VOV4.K’ho– Jat kờp sền bơh Ủy ƀan Zân tộk dê, khà hìu bơnhă rƀah tàm tiah jơi bơtiàn kòn cau dùl êt nă cau mờ tiah kơh bơnơm uă rlau 2 dơ̆ mờ nggùl pơndrờm mờ khà kờp bal bơh gùt lơgar dê. Priă lơh geh kờp bal tàm dùl nă cau bơh làng bol jơi bơtiàn kòn cau dùl êt nă cau dê kung mìng ndrờm 1/3 pơndrờm mờ khà kờp bal bơh gùt lơgar dê. Dùl tàm ală broă lơh geh ai tơlik nàng bơsong kal ke tàm tiah jơi bơtiàn kòn cau dùl êt nă cau, hơ̆ là broă gàr bơta pràn lam lơh ală broă lơh bơcri priă ai tiah krơi is do in.

Lam lơh jat ală gùng dà, broă lơh bơh Đảng mờ dà lơgar dê bè dong kờl, bơcri priă ai tiah làng bol jơi bơtiàn kòn cau dùl êt nă cau, tiah kơh bơnơm in, làng bol jơi bơtiàn kòn cau dùl êt nă cau gam geh dờp ală mpồl broă lơh dong kờl kòn cau bè broă lơh krơi is jat jơi bơtiàn kòn cau mờ mpồl jơi bơtiàn kòn cau; broă lơh bơtàu tơnguh lơh sa- mpồl bơtiàn jat bă tiah; broă lơh bơtàu tơnguh lơh sa- mpồl bơtiàn jat gah broă lơh. Tàm hơ̆ geh 2 broă lơh jơnau kờñ dà lơgar (Broă lơh jơnau kờñ dà lơgar tơrmù rƀah kơ̆ kơljap mờ Broă lơh bơt bơtàu ƀòn lơgar pa) mờ ală broă lơh geh jơnau kờñ. Nàng lam lơh jat, ală kấp, ală gah broă lơh neh ai tơlik uă sră nggal đơng lam, pơlam mờ lam lơh, lơh geh ală cồng nha niam ngan, bơh hơ̆ pơgồp bơnah tơnguh bồ tơnguh git wă làng bol dê, bơtàu tơnguh mpồl cau lơh broă, bơto pơlam cau jak chài, kung bè bơtàu tơnguh lơh sa- mpồl bơtiàn, sền gàr kơ̆ lơngap lơngai cíñ trị, ờdo ờdă mpồl bơtiàn tàm ù tiah làng bol jơi bơtiàn kòn cau dùl êt nă cau. Rài kis phan bơna, nùs nhơm bơh làng bol kòn cau de,e kuơmàng là jơi bơtiàn kòn cau dùl êt ngan cau ngai sơlơ geh bơtàu tơnguh.

Bulah bè hơ̆, bơta tờm bơh broă lơh sa, hơ̆ là broă lơh gơlik priă jền bơh làng bol dê nàng wèt tus lik klàs rƀah kơ̆ kơljap den ờ hềt geh bơcri priă dipal. Bè hơ̆ den tàng, khà gơbàn rƀah wơl tàm tiah jơi bơtiàn kòn cau dùl êt nă cau sùm tàm khà jơnhua ngan. Ờ geh jơnau pơlam, ờ geh broă dong kờl lơh sa, ală hìu bơnhă jơi bơtiàn kòn cau dùl êt nă cau kal ke kung gam pal kơlôi rơcang priă càn. Tŭ do, bơta jơgloh gơlik geh sùm neh gơmù mơua nàng gơtùi rơcang is kòi phe, lơh sa is den ndrờm bè gam là jơnau kal ke ngan. Mò Hồ Thị Minh, Phó Kuang atbồ Ƀan Zân tộk càr Quảng Trị đơs là, broă lơh là bơh bơta tam gơl tàm jơnau git wă làng bol dê: “Tŭ do là pal tam gơl jơh ală bơta, tam gơl jơnau git wă, tam gơl nùs nhơm. Ai dilah pà làng bol in là ờ gơtùi. Kuơmàng tŭ do là he pal git rơ wah chi tam, phan ròng, sền ù he dê gơ dờp mờ bơta chi tam lơi.”

Ồng Quàng Văn Hương, Phó Củ tịc Hội đồng Zân tộk bơh Quôk hội dê đơs là, ală tiah pal geh bơto pơlam yă dơ̆, tài bơh làng bol jơi bơtiàn kòn cau dùl êt nă cau, geh bal dùl jơnau git wă, kung bè kàr hơ̆ priă mơya pal ngui bè lơi nàng gơ in dipal mờ bơta geh ngan. Geh tŭ, he gơtùi lam khi lòt bơsram tàm lŏ sre, tàm àr sre sền ală broă lơh ngan ngồn nàng pơlam jơnau git wă ai làng bol in, ờ di là sùm tơrgùm tàm hìu pơrjum: “Broă lơh dong kờl bơtàu tơnguh lơh sa suơn sre, làng bol neh mờng quèng mờ broă lơh sa yau, lơh broă ờs mờng, nàng bơtàu tơnguh jat broă lơh pa den pal bơto pơlam tơn. Làng bol kờñ geh tàm jàu, broă lòt rê gam kal ke, jơnau git wă den ờ huan uă den tàng pal lam lơh hời rơ hời. Làng bol kờñ tus bal bơsram mơya ờ gơtùi. Tài bol he ờ hềt tơnguh jơh bơta pràn tàm dơlam is gơ dê. Den tàng pal geh broă lơh ding kờl di, hơ̆ sồng gơtùi hòi jà bơta pràn bơh làng bol dê, bơh bơta kơp gơn hơ̆ là tài bơh kơ cế, broă lơh bol he dê ờ hềt loh làng.”

Tơngai lài, Hội đồng Zân tộc bơh Quôk hội dê neh dan Cíñ phủ lam lơh broă rơndap lơh tơnguh priă ai càn bơh Ngân hàng Cíñ sác xã hội; tơnguh khà ai càn bơh 8 tơlak đong tàm dùl hìu bơnhă gơguh tus bơh 15 tus 20 tơlak đong; tơnguh khà dong kờl tơn ù lơh sa, dong kờl tam gơl broă lơh bơh 15 tơlak gơguh tus bơh 20 tus 30 tơlak đong; rề ơnàng ù tiah lam lơh bơdìh mờ tiah kal ke, tiah uă kal ke (jat Kơrnuat sồ 54). Bơdìh hơ̆ tai, tơnguh tai jơngkah dồs ai càn priă hìu bơnhă rƀah in, rề ơnàng cau geh càn riă bơh Ngân hàng cíñ sác xã hội dê gơ wèt tus mờ hìu bơnhă ndrờm bè cau rƀah hơ̆ sồng gơtùi lik klàs rƀah nàng ală cau do in gơtùi lik klàs rƀah kơ̆ kơljap.

Bè đah anih lơh broă dà lơgar, Ủy ƀan Zân tộk kung bơt bơtàu broă lơh krơi is jat gùng dà tơrgùm jơh ală broă lơh neh jơh tơngai lam lơh, kờp sền wơl ală cau geh dờp broă dong kờl nàng ờ gơtìp bơta tàm rơndil. Ală Ƀộ, gah broă lơh tŭ bơt bơtàu ală broă lơh kờñ chồl pràn bơta bơtàu tơnguh lơh sa mpồl bơtiàn tàm tiah jơi bơtiàn kòn cau pal gàr niam bơta tus bal pơgồp bal mờ gròi sền bơh Ủy ban Zân tộk dê. Broă tam pà bơta pràn ai ală tiah in pal ai lài tiah jơi bơtiàn kòn cau dùl êt nă cau mờ tiah kal ke geh khà hìu bơnhă rƀah gam uă in, rơndap ai priă jền dipal, ờ lời làng bol rƀah pal tă pơgồp.

 Cau mblàng K’Duẩn