VOV4.K’ho- Tŭ do, bulah neh geh bơta ring bal bè khà kuang bàng Quốc hội là cau jơi bơtiàn kòn cau dùl êt nă cau là 18%, mơya tàm bơta geh ngan sền wơl bơh ală tơngai lơh kơnòl broă lài ndrờm ờ tơl pơndrờm mờ broă jàu geh ai tơlik. Tơngai lơh kơnòl broă khoá XIV, khà kuang bàng Quốc hội là cau jơi bơtiàn kòn cau dùl êt nă cau mìng geh 17,3% lơm, ndrờm mờ 86 nă cau, pơndrờm mờ kờp dŭ lài bơh sơnrờp ờ tơl 4 nă...Bơta do gơlik jơnau lùp, là jơnau gơbàn là bơh lơi mờ lơh bè lơi nàng gơtùi gàr tơl khà ai tơngai lơh kơnòl broă tus in. Do là dùl broă kung kờñ pal sền đơs loh bơh uă gah.

Jăt khà tơrgùm kờp bơh Mpồl duh broă Jơi bơtiàn kòn cau Quốc hội dê, khà kuang bàng là cau jơi bơtiàn kòn cau dùl êt nă cau lơh broă tàm Quốc hội gơguh tai jăt tơl khoá. Uă khoá rềp ndo, kuang bàng là cau jơi bơtiàn kòn cau dùl êt nă cau neh geh bơh 15 tus 18% pơndrờm mờ kờp jơh khà kuang bàng Quốc hội. Tàm hơ̆, Quốc hội khoá XIII geh 78 nă kuang bàng, geh tus 15,6% tàm kờp jơh khà 500 nă kuang bàng Quốc hội. Tơngai lơh kơnòl broă Quốc hội khoá XIV, kuang bàng Quốc hội là cau jơi bơtiàn kòn cau dùl êt nă cau là 86 nă, geh tus 17,3%.

Broă làng bol ală jơi bơtiàn kòn cau jơh nùs tus bal mờ pồ sac rwah geh ală kuang bàng Quốc hội ngan ngồn jak ngan, geh broă lơh jak, geh bơta jơh nùs mờ geh kơnòl neh pơgồp bơnah ờ dùl êt tàm cồng nha bơh Quốc hội dê, ngan là tàm broă lơh mờ lam lơh jăt niam ală gùng dà broă lơh jơi bơtiàn kòn cau bơh Đảng, Dà lơgar dê. Do là ală gùng dà broă lơh kuơmàng nàng kờñ dong kờl bơta bơtàu tơnguh mờ bơtàu tơnguh uă rài kis bơh làng bol dê tàm tiah kơh bơnơm, tiah làng bol jơi bơtiàn kòn cau dùl êt nă cau. Tài bơh kuang bàng là cau jơi bơtiàn kòn cau dùl êt nă cau hơ̆ ngan là ală cau gĭt wă loh làng ngan rlau jơh bè ală bơta gam gơkòl, ală kal ke tàm tiah he dê, ù tiah ơm kis bơh he dê bơh hơ̆ geh ală jơnau đơs jơnau dan di mờ bơta geh ngan.

Bơta do geh ồng Phạm Giáo, cau tĕ khà ơm tàm kơnhoàl Đức Phổ, càr Quảng Ngãi dê đơs: Ai tai kuang bàng ai tiah kal ke, tiah sar lơgar ngài, tiah jơi bơtiàn kòn cau dùl êt nă cau in den geh tơl bơta gĭt geh dipal rlau, wă wờng geh uă rlau tiah jơi bơtiàn kòn cau dùl êt nă cau, sùm là geh uă bơta kal ke, bồ tơngoh bơsram sră ờ huan uă, lơh sa gam kal ke. Den tàng bè hơ̆, sơlơ gĭt wă geh uă kal ke, wă wờng geh ală jơnau kơlôi sơnơng bơta kơ̆p kờñ bơh làng bol dê den geh cèng tus ai Quốc hội in nàng geh ală gùng dà broă lơh gơwèt mờ ală kơnhoàl ù tiah do, sền gàr bơtàu tơnguh uă rài kis bơh làng bol dê, bơsong ƀà ală kal ke bơh khi dê.

Cau lơi kung gĭt lơm là, broă kuang bàng là cau jơi bơtiàn kòn cau dùl êt nă cau lơh broă tàm ală anih lơh broă bơh Quốc hội dê mờ Hội đồng Nhân dân ală kấp dê den geh gĭt geh niam rlau ală broă tàm tiah he dê, nàng lơh bè lơi lơh geh khà 18% jăt broă jàu bơh Quốc hôị dê den do mùl màl là jơnau kal ke ngan. Tài bơh jăt ồng Quàng Văn Hương, Phó Chủ tịch Mpồl duh broă jơi bơtiàn kòn cau Quốc hội dê den jơnau bơh tài gơbàn ờ gơtùi pleh klàs den tàm tiah làng bol jơi bơtiàn kòn cau dùl êt nă cau mờ tiah kơh bơnơm là tiah kal ke ngan, bơta gĭt wă bơh làng bol dê mờ bơta jak chài bơtàu tơnguh ală jơi bơtiàn kòn cau dê den ờ ndrờm bal mờ gơ lơyah rlau uă ngan pơndrờm mờ khà kờp bal, ngan bơta do neh lơh gơrềng ờ dùl êt tus cồng nha tĕ khà, bơta săc rwah ală kuang bàng kung kal ke ngan sơl, halà tŭ neh rwah geh mơya ală cau tơlik măt tĕ khà gơlơh ờ lơh geh wơl di jơnau sồr, ờ hềt ngan ngồn pơnrơ ngan, halà geh dùl broă tai là broă “àñ ơnòng rơndăp tăp sèng”. Ồng Quàng Văn Hương, đơs: Cau tơlik măt tĕ khà geh tŭ là àñ ơnòng bàr pe bơta rơndăp tăp sèng, jơi bơtiàn kòn cau, cau kơnòm să, cau bơdìh Đảng mờ cau ùr tai. Loh làng dùl nă cau mờ lơh geh 4 jơnau sồr hơ̆, cau lơh geh jơnau sồr hơ̆ nàng cau tus bal, mơya bơta sơlơ̆u wơl là bơta àñ ơnòng kơn jơ̆ ngan. Jòi geh dùl nă cau bè hơ̆ gơ là kal ke ngan. Tài bơh dilah jak ngan niam ngan den là bi neh mŭt Đảng gơ dê. Ngan tài bơta hơ̆ gơ ờ gơtùi jà geh cau tĕ khà mờ sùm là ală cau tơlik măt tĕ khà do là ală cau pơgru, ală cau lơh sơnơm, ù tiah lơh broă uă ngan kung mìng là tàm dùl xã lơm mờ tiah tĕ khà den gơ 3, 4 kơnhoàl wơl, cau tĕ khà kung ờ gŏ gĭt jơh geh, mờ ală cau tơlik măt tĕ khà ờ geh tơl bơta chài, mìng sùm lơh broă ờs mờng pah ngai lơm, guh tàm dùl mpồl cau, dùl anih pơrjum cribơyai den là kơn jơ̆ ngan, ờ gơtùi klàs geh bơh sră nggal, lơh gơlik rùp să cau tơlik măt tĕ khà là sền den niam ngan mơya đơs di, đơs tơmoh di jơnau kơ̆p kờñ bơh cau tĕ khà dê den là ờ hềt lơh geh, là jơnau lơh gơlik bơta ờ hềt jà gơtùi cau tĕ khà.

Jăt mò Cao Thị Xuân Phó Chủ tịch Mpồl duh broă Jơi bơtiàn kòn cau Quốc hội dê den dùl jơnau bơh tài gơbàn ndai gơlam tus broă ờ tơl kuang bàng là cau jơi bơtiàn kòn cau dùl êt nă cau mŭt lơh broă tàm ală anih lơh broă Quốc hội mờ Hội đồng Nhân dân ală kấp, hơ̆ ngan là bơta ờ tơl bơta sền gròi tàm bàr pe tiah, bàr pe bộ, gah sơnah lơh broă mờ gơ là gơ ơm tàm broă rơndăp tăp sèng.

Mò Cao Thị Xuân đơs: Dilah ờ geh kuang bàng bơh xã den là ờ gŏ geh kuang bàng kơnhoàl, kuang bàng kơnhoàl den pal rơndăp tăp sèng cau guh ăt gơnoar broă kấp phó phòng, kuang ătbồ phòng den hơ̆ sồng geh kuang ătbồ sở, hơ̆ sồng geh tỉnh ủy viên tơnơ̆ hơ̆ den hơ̆ sồng mŭt lơh broă tàm ală anih lơh broă jơnhoa rlau, khin cha jàu kơnòl.

Bè hơ̆ là gơtùi sền gŏ loh dùl bơta là bơh tài bè lơi mờ khà ală kuang bàng là cau jơi bơtiàn kòn cau dùl êt nă cau dùl êt rlau pơndrờm mờ broă jàu geh ai tơlik, dùl bơnah tài bơh bồ tơngoh bơsram sră, adat bơhiàn mờng quèng bơh yau, bơta kal ke, bơta bàs sìl ờ khin, ờ geh bơta chài mờ rlau mờ hơ̆ tai là broă rơndăp tăp sèng bơh kấp hơđơm kung ờ gŏ geh sền gròi sơl...bè hơ̆ den tàng nàng bơsong geh broă do den kờñ pal geh ală broă lơh mờ gùng dà loh làng.

Cau cih Việt Phú- Cau mblàng Lơ Mu K’Yến