VOV4.K’ho - Tềng đăp mờ bơta kòp Covid-19 gơtìp kal ke, uă kơnòm dềt pal tam cah is, sền gròi, sơm kòp tài gơtìp kòp Covid-19 ha là tìp rềp mờ cau gơtìp kòp Covid-19, Bộ Y tế neh geh sră nggal sồ 7020 bè broă tam cah is rơcang sơndră mờ kòp gơtờp kơnòm dềt. jăt mờ hơ̆, Bộ Y tế ai gơnoar cau sền gàr in geh lòt bal mờ kơnòm dềt tus hờ hìu sơnơm sơm kòp Covid-19, anih dờp sơm kòp Covid-19, hìu tam cah is tơrgùm bal ha là geh ơm bal mờ kơnòm dềt tŭ tam cah is tàm hìu mờ jơnau hơ geh tam cah is mờ kơnòm dềt, gàr niam broă lơh jăt tơl ală kơrnoăt tàm broă rơcang sơndră mờ kòp Covid-19.

Gơwèt mờ ală cau sền gàr kơnòm dềt ờ gơtùi lòt bal, ơm bal nàng sền gàr kơnòm dềt den gơnoar atbồ geh ai cau sền gàr kơnòm dềt, sồr kuang bàng geh tơl jơnau ngăc ngar, broă lơh chài tàm broă sền gàr, dong kờl kơnòm dềt. Gơwèt mờ kơnòm dềt hờ đơm 16 sơnam là cau lơgar Việt Nam, geh tìp rềp mờ cau gơtìp kòp Covid-19, pal lơh jăt broă tam cah is tàm hìu 14 ngai bơh ngai tìp rềp mờ cau kòp dơ̆ dŭt ndơl mờ pơn jăt tai geh sền gròi bơta pràn kơl dang să jan tàm 14 ngai pơn jăt tai.

Cau mblàng Ndong Brawl