VOV4.K’ho- Ngai 12/11/2020, Thủ tướng Chính phủ neh ai lơh Kơrnoat 33 nam 2020 bè jàu broă tam pà mờ gĭt nền tiah làng bol jơi bơtiàn kòn cau dùl êt nă cau mờ tiah kơh bơnơm jăt bồ tơngoh bơtàu tơnguh tơngai bơh nam 2021- 2025. Do là bơnàng jă kuơmàng nàng ală tiah in lam lơh jăt ală gùng dà broă lơh gơ in dipal ngan, geh kuơ ngan mờ geh cồng nha gơwèt mờ tơl tiah làng bol jơi bơtiàn kòn cau dùl êt nă cau, lơh geh jơnau kờñ ngan ngồn tàm rài kis.

Jăt Kơrnoat, ală thôn geh dờp là thôn kal ke uă ngan gơwèt tiah làng bol jơi bơtiàn kòn cau dùl êt nă cau mờ tiah kơh bơnơm pal là thôn geh khà hìu bơnhă jơi bơtiàn kòn cau dùl êt nă cau tàm kờp jơh khà hìu bơnhă làng bol ơm kis kơ̆ kơl jăp gơ gơs ƀòn bơh 15% rlau hơđang mờ lơh geh dùl tàm bàr broă jàu: Geh khà hìu bơnhă rƀah bơh 20% rlau hơđang (mìng is gơwèt mờ tiah ring dà dờng Cửu Long geh khà hìu bơnhă rƀah bơh 15% rlau hơđang halà geh rlau 30 hìu bơnhă rƀah là hìu bơnhă jơi bơtiàn kòn cau dùl êt nă cau rƀah); Geh khà hìu bơnhă rƀah bơh 15% tus hơđơm 20% (mìng is tiah ring dà dờng Cửu Long geh khà hìu bơnhă rƀah bơh 12% tus hơđơm 15%).

Gơwèt mờ jơnau dơ̆ 2, pal lơh geh dùl tàm pe broă jàu (geh rlau 60% khà hìu bơnhă rƀah là hìu bơnhă jơi bơtiàn kòn cau dùl êt nă cau tàm kờp jơh khà hìu bơnhă rƀah bơh thôn dê; ờ hềt geh gùng lòt bơh thôn tus tiah tờm xã halà geh gùng mơya lòt rê kal ke ngan, ngan là kàl mìu; ờ hềt geh gùng che đèng dà lơgar halà neh geh mơya rlau 30% khà hìu bơnhă ờ hềt geh ngui gùng che đèng dà lơgar dê).

Broă tam pà mờ gĭt nền thôn kal ke uă ngan jăt bồ tơngoh bơtàu tơnguh là bơnàng jă đal gĭt nền cau, ù tiah nàng lam lơh jăt ală broă lơh, broă dong kờl jơi bơtiàn kòn cau bơh Đảng mờ Dà lơgar dê jăt tơl tŭ tơngai, sền gàr dipal mờ bơta geh ngan. Jăt tàm bơta hơ̆, ală ƀộ, gah sơnah lơh broă mờ ală tiah lam lơh jăt geh cồng nha jơnau kờñ gơmù rƀah kơ̆ kơl jăp tàm ù tiah “ờ hềt jơh rƀah” geh bơta lơh sa- mpồl bơtiàn kal ke uă ngan.

Ai lơh pơnyơu bơh càr Thái Nguyên. Jăt sră cih mat kĭ ring bal thôn kal ke uă ngan tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021- 2025, Thái Nguyên geh 50 thôn kal ke uă ngan gơwèt ù tiah 22 xã bơh 5 kơnhoàl dê, tàm hơ̆ geh: Võ Nhai, Định Hoá, Đồng Hỷ, Phú Lương, Phú Bình. Tàm khà ală xã, thôn, ƀòn klàs bơh sră cih mat kal ke uă ngan bơh càr Thái Nguyên dê, geh uă tiah neh jơh lơh sir broă lơh bơ̆t bơtàu ƀòn lơgar pa. Bơta do lơh geh là kơnờm bơh bơta pơgồp bal ngac ngar ală bơta pràn, priă jền bơcri ai lài ai ală tiah do in, tàm hơ̆ pal kờp tus ală broă lơh bơ̆t bơtàu ƀòn lơgar pa, broă lơh 135, rơndăp broă lơh 2037, bơh hơ̆ neh tam gơl tơl làm lơh sa- mpồl bơtiàn tiah jơi bơtiàn kòn cau tiah kơh bơnơm, tam gơl bồ tơngoh kơlôi sơnơng bơh gơnoar ătbồ xã dê, kung bè làng bol dê. Ồng Nguyễn Thái Nam- Kuang ătbồ Ban Jơi bơtiàn kòn cau càr Thái Nguyên, pà gĭt: Mờ nùs nhơm jơh nùs lơh ngan uă bơh kấp ủy gơnoar ătbồ tiah do dê, tus nam 2025, bol he geh gơmù nggùl khà xã kal ke uă ngan mờ lơh ngan tus nam 2030, Thái Nguyên geh ờ gam tiah ƀòn lơgar kal ke uă ngan.

Jơnau kờñ ờ gam ƀòn lơgar kal ke uă ngan là dùl kơnòl broă tờm tàm broă lơh dong kờl jơi bơtiàn kòn cau kung bè tàm broă lơh jăt loh làng Kơrnoat Pơrjum dờng Đảng ƀộ càr Thái Nguyên bơh tơngai lơh broă pa dê. Khà thôn, xã lik bơh sră cih mat kal ke uă ngan tàm ù tiah càr Thái Nguyên dê gơmù tĕ ờ gŏ di mìng là dùl tềl lời wơl tàm lơh sa- mpồl bơtiàn mờ gam là bơnàng jă nàng rơndăp lơh mờ lam lơh ală broă lơh dong kờl jơi bơtiàn kòn cau tàm tơngai pơn jăt tai.

Ồng Đỗ Danh Huân- Phó Chủ tịch Ủy ban Nhân dân kơnhoàl Đồng Hỷ, càr Thái Nguyên pà gĭt bè broă lơh bơh tiah he dê bè do: Bol añ tơrgùm tàm bơta lơh tam gơl bơta gĭt wă bơh làng bol dê, bè broă tơn jơh jơgloh tơrmù rƀah, tơnguh uă rài kis bơh làng bol dê, pơgồp bal niam ală bơnah priă mờ mpồl bơtiàn lơh bal nàng lơh jăt broă lơh tơn jơh jơgloh tơrmù rƀah.

Jăt tàm jơnau yal bơh ală tiah dê bè cồng nha tam pà mờ gĭt nền tiah làng bol jơi bơtiàn kòn cau dùl êt nă cau mờ tiah kơh bơnơm jăt broă jàu geh cih tàm Kơrnoat sồ 33 nam 2020 bơh Thủ tướng Chính phủ dê, Ủy ban Jơi bơtiàn kòn cau neh tơrgùm kờp sră cih mat thôn kal ke uă ngan nàng ai lơh jăt Kơrnoat kĭ ring bal lơh bơnàng jă rơndăp lơh, ngui mờ lam lơh jăt ală gùng dà broă lơh dong kờl geh gơrềng tàm tơngai bơh nam 2021- 2025.

Pa do, ngai 16/09/2021, Bộ trưởng- Kuang ătbồ Ủy ban Jơi bơtiàn kòn cau neh kĭ Kơrnoat sồ 612 kĭ ring bal sră cih măt 13 rbô 222 thôn kal ke uă ngan, tàm hơ̆ geh 11 rbô 179 thôn bơh xã tiah kal ke uă ngan; 736 thôn bơh xã kal ke; 1 rbô 184 thôn bơh xã tiah ờ huan kal ke dê mờ 123 thôn bơh ală xã geh thôn tàm tiah làng bol jơi bơtiàn kòn cau dùl êt nă cau mờ tiah kơh bơnơm tàm ù tiah 41 càr mờ ƀòn dờng tàm gùt lơgar. Tàm ală tŭ lam lơh jăt, dilah geh tam cah, tàm tơmŭt, tơn lời halà tam gơl măt, Ủy ban Nhân dân càr sồr ală sở, gah sơnah lơh broă geh gơnoar, kờp sền, đal gĭt nền jăt broă jàu mờ lơh sră nggal jăt jơnau cih tàm Kơrnoat sồ 33 nam 2020 bơh Thủ tướng Chính phủ dê kĭ ai lơh jăt tàm ngai 12/11/2020 mờ pơyua tus Ủy ban Jơi bơtiàn kòn cau in tơrgùm kờp, lùp sền nền wơl mờ geh kơrnoat lơh nền tam gơl, bơtơl. Kơrnoat do geh ai ngui kờp bơh ngai kĭ ai lơh jăt mờ ala Kơrnoat sồ 433 ngai 18/06/2021 bơh Bộ trưởng- Kuang ătbồ Ủy ban Jơi bơtiàn kòn cau dê bè Kĭ sền swì ring bal sră cih mat thôn kal ke uă ngan tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021- 2025.

Cau cih VOV4- Cau mblàng Lơ Mu K’Yến