VOV4.K’ho- Ală ngai do, Ủy ban Mặt trận dà lơgar Việt Nam ală càr mờ ƀòn dờng gam pơgồp bal mờ Ủy ban Nhân dân dùl kấp bal rơcăng bơyai lơh pơrjum tìp măt mờ cau tĕ khà nàng ală cau tơlik măt tĕ khà in lơh jăt gơnoar hòi jà tĕ khà. Do geh sền bè là dùl dơ̆ “pơrlòng” pơn jăt tai nàng sền swì bơta pràn jak, nùs nhơm bồ tơngoh bơh cau tơlik măt tĕ khà dê dilah sơl, geh đềt mềr ngan sơl mờ làng bol lah ờ, iăt kơno jơnau đơs làng bol dê, geh làng bol pin dờn...halà ờ. Mơya, jơnau mờ uă cau tĕ khà sền gròi là cau tơlik măt tĕ khà pal geh broă lơh loh làng mờ geh ală bơta lơi dilah gơ gơs là kuang bàng ala măt bơh làng bol dê.

Kơrnoat boh lam cih broă bơyai lơh ai ală cau tơlik măt tĕ khà in tìp măt, tơm bơh bơr mờ cau tĕ khà tàm pơrjum tìp măt mờ cau tĕ khà tàm tiah he tơlik măt tĕ khà pal geh lơh dùl bă làng bol lơh tờm, song dơ pă, loh làng, ờ ndơ̆p mpồn, ring bal, di kơrnoat boh lam, sền gàr rơndăp tăp sèng ờdo ờdă mpồl bơtiàn. Bơdìh mờ ală dơ̆ tìp măt cau tĕ khà tàm tiah tơlik măt tĕ khà den broă hòi jà tĕ khà bơh ală anih yal tơngĭt jonau mpồl bơtiàn kung là “gah” kuơmàng ngan nàng ală cau tơlik măt tĕ khà in geh lơh jăt gơnoar hòi jà tĕ khà.

Bơta mờ uă cau tĕ khà sền gròi là broă cau tơlik măt tĕ khà geh lơh bơta lơi dilah gơ gơs là kuang bàng Quốc hội, kuang bàng Hội đồng Nhân dân mờ lơh bơta lơi nàng ngan ngồn là cau ala măt ai jơnau đơs bơh làng bol dê in. Ồng Nguyễn Tâm Tring, là dùl nă cau tĕ khà ơm tàm quận Đống Đa, ƀòn dờng Hà Nội đơs bè do: Bè bơnah broă lơh, jơnau là đơs bơta lơi, bañ đơs jơnau kờñ lơh ngan pơđơl pràn. Pal đơs là tŭ do, geh ală jơnau bè sa kuề sa kuà, bơthì bơthà, lơngăp lơngai mpồl bơtiàn. Jơnau kuơmàng là cau ala măt làng bol in mờ bol añ gŏ, bi geh tơl pràn nàng lơh jăt jơnau kơ̆p kờñ bơh bi dê mờg bol añ dê.

Ồng Chu Văn Phương là dùl nă cau tĕ khà ơm tàm ƀòn dờng Việt Trì, càr Phú Thọ kơ̆p kờñ bè do: Añ kơ̆p kờñ ngan ală cau tơlik măt tĕ khà geh broă lơh lơh broă bơh he dê mờ geh ală jơnau hơ tềng đăp cau tĕ khà pal lơh jăt niam broă lơh lơh broă bơh he dê. Bơh broă lơh lơh broă, cau tĕ khà cau geh gròi sền broă lơh lơh broă bơh cau tơlik măt tĕ khà dê mờ lơh jăt geh cồng nha.

Bơh tài bè lơi mờ cau tĕ khà geh bơta sền gròi uă ngan do, là tài bơh dilah kờñ jà gơtùi cau tĕ khà, ală cau tơlik măt tĕ khà pal geh broă lơh lơh broă loh làng, gơ jăt bal mờ bơta geh ngan tàm tiah tơlik măt tĕ khà. Mơya, bơh jơnau hơ tus broă lơh gam là dùl bơta ngài ngan, tài bè hơ̆ den hơ̆ sồng lơh gơlik nùs nhơm “ờ khin” hơ tàm bàr pe nă cau tơlik măt tĕ khà.

Jăt ồng Lê Bá Trình, lài do là Phó Chủ tịch Ủy ban Mặt trận dà lơgar Việt Nam dê đơs, ală dơ̆ pơrjum tìp măt mờ cau tĕ khà nàng hòi jà tĕ khà geh bơta kuơ bè dùl dơ̆ “pơrlòng” pơn jăt tai nàng sền swì bơta pràn, nùs nhơm bồ tơngoh bơh cau tơlik măt tĕ khà dê geh dipal, sơl, ngan ngồn ơm kis rềp mềl mờ làng bol, iăt kơnòl jơnau đơs bơh làng bol dê, geh làng bol pin dờn...halà ờ. Den tàng bè hơ̆, dilah cau tơlik măt tĕ khà ờ geh broă lơh loh làng, ờ lơh jăt jơnau hơ bơh he dê, den rùp să, muh măt bơh khi dê geh ngai sơlơ hŭi rơhời tàm muh măt nùs nhơm cau tĕ khà dê. Bè đah adat boh lam, ờ hềt geh bơta lơi sồr ală kuang bàng pal lơh jăt jơnau hơ tŭ tìp măt mờ cau tĕ khà, mơya ồng Lê Bá Trình đơs là, bơta rồn bơklơn sồr lơh jăt dờng ngan rlau jơh là bơta pin dờn bơh làng bol dê. Ồng Lê Bá Trình đơs tai: Jăt añ den tơl nă cau tơlik măt tĕ khà pal tơngŏ loh bơta pràn jak, bơta geh kơnòl bơh he dê bơh broă lơh lơh broă nàng cau tĕ khà gŏ là bi lơh broă gơtùi sơl halà ờ mờ tơnơ̆ do gròi sền, tŭ bi hơ mờ cau tĕ khà bè lơi mờ tŭ neh pồ gơkờn den bi lơh jăt broă rơndăp lơh neh hơ mờ cau tĕ khà bè lơi. Den tàng, tơl nă cau tơlik măt tĕ khà pal geh broă lơh lơh broă loh làng tềng đăp cau tĕ khà den tŭ hơ̆ hơ̆ sồng geh bơta gơtùi. Dilah bol he mìng lơh jăt bè cau ala măt gời lơm den bơta jà gơtùi tềng đăp cau tĕ khà là ờ geh uă ờ.

Dùl Quốc hội, Hội đồng Nhân dân ngan ngồn là làng bol dê, tài bơh làng mờ tài làng bol là bơta mờ jơh ală cau tĕ khà ndrờm kơ̆p kờñ. Ồng Lê Như Tiến, dùl nă cau tơlik măt tĕ khà mờ tơlik măt tĕ khà wơl uă tơngai lơh broă Quốc hội, lài do là Phó Chủ nhiệm Ủy ban Niam chài, Bơto bơtê, Ơruh pơnu, Kơnòm pa tàu, Kơnòm dềt Quốc hội dê đơs là: Mờng chài là kis dòn song mờ đơs song bơta he kơlôi sơnơng mờ cau tĕ khà. Nàng cau tĕ khà geh bơta kơlôi sơnơng niam mờ đùh sră ai he in den geh bơta gĭt wă rơcăng lài nền nòn ală bơta lơi mblàng đơs tềng đăp cau tĕ khà tŭ hòi jà tĕ khà. Gơwèt mờ broă lơh lơh broă pal loh làng, ƀươn wă mờ pleh bal bal lơm. Ală cau tơlik măt tĕ khà pal yal loh jơnau kờñ, broă pal lơh bơh he dê dilah geh pồ lơh kuang bàng Quốc hội, Hội đồng Nhân dân; tơl nă cau kung pal gĭt wă loh broă gơlik geh bơta is rơmis tàm tiah he tơlik măt tĕ khà mờ geh ală gùng dà broă lơh, tă pơgồp jơnau đơs, broă lơh...gơdờp tus bơta bơtàu tơnguh bơh tiah he dê mờ bơh gùt lơgar dê. Ồng Lê Như Tiến, đơs: Ală cau tơlik măt tĕ khà dơ̆ sơnrờp khi ờ hềt geh bơta chài “đơs tềng đăp làng bol, đơs tềng đăp cau tĕ khà, lơh bè lơi đơs nàng cau in iăt he”.

Bơr đơs gơ jăt bal mờ broă lơh. Jơnau hơ bơh ală cau tơlik măt tĕ khà dê geh gơ gơs là cơng tàng nàng cau tĕ khà gròi sền broă lơh bơh ală cau tơlik măt tĕ khà hơ̆ dê tŭ neh geh pồ lơh kuang bàng Quốc hội, Hội đồng Nhân dân tàm jơh gùt tŭ tơngai lơh kơnòl broă bơh he dê. Bè hơ̆ kung kờñ pal geh dùl broă lơh nàng tơn jơh lơh kơnòl broă ală kuang bàng Quốc hội mờ kuang bàng Hội đồng Nhân dân lơi ờ lơh jăt jơnau hơ dờng màng bơh he dê tềng đăp cau tĕ khà, tềng đăp làng bol tŭ hòi jà tĕ khà.

Cau cih Lại Hoa- Cau mblàng Lơ Mu K’Yến