VOV4.K’ho- Tàm tiah Tây Nguyên, ală tiah neh lam lơh Nhai công nhân mờ uă broă lơh ngan ngồn. Mò Trần Lệ Nhung, Chủ tịch Liên đoàn Lao động càr Gia Lai pà git: Nàng lam lơh geh cồng nha tơngume Nhai công nhân nam 2021, bơdìh mờ broă pơn jat tai bơyai lơh ală broă lơh gam lơh geh cồng nha, geh gal ngan đoàn viên, cau lơh broă dờp, ală kấp công đoàn tàm càr gam tơrgùm lam lơh tai 4 broă lơh tờm, geh: Broă lơh “75 rbô jơnau bơceh pa, sơrlèt gan kal ke, bơtàu tơnguh”, broă lơh “Iat- Git wă- Tam pà bal” mờ đoàn viên mờ cau lơh broă; bơyai lơh ală broă lơh “Ưn ngài cau lơh broă” mờ jờng rơ đoàn viên, cau lơh broă tus ală kấp Công đoàn tàm càr. Di tŭ do, Liên đoàn Lao động càr Gia lai neh lam lơh Nhai lơh broă bè ờdo ờdă kloh niam lơh broă nam 2021, geh lơh bơh ngai 1 tus ngai 31/5 mờ tơngume “Sơlơ sền sơwì, sền gròi ală jơnau pơhìn bè ờdo ờdă kloh niam lơh broă mờ bơta tus bal bơh cau gàr ờdo ờdă kloh niam lơh broă dê”. Tàm dơ̆ lam lơh, Liên đoàn Lao động càr neh tă 530 tơlak đông bơh Kes priă mpồl bơtiàn nàng dong kờl lơh pa mờ lơh niam wơl 17 nơm hìu ơm Công đoàn ai đoàn viên, cau lơh broă gơtìp kal ke bè hìu ơm in.

Gia Lai jàu priă dong kờl lơh Hìu ơm Công đoàn ai cau gơtìp kal ke bè hìu ơm in

Tơnơ̆ dơ̆ lam lơh bơh Liên đoàn Lao động càr Gia Lai dê, Công đoàn Kong ti TNHH MTV Kau su Chư Păh kung neh bơyai lơh dơ̆ lam lơh Nhai công nhân mờ Nhai Lơh broă bè ờdo ờdă kloh niam lơh broă nam 2021. Tàm Nhai công nhân mờ Nhai Lơh broă bè ờdo ờdă kloh niam lơh broă nam do, Công đoàn kong ti geh ală broă lơh bè: bơyai lơh mblàng yal jrô ơnàng tus jơh ală đoàn viên, cau lơh broă bè bơta kuơ bơh Ngai dunia lơh broă dê; mblàng yal bè gùng dà bơt bơtàu rơnàng công nhân Việt Nam jat nùs nhơm Nghị quyết pơrjum dờng dơ̆ 13 bơh Đảng dê; bơyai lơh ală dơ̆ tìp mat mờ cau lơh broă jat tơngume “Iat- Git wă- Tam pà bal”; sơlơ sền sơwì, sền gròi ală jơnau pơhìn bè ờdo ờdă, kloh niam lơh broă mờ bơta tus bal bơh cau gàr ờdo ờdă, kloh niam lơh broă dê. Bơdìh hơ̆ tai, Công đoàn Kong ti kung bơyai lơh uă dơ̆ lòt còp, pà phan ai công nhân geh rài kis kal ke, gơtìp rềs àr lơh broă in; lơh mờ jàu 2, 3 nơm hìu ơm công đoàn ai hìu bơnhă công nhân gam gơtìp kal ke bè hìu ơm.

Cau mblàng Ndong Brawl mờ K’Duẩn