VOV4.K’ho - Mờ gùng dà broă lơh “Ờ lời cau lơi gơtìp sơbì is hờ tơnơ̆” tàm tơngai pa do, tàm hơ̆ uă ngan là tàm tơngai kòp Covid gơtờp tàm uă càr, ƀòn dờng, nùs nhơm “Nha ngan glòm nha sèt” sơlơ geh tơnguh pràn, git nđờ tơlăk pò phan bơh ală cau niam nùs, geh tŭ bơh ală cau ờ hoan gơtìp kal ke rơlao neh geh jun tus uă hìu rơƀah, hìu ndrờm mờ rơƀah mờ cau ờ pràn tàm mpồl bơtiàn, ală cau ờ gơwèt mờ broă geh dờp broă dong kờl, lơh ală cau do ram nùs.

Lơh broă ndang nàng geh priă ngui tàm rài kis, mờ pal sền gàr bơklao gơtìp kòp kòl bơcah gùng mhàm tơngoh, mò Phạm Thị Huệ, kis tàm sơnah ƀòn 7, quận 4, ƀòn dờng Hồ Chí Minh kơ̆p kơnờm jơh tàm broă ơnòng lòt tăc hủ tiếu. Tơngai tam cah is mpồl bơtiàn tài bơh kòp Covid-19 jŏ, lơh hìu nhă mò gơtìp kal ke uă ngan. Di lah ờ geh broă dong kờl bơh gơnoar atbồ ƀòn lơgar bal mờ ală mpồl cau lơh broă nùs nhơm dong kờl, hìu nhă mò kal ke ngan kờñ sơrlèt mờ tơngai tam cah is. “Añ pal “tăc” hìu 10 tơlăk nàng geh priă ngui tàm rài kis, di lah ờ den kung ờ geh priă. Rơcang tơm jơh ală bơta hơ̆ sồng mìng gam 500 rơbô đong. Kòp gơtờp jŏ kung pal lơh ngan nàng sơrlèt. Kung kơnờm mờ gơnoar atbồ tàm do, kuang àng bal mờ Ủy ban, ală mpồl lơh broă dong kờl añ geh phe sa, dà hùc, priă bal mờ phan tai, añ ưn ngài uă ngan”.

Mờ gùng dà broă lơh “Ờ lời hìu kal ke lơi gơtìp jơgloh ha là ờ tơl dơ̆ sào sa tài bơh kòp Covid-19”, ală pò phan là phan ngui sa bè: phe, sơdàng, dà màn, dà tơngi... geh ală mpồl lơh broă, ală cấp, mpồl jào tus tềng tê cau rơƀah ờ mìng tàm ƀòn dờng Hồ Chí Minh mờ uă tiah tàm gùt lơgar in. Ală hìu kal ke ờ gơwèt cau geh dờp bơh khà priă dong kờl 26 rơbô tơmàn jăt Nghị quyết sồ 68 bơh Chính phủ kung geh dờp uă phan pà geh kuơ. Ồng Lê Đình Nhật, kis tàm kơnhoàl Thường Tín, do là dùl tàm ală hìu rơƀah tàm ƀòn dờng Hà Nội đơs: “Tềng đăp mờ bơta kòp Covid, Đảng, Dà lơgar neh sền gròi tus mờ hìu rơƀah bol añ. Bŭ lah uă, ờ uă den do kung là phan pà geh mùl màl ngan”.

Nam 2020 mờ nam 2021, bal mờ uă bơta tơlòng glar bòl, tŭ làng bol gùt lơgar pal lơh ngan tam dră mờ kòp Covid-19 mờ pal lơh ngan tam dră mờ rềs àr bơh trồ tiah, dà tih dà cò gơtìp aniai, rài kis làng bol neh gơtìp kal ke den sơlơ kal ke rơlao. Nùs nhơm dong kờl bal, tam pà bal geh lơh, tus bal dong kờl cau rơƀah, làng bol tàm tiah gơtìp dà tih dà cò, bơhiàn “Dong kờl bal”, “Nha ngan glòm nha sèt” geh gơguh pràn tàm plai nùs cau lơgar Việt Nam. Bơdìh mờ broă sền gròi bơh Đảng dà lơgar, Quốc hội, Chính phủ, cấp ủy Đảng, gơnoar atbồ ală càr, ƀòn dờng, he kung dờp ală broă lơh niam bơnĕ bơh ală anih lơh broă, mpồl lơh broă, cau dùl nă să, ală mpồl lơh sa kă bro, bŭ lah gam kal ke tài bơh kòp Covid-19 lơh gơtìp, mơya gam pơn jăt tai kờñ bal mờ cau rơƀah mờ làng bol gơtìp rềs àr bơh trồ tiah, gơtìp dà tih dà cò lơh aniai.

Lŏ Thành Thu Lương, Kuang atbồ mpồl lơh broă nùs nhơm dong kờl Mùa Thu mờ ală cau bơyô là dùl tàm ală mpồl lơh broă nùs nhơm dong kờl, ờ mìng hòi jà ală cau geh nùs nhơm niam dong kờl ală pò phan ai cau rơƀah, cau gơtìp kòp jroă in, mờ gam tăc phan geh lơh bơh làng bol lơh broă sa ai làng bol lơh broă sa in, tă priă lơh kes priă nàng lơh hìu pleh mờ dà tih, lơh hìu bơsram tàm tiah kơh bơnơm... Ală broă lơh bơh ală mpồl kung neh mờ gam pơgồp bal uă bơta pràn nàng dong kờl cau rơƀah, cau gơtìp ờ pràn mờ nùs nhơm tờm ngan: “Kòp gơtờp gơbàn den ală cau kung kơ̆p kờñ geh pơgồp dùl bơnah lơi nàng dong kờl mpồl bơtiàn. Tơnơ̆ mờ kòp gơtờp do den di gơlan là ală cau kung geh ai jơnau bơsram broă mờng chài ai rài kis să tờm in. Añ kung gŏ là ală cau tàm sơnđàc bal uă rơlao, pơgồp bal rơlao tai mờ tus bal nàng drơng gàr ai mpồl bơtiàn in rơlao mờ lài uă ngan”.

Mờ jơnau kờñ “Ờ geh làng bol lơi gơtìp sơbì is hờ tơnơ̆”, tơngai pa do, uă tiah tàm gùt lơgar, tàm hơ̆ uă ngan là ală càr, ƀòn dờng gơtìp gơrềng uă ngan bơh kòp Covid-19 bè ƀòn dờng Hồ Chí Minh, càr Bình Dương, Đồng Nai mờ ală càr gơwèt tàm tiah đah jum măt tơngai lik dà lơgar mờ tiah ring dà dờng Cửu Long neh geh uă broă lơh mùl màl drơng gàr ai cau rơƀah in. Bơdìh mờ ală broă dong kờl mhar bè broă lơh jăt Nghị quyết sồ 68 mờ Khà dong kờl tus 26 rơbô tơmàn đong ha là pa do ngan là khà priă dong kờl 38 rơbô tơmàn đong tă bơh Kes priă Bảo hiểm roh broă lơh dong kờl cau lơh broă mờ mpồl lơh sa kă bro gơtìp kal ke tài bơh kòp Covid-19. Gơnoar atbồ ală cấp ală càr, ƀòn dờng neh tă kes priă ƀòn lơgar geh uă khà priă dong kờl làng bol nàng sơrlèt mờ kal ke. Bơdìh hơ̆ tai, Hội Chữ thập đỏ, Mpồl cau ùr, Đoàn ơruh pơnu, Liên đoàn lao động, ală mpồl lơh broă mpồl bơtiàn,... ndrờm geh ală broă lơh mùl màl dong kờl ală cau kal ke, ờ pràn, cau lơh broă tàm ală tiah hìu ơm ơpah gơtìp roh broă lơh. Mò Trương Thị Ngọc Ánh, Phó Chủ tịch Ủy ban Mặt trận dà lơgar Việt Nam pà git: “Gùng dà broă lơh bol añ hòi jà, dong kờl ai cau rơƀah nam do ờ mìng là pal dong kờl tă tàm Kes priă tài cau rơƀah mờ gơtùi tă mờ priă, mờ phan, cau lơi geh phan lơi den dong kờl phan hơ̆, tam pà bal ai ală tiah gam gơtìp kal ke tài bơh kòp covid-19 gơtờp mờ lơh jăt jơnau kờñ là bañ lời ală cau rơƀah lơi, cau gơtìp kal ke lơi mờ ờ geh sền gròi dong kờl. Hơ̆ kung là he pơgồp bal nàng lơh ram nùs ală hìu nhă cau gơtìp kal ke geh ală bơta pràn, geh nùs nhơm pin dờn nàng sơrlèt tàm rài kis”.

Bộ trưởng Bộ Lao động-Thương binh mờ Xã hội ồng Đào Ngọc Dung kung đơs, broă lơh tơmù rơƀah tàm lơgar he neh geh ală jơnau kờñ niam, mơya gam uă kal ke, glar bòl, tàm hơ̆ bơta tờm là “tờm rơƀah” tàm tiah làng bol kòn cau mờ hoàc huơr tơnơ̆ mờ kòp Covid-19, uă cau gơtìp tàm bơta rơƀah mờ rơƀah wơl. Bộ Lao động-Thương binh mờ Xã hội pơn jăt tai bal mờ Mặt trận dà lơgar ală cấp, ală Bộ, gah lơh broă dà lơgar gơrềng bal lơh jăt ală broă lơh nàng drơng gàr cau rơƀah in: “Añ đơs là jăt Chỉ thị sồ 05, kờñ klàs mờ rơƀah mờ pơn jăt tai broă lơh do den Dà lơgar gam pal geh gơnoar lơh tờm. Dơ̆ bàr là tơrgùm dong kờl nàng lam sồr broă brồ guh bơh cau rơƀah, ờ gơn kơnờm. Tàm broă lơh do bơh bol añ ai jơnau kờñ là tơmù uă ngan jơnau pà gời mờ tam gơl pràn tus mờ broă lơh là dong kờl geh bơta mờ ai càn, geh bal ngân hàng chính sách kung lơh jăt gùng dà do sơl. Dơ̆ pe là tơnguh bơta pràn bơh jơh ală mpồl lơh broă chính trị, tam pà broă bơcri kes priă kung bè hòi jà mpồl bơtiàn. Tơngu me pa geh ai uă rơlao, lơh ngan tus lồi tơngai lơh broă lơh geh 75% khà rài kis ờ uă ngan ai cau rơƀah in”.

Gơtùi đơs, nùs nhơm dong kờl bal “Nha ngan dong kờl nha sèt” sùm geh gơguh tàm ală bơta. Broă lơh tài cau rơƀah geh bơyai lơh ờ mìng tàm nhai 10 mờ gam geh lơh sùm tàm nam, gàr niam jăt jơnau kờñ “Ờ geh cau lơi gơtìp sơbì is hờ tơnơ̆”.

Cau mblàng Ndong Brawl