VOV4.K’ho – Tĕ khà kuang bàng Quốc hội khóa 15 mờ kuang bàng Hội đồng Nhân dân ală kấp tơngai lơh broă bơh nam 2021 tus nam 2026 là broă chính trị kuơmàng. Tàm Dak Nông, Ủy ban tĕ khà càr gam tơrgùm đơng lam ală anih lơh broă, mpồl lơh broă, ală tiah jơh nùs rơcang lài, gàr di tơngai hơ pơrgon, làng bol lơh tờm mờ jat jơnau cih bơh adat boh lam dê.

Kơnờm lơh niam broă mblàng yal tĕ khà kuang bàng Quốc hội khóa 15 mờ Kuang bàng Hội đồng Nhân dân ală kấp tơngai lơh broă bơh nam 2021 tus nam 2026 mờ uă cau tĕ khà tàm tiah sar lơgar ngài, tiah kal ke bơh càr Dak Nông dê neh git loh rlau kơnòl mờ gơnoar kuơ bơh să tờm dê. Cau tĕ khà H’Plơ ơm tàm ƀòn Sa Pa, xã Thuận An, kơnhoàl Dak Mil pà git, làng bol sùm sền gròi ală broă bơyai lơh cribơyai mờ ală jơnau yal ală cau geh yal tơnggit tơlik mat tĕ khà kuang bàng Quốc hội mờ Kuang bàng Hội đồng Nhân dân ală kấp: “Bol hi kơp kờñ ală cau geh làng bol sac rơ wah, khi geh cèng jơh bơta pràn jak he dê nàng hòi jà, lam thôn ƀòn bơtàu tơnguh, dong dà lơgar ngai sơlơ bơtàu tơnguh, làng bol ngai sơlơ pas sơm, broă lơh sa ngai sơlơ kơ̆ kơljap”.

Jat mò Nguyễn Thị Thu Hường, Kuang atbồ Sở Nội vụ, gơnoar cih bơh Ủy ban tĕ khà càr Dak Nông dê pà git, tus tŭ do, broă rơcang tus dơ̆ tĕ khà kuang bàng Quốc hội khóa 15 mờ Kuang bàng Hội đồng Nhân dân ală kấp tơngai lơh broă bơh nam 2021 tus nam 2026 tàm càr Dak nông neh geh lam lơh di tŭ, di mờ jơnau cih bơh adat boh lam dê, di mờ tŭ tơngai jat broă rơndap lơh bơh Mpồl duh broă tĕ khà dà lơgar mờ Ủy ban tĕ khà ală kấp. Jơh gùt càr neh crơng gơs 2 mpồl tĕ khà kuang bàng Quốc hội mờ 14 mpồl tĕ khà kuang bàng Hội đồng Nhân dân càr, 8 Ủy ban tĕ khà Hội đồng Nhân dân kấp kơnhoàl, 71 Ủy ban tĕ khà Hội đồng Nhân dân kấp xã.

Tơnơ̆ pơrjum cribơyai dơ̆ 2, Dak Nông yal tơnggit 11 nă cau tơlik mat tĕ khà kuang bàng Quốc hội khóa 15, 96 nă cau tơlik mat tĕ khà Kuang bàng Hội đồng Nhân dân càr, 507 nă cau tơlik mat tĕ khà kuang bàng Hội đồng Nhân dân kơnhoàl, 3 rbô 244 nă cau tơlik mat tĕ khà kuang bàng Hội đồng Nhân dân kấp xã, tơngai lơh broă bơh nam 2021 tus nam 2026: “Tŭ do, Mpồl đong lam càr dê kung bè Ủy ban tĕ khà càr neh đơng lam tus ală kơnhoàl, ală xã jat tam pà kơnòl broă he dê lam lơh broă crơng gơs ală mpồl tĕ khà. Pơn jat tơnơ̆ hơ̆, xã geh dan kơnhoàl đal git ală anih đùh sră pồ mờ crơng gơs ală mpồl đùh sră. Bè broă kờp sền phan bơna kung bè pà priă jền mờ ală broă lơh ndai den bol hi neh cribơyai mờ Ủy ban tĕ khà càr đơng lam ală tiah jat adat boh lam kung bè ală jơnau pơlam bơh dà lơgar dê, jơnau pơlam bơh càr dê nàng lam lơh jat di mờ broă rơndap lơh bơh dơ̆ tĕ khà dê”.

Bal mờ hơ̆, Ban Thường trực Ủy ban Mặt trận dà lơgar ală kấp pơgồp bal, rơcang tơl làm ală bơta nàng bơyai lơh geh cồng nha ală dơ̆ tìp mat cau tĕ khà, lam sồr tĕ khà bơh ală cau tơlik mattĕ khà kuang bàng Quốc hội khóa 15 mờ Kuang bàng Hội đồng Nhân dân ală kấp tơngai lơh broă bơh nam 2021 tus nam 2026. Ủy ban Nhân dân kấp xã pơn jat tai kờp sền, bơtơl cau tĕ khà tam gơl anih ơm kis, ală cau ờ geh mat ing tàm anih ơm kis, gàr cau tĕ khà lơh jat gơnoar tĕ khà he dê jat jơnau cih bơh adat boh lam dê.

Ủy ban Mặt trận dà lơgar càr Dak Nông bơyai lơh pơrjum cribơyai dơ̆ 2

Ồng Nguyễn Phú Nghĩ, Phó Chủ tịch Ủy ban Mặt trận dà lơgar càr Dak Nông pà git, pơrjum cribơyai tàm ală kấp bơh càr dê lam lơh loh làng, làng bol lơh tờm, di broă rơndap lơh, di tŭ tơngai jat jơnau cih adat boh lam mờ ndrờm geh bơta ring bal uă bơh cau tĕ khà dê: “Broă yal tơnggit kuang bàng bơyai lơh tàm anih lơh broă, mpồl lơh broă mờ ai jơnau đơs cau tĕ khà tiah lơh broă mờ jơnau đơs mpồl đơng lam bồ rề ơnàng lam lơh jơh nùs ngan. Ală cau tơlik mat tĕ khà geh pin dờn uă ngan ai gŏ tàm tŭ tơlik mat tĕ khà mpồl đơng lam bồ neh rơ wah cau di pràn jak, di nùs nhơm nàng tơlik mat tĕ khà Kuang bàng Quốc hội mờ Kuang bàng Hội đồng Nhân dân ală kấp. Bè tơl khà kuang bàng là jơnhua ngan, bè mờng chài lơh broă, sơnam, kuang bàng kơnòm să ndrờm jat jơnau sồr mờ gàr bơta ala mat gơnoar bơta kơp kờñ dipal bơh làng bol dê”.

Tàm dơ̆ sền sơ wì, sền gròi broă lơh rơcang tĕ khà ngai 23/3, ồng Phùng Khánh Tài, Phó Chủ tịch Ủy ban Mặt trận dà lơgar Việt Nam sồr càr Dak Nông pal pơn jat tai lơh niam broă yal tơnggit, mblàng yal bè tĕ khà gàr bơta ring bal mờ geh cồng nha. Mặt trận dà lơgar càr pal lơh niam broă rơcang lài tus pơrjum cribơyai dơ̆ 3 nàng sac rơ wah, cih mat ngan ngồn cau tơl khà tơlik mat kuang bàng Quốc hội mờ Kuang bàng Hội đồng Nhân dân ală kấp tơngai lơh broă bơh nam 2021 tus nam 2026, mơkung pal lơh niam broă bơto pơlam ai kuang bàng tàm Ủy ban tĕ khà ală kấp in: “Añ sồr càr pal lơh niam broă bơsong sră yal yă, yal khài bơh làng bol dê. Pơn jat tai kờp sền kuang bàng tus bal tơlik mat tĕ khà kuang bàng Quốc hội kung bè kuang bàng Hội đồng Nhân dân ală kấp, ngan là ală broă bè kah yau chính trị, ală broă bè chính trị tŭ do gơ jat bal mờ ală broă cau đơs tàm ală dơ̆ pơrjum tìp mat cau tĕ khà. Jat añ do là gah kuơmàng ngan nàng geh bơnàng jă, jat tàm hơ̆ geh ală broă kờp sền tŭ kuơmàng. Bol hi sồr càr git loh broă tàm làng bol, ngan là ală tiah geh bơta ờ suk, yal yă uă cau, broă ù tiah, tiah ơm kis halà ală broă gơ rềng tus jat yàng. Càr pal sền gròi uă nàng bơsong, pleh lời ală mpồl ờ niam sơmờn tus tŭ tơngai ƀuơn gơ rềng nàng bơ chồt khi lơh aniai tus dơ̆ tĕ khà”.

Tŭ do broă lơh rơcang tus Ngai chờ jơh gùt làng bol gam pơn jat tai geh càr Dak Nông lam lơh ring bal, gàr niam di broă rơndap lơh, di jơnau sồr mờ di tŭ tơngai. Jơnau kờñ bơh càr dê là pồ dùl dơ̆ tơl khà mờ rơ wah ală kuang bàng ngan ngồn geh pơn rơ jak, dipal ala mat ai bơta kơp kờñ mờ gơnoar lơh tờm bơh làng bol dê.

Cau mblàng K’Duẩn