VOV4.K’ho– Poh lài, ală tiah tàm gùt lơgar neh yal cồng nha dơ̆ tĕ khà kuang bàng Quốc hội khóa 15 mờ kuang bàng Hội đồng Nhân dân càr tơngai lơh broă bơh nam 2021 tus nam 2026. Jat jơnau đơs bơh Chủ tịch Quốc hội ồng Vương Đình Huệ, cồng nha bal bơh gùt lơgar dê geh 99,57% cau tĕ khà lòt đùh sră pồ, jơnhua rlau mờ dơ̆ tĕ khà 5 nam lài. Dơ̆ tĕ khà dơ̆ do geh cồng nha niam ngan, bulah tàm tơngai kòp Covid-19 gơlik geh kal ke.

Tàm Kon Tum, tàm 10 nă cau tơlik mat tĕ khà, cau tĕ khà càr Kon Tum neh rơ wah pồ 6 nă cau lơh kuang bàng Quốc hội khóa 15, mờ khà bơh 82,97% tus 93,39%. Mùl màl, hơ̆ là: ồng Nguyễn Văn Hùng, Ủy viên Ban chấp hành Đảng dà lơgar, Bộ trưởng Bộ Văn hóa, Thể thao mờ Du lịch; mò Trần Thị Thu Phước (kòn cau Sơdàng) Phó Kuang atbồ Kuang àng càr Kon Tum; ồng Tô Văn Tám, Phó Kuang atbồ mpồl lơh broă sùm Mpồl kuang bàng Quốc hội càr Kon Tum, Ủy ban Ủy ban Adat boh lam Quốc hội; ồng Phạm Đình Thanh, kuang atbồ Sở Tư pháp càr Kon Tum; ồng U Huấn, Ủy viên rơcang lài Đảng dà lơgar, Ủy viên Ban Thường vụ Tỉnh ủy, Kuang atbồ Ban Nội chính Tỉnh ủy Kon Tum; mò Nàng Xô Vi (kòn cau B’râu), lơh broă tàm Hìu bơsram kấp 3 kòn cau càr tàm kơnhoàl Ia H’Drai. Cau tĕ khà càr Kon Tum kung neh pồ rơ wah 51 nă kuang bàng Hội đồng Nhân dân càr, 316 nă kuang bàng Hội đồng Nhân dân kấp kơnhoàl mờ 2 rbô 164 nă kuang bàng Hội đồng Nhân dân kấp xã. Ờ geh mpồl tĕ khà lơi pal lòt pồ wơl.

Jat jơnau yal bơh Ủy ban tĕ khà càr Gia Lai dê, tàm càr geh rlau 1 tơlak nă cau tĕ khà lòt đùh sră (geh 99,86%). Cồng nha dơ̆ tĕ khà gàr di bè khà, rơndap tap sèng, mpồl cau, bồ tơngoh bơsram sră. Mùl màl geh 8 tàm 14 nă cau tơlik mat tĕ khà geh pồ lơh kuang bàng Quốc hội khóa 15, 71 tàm 119 nă cau tơlik mat tĕ khà geh pồ lơh kuang bàng Hội đồng Nhân dân càr, 571 tàm khà 951 nă cau tơlik mat tĕ khà geh pồ lơh kuang bàng Hội đồng Nhân dân kấp kơnhoàl mờ 4 rbô 997 tàm khà 8 rbô 455 nă cau tơlik mat tĕ khà geh pồ lơh kuang bàng Hội đồng Nhân dân kấp xã.

Chủ tịch Quốc hội ồng Vương Đình Huệ đơs nền dơ̆ tĕ khà geh cồng nha niam

Tàm càr Dak Lak, neh pồ tơl kuang bàng Quốc hội, 75 nă kuang bàng Hội đồng Nhân dân càr, 513 tàm khà 514 nă cau tơlik mat tĕ khà kuang bàng Hội đồng Nhân dân kấp kơnhoàl mờ 4 rbô 628 tàm 4 rbô 658 nă cau tơlik mat tĕ khà kuang bàng kấp xã. Mpồl tĕ khà sồ 9, 10, 11 (xã Cư San, kơnhoàl M’Drak) pal bơyai lơh tĕ khà wơl kuang bàng Hội đồng Nhân dân xã tơngai lơh broă bơh nam 2021 tus nam 2026, tài geh hơđơm 50% kờp jơh khà cau tĕ khà lòt đùh sră pồ. Broă bơyai lơh tĕ khà wơl tàm 3 mpồl tĕ khà do geh Ủy ban tĕ khà càr Dak Lak lơh nền tàm ngai rlô, ngai 06/6. Đơs bè cồng nha bơyai lơh dơ̆ tĕ khà Kuang bàng Quốc hội khóa 15 mờ Kuang bàng Hội đồng Nhân dân càr tơngai lơh broă bơh nam 2021 tus nam 2026, ồng Y Biêr Niê, Chủ tịch Ủy ban tĕ khà càr Dak Lak pà git: “Mờ bơta lơh ngan bơh jơh mpồl lơh broă chính trị bơh kấp càr tus kấp kơnhoàl broă lam lơh tĕ khà neh lơh geh cồng nha niam bơnĕ. Mờ khà cau tĕ khà lòt đùh sră pồ geh 99,76% gơtùi đơs do là khà jơnhua ngan rlau jơh bơh lài tus tŭ do. Cồng nha tĕ khà neh pồ tơl bè khà 9 nă kuang bàng Quốc hội, bè kuang bàng Hội đồng Nhân dân càr neh pồ tơl 75 nă kuang bàng, gàr tơl jat rơndap tap sèng bè khà”.

Jat cồng nha jơnau yal bơh Ủy ban tĕ khà càr Dak Nông dê, dơ̆ tĕ khà kuang bàng Quốc hội khóa 15 mờ Kuang bàng Hội đồng Nhân dân ală kấp tơngai lơh broă bơh nam 2021 tus nam 2026 tàm càr lơh geh cồng nha niam bơnĕ, mờ khà 99,77% cau tĕ khà lòt pồ. Bal mờ broă pồ tơl 6 nă kuang bàng Quốc hội khóa 15, 52 nă kuang bàng Hội đồng Nhân dân càr, dơ̆ tĕ khà kung gàr tơl bè khà, rơndap tap sèng, mpồl cau, bồ tơngoh bơsram sră gơ wèt tus mờ kuang bàng Hội đồng Nhân dân kấp kơnhoàl mờ kấp xã. Ndrờm bè hơ̆ sơl tàm Lâm Đồng, cau tĕ khà neh lơh jat gơnoar kuơ mờ kơnòl he dê nàng kờñ sac rơ wah ală cau ala mat geh nùs nhơm, geh bơngă pin dờn, geh gơnoar broă, geh pràn jak, ai tơnggŏ tơl làm, song dơpă nùs nhơm, bơta kơp kờñ bơh làng bol dê. Mùl màl, neh pồ tơl 7 nă kuang bàng Quốc hội khóa 15, 66 nă kuang bàng Hội đồng Nhân dân kấp càr, 396 nă kuang bàng Hội đồng Nhân dân kấp kơnhoàl mờ 3 rbô 350 nă kuang bàng Hội đồng Nhân dân kấp xã.

Cau tĕ khà Tây Nguyên tàm ngai chờ tĕ khà

Đơs tàm dơ̆ pơrjum dơ̆ 56 bơh Ủy ban Thường vụ Quốc hội dê pa do, Chủ tịch Quốc hội ồng Vương Đình Huệ pà git, dơ̆ tĕ khà kuang bàng Quốc hội khóa 15 mờ kuang bàng Hội đồng Nhân dân ală kấp tơngai lơh broă bơh nam 2021 tus nam 2026, gùt lơgar geh 99,57% cau tĕ khà lòt đùh sră pồ, jơnhua rlau mờ dơ̆ tĕ khà 5 nam lài. Dơ̆ tĕ khà do geh cồng nha ngan, bulah tàm bơta kòp Covid-19 gơlik geh kal ke. Gùt lơgar neh pồ tơl 500 nă kuang bàng Quốc hội. Neh pồ tơl kuang bàng Hội đồng Nhân dân kấp xã, kơnhoàl, càr.

Đơs nền dơ̆ tĕ khà lơh geh cồng nha niam, wil tơl, Chủ tịch Quốc hội, Chủ tịch Mpồl duh broă tĕ khà dà lơgar ồng Vương Đình Huệ sồr Cơldŭ lơh broă Mpồl duh broă tĕ khà dà lơgar mhar lơh gơs jơnau yal mhar bè cồng nha tĕ khà pơyua kuang đơng lam bồ Đảng, dà lơgar mờ Ủy ban Thường vụ Quốc hội in. Ai ồng Bùi Văn Cường, Cau gơnoar cih Quốc hội, Kuang atbồ cơldŭ lơh broă Quốc hội, Kuang atbồ cơldŭ lơh broă Mpồl duh broă tĕ khà dà lơgar den pà git dơ̆ tĕ khà lơh geh cồng nha niam mờ geh bơta kuơ dờng màng ngan. Cau tĕ khà pơn jat tai sền gròi broă lơh bơh ală kuang bàng Quốc hội dê tàm jơh gùt tơngai lơh broă: “Dơ̆ tĕ khà geh jơnau gơtha dờng màng ngan. Pồ ală cau jak ngan rlau jơh, ala mat ai bơta kơp kờñ bơh làng bol dê in. Bơh broă pồ ală cau ala mat he in, den tàm kơnòl broă bơh cau ala mat làng bol dê là đềt mềr mờ làng bol, iat, cih dờp jơnau đơs bơh làng bol dê tàm tŭ lơh jat kơnòl broă. Làng bol gam sền gròi kuang bàng lơh jat jơnau hơ pơrgon lam lơh kơnòl broă he dê. Dilah kuang bàng ờ lơh jat niam, ờ lơh jơh nùs den làng bol geh jơnau đơs tus mờ ală anih lơh broă geh gơnoar sền sơ wì”.

Jat jơnau cih bơh Adat tĕ khà kuang bàng Quốc hội mờ kuang bàng Hội đồng Nhân dân càr dê, Mpồl duh broă tĕ khà jat tàm sră cih tơn jơh dơ̆ tĕ khà tàm gùt lơgar yal cồng nha tĕ khà mờ mat ală cau geh pồ lơh kuang bàng Quốc hội lơyài ngan rlau jơh là 20 ngai tơnơ̆ ngai tĕ khà (hơ̆ là lơyài ngan rlau jơh là ngai 12/6/2021).

 Cau mblàng K’Duẩn