VOV4.K’ho- Bau gờñ, bau mờ cau rềp jơi nòi bal lơh gơlik uă jơnau gơlời wơl tus mờ rài kis bơh ờ dùl êt nă làng bol jơi bơtiàn dùl êt nă cau dê. Bau mờ cau rềp jơi nòi bal gơlam tus bơta ờ dờng pràn jơi nòi. Ală kòn se geh deh sùm bơtờp uă kòp bơh ndul mè, ngan là ală kòp gơrềng tus mhàm; bồ tơngoh kơnòm dềt dê sùm ờ huan ngac ngar, să jan lơyah, rơgai ờ dờng...Ală jơnau gơlời wơl do lơh gơrềng ờ niam tus rài kis chờ hờp hìu bơnhă dê, bơta pràn mờ cồng nha lơh broă...Do kung là dùl tàm uă jơnau kuơmàng gơlam tus jơnau geh ngan jơgloh rƀah tàm làng bol jơi bơtiàn kòn cau dùl êt nă cau.

Dùl jơi nòi bal mờ rơ̆p pa 16 sơnam lơm mơya bi La Thị Hoa mờ bi La Văn Nam là cau Đan Lai ơm tàm ƀòn Cò Phạt, xã Môn Sơn, kơnhoàl Con Cuông, càr Nghệ An kung gam tam bau sơl. Kòn ùr tơnhoa bơh khi dê tŭ do neh 2 sơnam, bơh tŭ pa lik bơh ndul mè, sau neh gơtìp ờ niam tàm să bơh mè deh tơn. Bi La Thị Hoa, pà gĭt: Oh bal mờ bơklau oh dê tam tìp, gŏ gơlơh gơhờp bè hơ̆ là bau gơ. Mè bèp oh kung ai bau sơl, bol oh rê ơm kis bal mờ deh kòn mờ ờ hềt gŏ lòt lăp bau halà ñô bau lơi ờ. Lài do, kơno yal oh mờ bơklau oh dê kung là oh mi sơl mơya ờ gŏ geh chi lơi ờ, kung gam gơtùi bau sơl gơ dê.

Jơnau kơnòm bơsram cau Đan Lan sơrbì bơsram nggùl gùng nàng bau den nam lơi kung geh lơm, kòn ùr rơ̆p pa 14 sơnam ờ hềt bau neh geh sền là pơnrao, là neh dờng ngan. Mờ jơnau kơlôi bè bơta tam bau kung ƀươn ƀoài ngan sơl, oh kòn kòn se tàm kờñ là cau dờng lơh kòn gùng lòt lăp bau, tơn kăp kòng, tơnơ̆ hơ̆ là rê ơm kis bal dùl hìu, ai ñô bau den tŭ lơi kung lơh gơtùi lơm. Bi La Thị Nga ơm tàm ƀòn Cò Phạt pà gĭt, broă bau gờñ mờ bau mờ cau rềp jơi nòi bal là jơnau ờ gŏ ai lơh krơi sơƀơi ờ. Bi La Thị Nga đơs: Bol khi kờñ bau den gĭt lơh bè lơi tai, lài do kàr sơnam bol khi den là neh deh kòn gơ ì, ờ gŏ gĭt kơlôi tus oh mi jơi nòi bal ờ, oh mi mờ tam bau bal den sơlơ ơm kis rềp mềl rlau, bol khi tàm kờñ den pà khi in rê ơm kis bal dùl hìu tơnơ̆ hơ̆ deh kòn, ờ gŏ tàm kờñ tai den tàm sang dô rê ơm wơl mờ mè bèp kung di sơl.

Jơnau bau gờñ mờ bau mờ cau rềp jơi nòi bal bơh bàr pe yô ùr bơklau kòn cau Đan Lai dê tàm kơnhoàl Con Cuông, càr Nghệ An là dùl jơnau pal yal lài ngan bè bơta tam bau mờ pràn kơldang să jan deh dùh, tài bơh gơ gơhoài jăt bal uă ngan ală jơnau gơlời wơl gơrềng tus bơta niam khà kờp làng bol. Jăt jơnau đơs bơh mò Nguyễn Thị An dê, mò là Kuang ătbồ HealthBridge Canada tàm Việt Nam den tŭ do anih lơh broă mò dê gam lơh bàr pe rơndăp broă lơh sền gàr pràn kơldang să jan tàm càr Sơn La den jơnau geh ngan do neh lơh gơrềng uă ngan tus bơta niam rài kis. Mò yal: Bol he gŏ loh làng ngan là bơta niam khà kờp làng bol gơrềng uă ngan tàm sơnam gam kơnòm ờ hềt tơl nàng dờng, ờ hềt tơl nàng bơtàu tơnguh dùl bă tơl làm neh deh kòn den gơlam tus là kòn geh deh mờ uă ngan jơnau gơlời wơl jơh bal bè phan sa bơkah tơl pràn tus dì să bồ nùs nhơm, bồ tơngoh, bal mờ bơta tai là tài bơh ală kơnòm bau bơh gờñ ngan, den kơnòm ùr sùm pal sơrbì bơsram mờ gơlam tus là ờ tơl bơta gĭt wă, ờ geh bơta mờng chài bè rài kis hìu bơnhă, broă ròng siam sền gàr kòn. Dilah mờ bơta do gơbàn wih gơbàn wơl den gơlam tus jơnau gơlời wơl dùl rài tơnơ̆ gơlam tus jơnau gơbàn wih gơbàn wơl sùm bè hơ̆ den sơlơ kơn jơ̆ ngan rlau tai.

Jơnau geh ngan bau gờñ mờ bau mờ cau rềp jơi nòi bal gơrềng uă ngan tus bơta niam rài kis. Ală kòn se geh deh bơtờp uă ngan bơta kòp, ờ tơl phan sa bơkah tơl pràn, ờ tơl bơta ròng siam sền gàr. Do kung là jơnau gơlam tus gơmù bơta dờng pràn jơi nòi, gơrềng tus hìu bơnhă kung bè mpồl bơtiàn. Den tàng bè hơ̆, broă mblàng yal, halà bơto yal jơnau gĭt wă ai cau mè in là broă kờñ pal geh sền gròi uă ngan rlau jơh.

Cau cih Việt Phú- Cau mblàng Lơ Mu K’Yến