VOV4.K’ho- Jăt ală cau jak chài đơs, tàm tơngai ală ƀòn lơgar gam lơh jăt jơnau sồr ơm yah ngài mpồl bơtiàn jăt jơnau cih tàm Chỉ thị sồ 16 dê, broă ring bal “gùng ai lòt” đơs bal, rề ơnàng lơh uă gùng ai lòt gùng dà đơs is pơgồp bơnah jun pơndiang phan lơh geh bơh sươn sre tàm dơlam is càr mờ đah ală kơnhoàl ù tiah đah ală ƀòn lơgar là kuơmàng ngan rlau jơh nàng dong tăc bro, jun pơndiang phan sa, phan ngui lơh broă sa sươn sre sền gàr tŭ tơngai lơh sa pa tơnơ̆ tơngai gơbàn kòp Covid-19.

Ồng Dương Thanh Tùng- Kuang ătbồ Sở Nông nghiệp mờ Phát triển Nông thôn càr Bắc Giang pà gĭt, bơh anih là tiah gơbàn kòp uă ngan rlau jơh bơh gùt lơgar dê, tus tŭ do, càr Bắc Giang gam tơrgùm jơh ală bơta pràn dong lơh sa sươn sre, dong kờl ală mpồl lơh sa kă bro lơh wơl broă lơh sa sền gàr niam đah lơh sa mờ sồr rơcăng sơndră kòp. Bơh bơta geh ngan lơh sa pà gŏ, bal mờ broă kơryan kòp bơtờp ờdo ờdă den broă ai tơl bơta jun pơndiang phan lơh geh bơh sươn sre là kuơmàng ngan. Cơng tàng pà gŏ ai bơta do in là gơguh lơh sa sươn sre bơh càr dê bơh 6 nhai bồ nam uă rlau tus 3 dơ̆ broă rơndăp lơh neh jàu mờ gam wèt tus jơnau kờñ lơh geh pơgăp 4,6%, sơrlèt rlau 2% broă rơndăp lơh neh jàu bơh nam do dê. Ồng Dương Thanh Tùng, đơs: Rơcăng lài tàm broă rơcăng sơndră kòp kung bè kờp sền, sền swì jơnau pơhìn nàng lam lơh sa, jun pơndiang phan kă bro mờ tăc bro ờdo ờdă, càr Bắc Giang kung ai tơl ală bơta ai ală bơta phan kờñ pal geh in bơh ală càr ndai, bè: phan siam phan ròng, phan ngui tàm broă lơh sa sươn sre, bè chi sơntìl, kòn sơntìl lòt rê mŭt tàm ƀòn lơgar nàng lơh sa sươn sre sền gàr niam ngan rlau jơh. Mờng chài pà gŏ, dilah gròi sền niam mờ rơcăng lài gùng dà, broă rơndăp lơh kung gam sền gàr ală bơta pal geh ờdo ờdă rơcăng sơndră kòp Covid-19 mờ sền gàr bal bơtàu tơnguh lơh sa mpồl bơtiàn, tàm hơ̆ geh bơtàu tơnguh lơh sa sươn sre.

Mờ bơta is rơmis ù tiah ƀòn lơgar geh uă rbòng dà, jơh ală hìu măy lơh sa, lơh gơlik kòi phe tus tàm gah dà dờng, gah rbòng dà, kòi phe lơh gơlik tàm tiah ring dà dờng Cửu Long rlau 90% geh jun pơndiang mờ gùng dà. Den tàng bè hơ̆, broă lơh toah wàs hìong dà hòr tàm dà dờng ai niam gùng lòt tàm dà ai ơhò plung in pơndiang phan geh pơgồp bơnah uă ngan dong ală cau kă phan mờ mpồl lơh sa kă bro tăc phe mờ lơgar ndai lơh sùm gơtùi ală anih tăc bro kòi phe bơh lŏ sre tus anih ơhò ơm tăc phan mờ lơgar ndai. Mơya, jăt ồng Nguyễn Tấn Nhơn- Phó Kuang ătbồ Sở Nông nghiệp mờ Phát triển Nông thôn ƀòn dờng Cần Thơ dê đơs, ală gùng dà, kơrnoat bal geh bơta tă bơsong kal ke neh geh ai tơlik mơya gam gơ jăt tàm tơl ƀòn lơgar bè broă wă wờng mờ đòm jăt lam lơh bè lơi. Ồng Nguyễn Tấn Nhơn, đơs: Dan mờ Bộ Nông nghiệp mờ Phát triển Nông thôn geh jơnau đơs mờ Bộ Giao thông Vận tải nàng bơto pơlam jàu ai càr in mờ lơh sră ai gơnoar ndrờm bè gùng ai lòt sơl gơwèt mờ rơndeh pơndiang phan nàng ai ală plung ơhò lòt blơi kòi in ƀươn. Pal lơh gùng che điện thoại is đah ală càr bè lơi nàng tă bơsong ai ală cau kă phan, mpồl lơh sa kă bro mờ lòt blơi kòi tàm tơl tiah gròi sền in. Tŭ do, geh ală jơnau sồr kal ke ngan là uă tŭ oh mi lòt tus nhơ̆ ờ gŏ gĭt hòi mờ cau lơi in, ờ gŏ gĭt kơnờm mờ cau lơi nàng dong kờl.

Jơnau yal bơh Mpồl lơh broă dờng màng tiah đah jum dà lơgar bơh Bộ Nông nghiệp mờ Phát triển Nông thôn dê pà gŏ, kờp tus gùl nhai 8, kàl kòi nhai hàm tàm ală càr, ƀòn dờng tiah ring dà dờng Cửu Long neh tơnhàu geh rlau 800 rbô lồ mờ kòi lơh geh pơgăp 4 tơlak 500 rbô tấn. Kờp dŭ, tơngai tơnhàu uă là tàm nhai 8 do mờ tơn jơh tàm gùl nhai 9 tus. Mơya, kal ke uă ngan rlau jơh tŭ do gơwèt mờ gah lơh broă sa sươn sre hơ̆ là, broă lơh jăt Chỉ thị sồ 16 tàm ală càr mờ ƀòn dờng tiah đah jum dà lơgar gơlam tus bơta kòl gùng jun pơndiang kòi phe, phan kă bro bơh lŏ sre tus hờ hìu măy mờ bơh hìu măy tus hờ ală anih ơhò dà lềng ơm nàng lòt tăc mờ lơgar ndai. Cau lơh broă sa gam tơnhàu kòi tàm tŭ ală kấp xã, thôn, ƀòn, lơh jăt uă broă lơh rơcăng sơndră kòp...gơlam tus ờ tơl uă ngan mpồl cau lơh broă tơngai kàl tàm lŏ sre, bơh cau lòt blơi tus cau lòt toès kòi, tui àñ jun dăp tàm plung ơhò. Bè ờs den làng bol geh ngui plung, ơhò mờng ngui bơh hìu bơnhă dê nàng jun pơndiang kòi bơh lŏ sre, mơya tŭ do, ală ơhò plung do ờ gơtùi lòt bơh tiah do tus tiah ndai, ngan là tàm tiah rbòng dà tàm dơlam lŏ sre lơh gơlik bơta kal ke tàm broă jun pơndiang kòi phe. Ồng Nguyễn Quốc Toản- Kuang ătbồ Cục lơh gơlik phan mờ bơtàu tơnguh drà kă bro phan lơh geh bơh sươn sre geh jơnau sồr bè do: Tiah ring dà dờng Cửu Long jun pơndiang mờ gùng dà là tờm ngan tàm broă jun kòi bơh lŏ sre tus hờ ală anih lơh gơlik phan mờ jun pơndiang bơh hìu măy lơh gơlik phan. Kơ̆p kờñ ngan neh geh “gùng ai lòt” tàm gùng ù den kung pal geh “gùng ai lòt” tàm gùng dà sơl, kờñ pal geh bơta ring bal đah ală Sở Giao thông mờ Vận tải, Gah lùp sền gùng lòt gùng dà ală tiah mờ sră pal ring bal geh anih lòt mờ anih tus nàng tă bơsong kal ke.

Tă bơsong geh bơta gơkòl phan kă bro, ai tơl bơta ƀươn jun pơndiang lòt rê tăc bro phan lơh geh bơh sươn sre là broă jal mhar mờ kờñ ngan tŭ do. Den tàng bè hơ̆, kờñ ngan gờñ geh ală bơta bơto pơlam nàng ală ƀòn lơgar in ring bal tàm broă sồr lam lơh tă bơsong ală kal ke tàm broă jun pơndiang mờ ai lòt rê phan lơh geh bơh sươn sre in, ngan là ală bơta phan lơh geh bơh sươn sre gam mŭt tàm kàl tơnhàu. Gơrềng tus broă do, Bộ Công thương neh geh sră nggal sơrbăc mhar ngan dan mờ Thủ tướng Chính phủ sền swì, jàu ală Bộ, gah lơh broă dà lơgar, ală ƀòn lơgar geh gơrềng in mhar kơlôi sơnơng pờ “gùng ai lòt” ai jun pơndiang phan gùng dà in. Kung tàm broă lơh pa ngan rlau jơh sơl, Bộ Giao thông Vận tải kung neh geh sră nggal sồr Sở Giao thông Vận tải ală tiah mhar dong kờl ai Ủy ban Nhân dân càr, ƀòn dờng in ai tơl bơta ƀươn ai làng bol, mpồl lơh sa kă bro jun pơndiang phan kă bro tàm gùng dà in tàm dơlam ƀòn lơgar he dê nàng pleh lơh gơkòl gùng lòt jun pơndiang phan, logistics drơng broă lơh sa mờ tăc bro phan lơh geh bơh sươn sre ai làng bol in.

Cau cih Minh Long (VOV1)- Cau mblàng Lơ Mu K’Yến