã, thị trấn dê tàm pơdar gơ̆p tus dong kờl làng bol. Ală broă dong kờl bơh dà lơgar dê kung geh đòm jăt lơh dùl bă uă ngan rlau jơh, ƀươn ƀoài ngan rlau jơh gơwèt mờ làng bol. Ồng Lê Đình Chiến đơs: Bol añ crơng gơs mpồl lơh broă sùm nàng bơsong ală broă kal ke gơlik geh, sền gàr lơngăp lơngai rơndăp tăp sèng, ồs đèng, dà ngui sa, lơh sơnơm, bơto bơtê. Tŭ làng bol tus mờ gơtìp kòp tê jê să den pal dong kờl mhar, digơlan sră cih măt cau tàm hìu bơnhă ờ hềt lơh sir, mơya kung gam pal drơng sơl ai làng bol in lài. Kơnòm bơsram mờ lòt jăt mè bèp tus tàm hơ̆ den cơldŭ lơh broă bơto bơtê mờ ală hìu bơnhă pal ai ală oh in mŭt bơsram lài, ai sră nggal den geh lơh tơnơ̆.

Ală hìu neh geh lơh ồs đèng 

Jăt broă rơndăp lơh, tus nhai 7 nam do, càr Dăk Lăk geh lơh sir jơh broă ntrờn rlau 700 hìu bơnhă làng bol lik bơh tiah dơlam tơnau dà Krông Pách Thượng. Tŭ do, broă lơh tơm priă ai ù mờ ntrờn làng bol rê hờ tiah ơm kis pa neh geh đòm jăt dùl bă uă ngan rlau jơh ală broă dong kờl bơh dà lơgar dê, kung bè bơta tàm sơm băt tê bal jơh bal bè mpồl cau, phan bơna bơh jơh ală anih lơh broă chính trị tàm tiah do dê. Neh geh ală broă gơlik geh tŭ tiah ntrờn ơm kis pa sồ 1 geh rơndăp tơl, tiah ntrờn ơm kis pa sồ 2 kung gam lơh sir gơs sơl. Bulah bè hơ̆, bal mờ bơta lơh ngan jơh nùs bơh jơh ală anih lơh broă chính trị dê mờ bơta dùl nùs bal bơh làng bol dê, ală bơta kal ke gam rơhời geh tă bơsong. Tơnơ̆ 12 nam ơm kơ̆p jŏ jòng sùm, làng bol tàm tiah dơlam tơnau dà Krông Pách Thượng neh sơnđờm gơ rê wơl mờ dùl rài kis pa niam bơnĕ rlau.            

             Cau cih Phạm Minh Huệ- Cau mblàng Lơ Mu K’Yến