VOV4.K’ho- Bộ Lao động, Thương binh mờ Xã hội pơgồp bal mờ Kes priă Kơnòm dềt Liên hợp quốc (UNICEF) bơyai lơh Pơrjum pờ tơlik tơn tàm internet “Sền swì mờ lam lơh bàr pe broă lơh sền gàr dong kờl bơto bơtê kơnòm dềt tàm tơngai kòp dờng Covid-19”. Pơrjum geh bơta tus bal bơh ală ƀộ, gah sơnah lơh broă, mpồl cau mờ 20 càr, ƀòn dờng gam halà neh là tiah bơtờp uă ngan kòp Covid-19.

Jăt jơnau yal bơh ală tiah dê, kờp tus ngai 31/8, jơh gùt lơgar geh rlau 11 rbô 800 nă kơnòm dềt là F0; khà kơnòm dềt là F1 là rlau 27 rbô 300 nă. Tàm bơta ơnàng rlau, kơnòm dềt gơtìp gơrềng kơn jơ̆ ngan jơh bal bè nùs nhơm mờ phan bơna, lơh ală jơnau kờñ bơtàu tơnguh tơl làm kơnòm dềt di mơ tơngai mờ jŏ tơngai kung gam gơtìp bơta lòng sơl tài bơh kòp dờng Covid-19. Den tàng bè hơ̆, ală kơnòl broă, broă lơh, tàm hơ̆ geh mpồl broă lơh nàng kờñ sền gàr dong kờl bơto bơtê kơnòm dềt kờñ pal geh lam lơh. Tàm pơrjum, uă ƀộ, gah lơh broă mờ ală tiah dan mờ Chính phủ bal mờ broă dong kờl sơm kòp, dong kờl kơnòm dềt F0, F1 pal gờñ ai lài cĭt vaccine ai kơnòm dềt in.

Cau mblàng Lơ Mu K’Yến