VOV4.K’ho– Poh lài, Hội đồng Nhân dân ală càr tàm tiah Tây Nguyên neh bơyai lơh pơrjum lồi nam. Bal mờ broă sền sơ wì broă lơh sa – mpồl bơtìan, ring bal ua\ nghị quyết kươmàng, tàm dơ\ lùp mờ hơ jơnau lùp, Hội đồng nhân dân ală càr neh đơs tus ua\ broă ờ suk geh cau te\ khà sền gròi.

Dơ\ lùp mờ hơ jơnau lùp tàm pơrjum dơ\ 16, Hội đồng nhân dân càr Gia Lai, broă bơtàu tơnguh ua\ ală rơndap broă lơh năng lượng mờ lơh niam khà pil tơnơ\ tu\ jơh tơngai ai ngui neh gơ gơs là broă geh ua\ kuang bàng sền gròi. Ồng Phạm Văn Binh, Kuang atbồ Sở Công thương càr Gia Lai pà git, tu\ do, càr geh rlau 2 rbô broă lơh đèng mat tơngai lơh hơđang rơkàng hìu bal mờ kờp jơh bơta pràn pơgap 206MWp. Pil năng lượng mat tơngai tu\ do ờ hềt geh kờp là phan sang ngòt rơ ngơt. Tàm dunia, neh geh ală kong ti lơh niam, lơh gơlik wơl ală pang pil gơ dờp năng lượng mat tơngai. Bè hơ\ den tàng pơgap 20 nam tai, tu\ ală pang pil dùl ròt jơh tơngai geh ngui, den ngan là công nghệ tàm lơgar gơtùi lơh niam jơh. Ồng Phạm Văn Binh đơs là, broă geh sền gròi ua\ tu\ do là lơh bè lơi nàng gơtùi sền gròi ală rơndap broă ai broă lơh đèng mat tơngai hơđang rơkàng hìu nàng geh dờp broă dong kờl bơh dà lơgar dê: “Ua\ trang trại ờ geh rơkàng, klo broă rơkàng năng lượng ờ gơtùi ala rơkàng hìu den khi lơh rơkàng, là rơkàng sơlơ hơ đơm rơkàng năng lượng. Bol hi gam kơp jơnau pơlam bơh Bộ Công thương dê nàng cribơyai mờ Ủy ban nhân dân càr mờ ală sở, gah broă lơh nàng lòt sền, sền sơ wì, pơlam ală cau pơcri pria\ lơh jat di gùng dà bơh dà lơgar dê, mơkung lơh glài krà` ală broă lơh tìs”.

Ndrờm bè hơ\ sơl, tàm pơrjum Hội đồng nhân dân càr Dak Nông dơ\ do, ală kuang bàng Hội đồng nhân dân càr Dak Nông đơs là, pơgap 2 nam do, khà bơcri, bơtàu tơnguh ală rơndap broă lơh đèng mat tơngai tàm càr neh gơguh ua\ mờ khà mhar ngan. Bulah bè hơ\, anih lơh broă geh gơ noar tàm càr neh ờ sền gròi broă lam lơh crap, tơrbo\ 2, 3 broă lơh đèng mat tơngai. Ua\ rơndap broă ring bal crap tơrbo\ tu\ ờ hềt geh broă lơh bơt bơtàu, 2,3 broă lơh ring bal crap tơrbo\ mơya mùl màl ờ hềt geh anih crap tơrbo\...

Ồng Lê Văn Thị, Kuang atbồ Sở Công thương càr Dak Nông pà git, tu\ do, gùt càr geh mờr 450 broă lơh đèng mat tơngai hơđang rơkàng hìu mờ kờp jơh bơta pràn rlau 70MWp: “Càr gam atbồ ờ hềt nền nòn, kuơmàng là tàm ală thôn, tu\ tac bro den ai broă tac bro ù tiah nàng lơh gơs trang trại den tàng gơlik geh broă. Ủy ban nhân dân càr geh jơnau đơng lam mờ Sở geh pơgồp bal mờ ală gah lơh broă geh gơ rềng bè Sở Xây dựng, Sở Nông nghiệp, Sở Tài nguyên mờ Môi trường pơn jat tai lam lơh, lòt sền, lùp sền, ai tơlik ală broă kươmàng nàng đơng lam bơsong”.

Pơrjum Hội đồng Nhân dân càr Kon Tum khóa 11

Ai tàm dơ\ lùp mờ hơ jơnau lùp tàm pơrjum dơ\ 11, Hội đồng nhân dân càr Kon Tum khóa 11 đơs tus bơta lơh tìs Adat Lâm nghiệp pal đơs lài ngan. Nam do, tàm càr git go\ 305 broă lơh tìs adat sền gàr brê, khà dơm chi kơl mus tìs rlau 1 rbô khối, bă brê gơtìp hoàc huơr rlau 41 lồ. Ồng Nguyễn Tấn Liêm, Kuang atbồ Sở Nông nghiệp mờ Phát triển Nông thôn càr Kon Tum pà git, tu\ ală broă lơh tìs Adat Lâm nghiệp geh git go\, càr neh lơh glài krà` kơ nòl bơh ală mpồl bal, cau dùl nă să geh gơ rềng, ngan là gơ noar broă bơh cau atbồ dê. Mùl màl tàm nam 2020 neh lơh glài 29 nă cau, tàm hơ\ geh 4 nă cau gơtìp lơh glài ơm lơh broă.

Bè jơnau lơh gơbàn bơta kơl mus brê, tơnhàu dơm chi tìs mờ adat boh lam gam gơlik geh, ồng Nguyễn Tấn Liên dờp ală bơta ờ niam tàm broă atbồ: “Pal dờp là bè pràn jak bơyai lơh, đơng lam mờ nùs nhơm geh kơ nòl bơh 2, 3 nă cau tờm brê dê den kung gam ờ niam, den tàng lời gơlik geh bơta kơl mus brê, koh kơl dơm chi, pơndiang dơm chi tìs mờ adat boh lam ờ hềt geh kơryan di tu\. Broă lơh atbồ dà lơgar bè lâm nghiệp tàm 2, 3 gơ noar atbồ kấp xã gam ờ niam. Broă mblàng yal, lam sồr làng bol tàm broă lơh sa suơn mìr ờ hềt geh lơh sùm, ờ hềt jơh nùs lơh gơbàn bơta kơl mus brê tìs mờ adat boh lam kung gam gơlik geh”.

Phó Bí thư Tỉnh ủy, Chủ tịch Hội đồng Nhân dân càr Dak Lak, ồng Y Biêr Niê đơs tàm dơ\ tơn jơh pơrjum

Kung gơ rềng tus broă brê mờ ù brê sơl, tàm pơrjum lồi nam bơh Hội đồng nhân dân càr Dak Lak dê, ồng Nguyễn Thành Dũng, Mpồl kuang bàng [òn dờng Buôn Ma Thuột sồr: “Gơ rềng tus ală rơndap broă geh gơ rềng tus ù brê, tus ù lâm nghiệp den tàm ală nam lài, Hội đồng nhân dân neh sền gròi mờ yal mat ua\ rơndap broă ờ geh cồng nha neh geh jơnau sồr mơya sùm tàm dùl tơngai jo\ jòng bol he kung ờ hềt geh ală gùng dà, broă lơh nàng bơsong. Do là broă dờng, broă kal ke gơ rềng tus ua\ kấp, ua\ gahbroă lơh mơya ờ di bol he ờ gơtùi bơsong. Pal geh ală broă rơndap lơh, gùng dà, broă lơh nàng bơsong broă do”.

Pơrjum dơ\ do bơh Hội đồng nhân dân càr dê ờ mìng bơyai lơh lùp mờ hơ jơnau lùp. Ồng Y Biêr Niê, Chủ tịch Hội đồng nhân dân càr Dak Lak pà git, ală jơnau lùp ai tơlik cèng bơta geh ngan tàm càr, đơs tus ală broă ngan ngồn mờ gam geh ală gah broă lơh bơsong den tàng Hội đồng nhân dân ờ đơs tàm pơrjum do mờ geh sồr ală sở, gah broă lơh hơ tơn cau te\ khà in.

Cau mblàng K’Duẩn