VOV4.K’ho- Là dùl càr geh tus 50% khà kờp làng bol là kòn cau Jrai, Bahnar, rlau 10 nam do, gah bơto bơtê càr Gia Lai sùm sền gròi broă bơto bơtê mờ bơsram dà kòn cau Jrai mờ Bahnar tàm hìu bơsram kấp dùp mờ jơnau kờñ tơnguh uă bơta wă wờng bơh làng bol dê, pơgồp bơnah prap gàr mờ ngui niam bơta kuơ dà kòn cau, bơhiàn niam chài rơgơi bơh ală jơi bơtiàn kòn cau tàm tiah Tây Nguyên dê.

Bơh nam bơsram 2010 - 2011, Sở Giáo dục mờ Đào tạo càr Gia Lai neh sồr ai broă bơto dà đơs jơi bơtiàn kòn cau tơmut tàm broă rơndap lơh bơto bơtê  bal bơh kấp bơsram dê. Tus tŭ do, ală hìu bơsram ndrờm bơto bơtê jat di mờ broă lơh. Jat hơ̆, broă bơto bơtê dà kòn cau dê geh ală hìu bơsram rơndap tap sèng tŭ tơngai bơsram di pal mờ lơh jat tơl khà tiết jat jơnau sồr, sền bal là neh di pal mờ jơnau kờñ bơsram bơh kơnòm bơsram dê kung bè mè bèp kơnòm bơsram tàm ù tiah càr dê.

Cau mblàng K’ Hạnh