Bulah neh rlau 4 nam do, hìu mai\ pờ tơlik ôs đèng Đồng Nai 3 neh mut lơh đèng, mơya tus tu\ do,  ala\ gơnoar kuơ di pal bơh làng bol cau te\ khà tàm rơndap broa\ lơh gam ờ hềt bơsong geh. Bal mờ rlau 130 hìu làng bol kòn cau di tàm broa\ lơh pal trờn tus ơm kis tiah pa gam ờ hềt dờp geh dùl ba\ ù lơi, git nđờ jơt hìu nha\ ndai geh ù lơh sa, hìu ơm gơbàn dà ngơr bam gam ờ hềt geh tơm di pal. Cau te\ khà tiah do geh jơnau dan mờ Gơnoar ala mat dà  lơgar pal geh broa\ lơh pràn nàng geh tus bal, bơsong geh nàng gar geh gơnoar di pal tus làng bol in.

             Hìu mai\ pờ tơlik ồs đèng Đồng Nai 3 gơ ơm bơh kai ntùng hìu mai\ pờ tơlik ồs đèng  dơ\ 4 bơh đah tô dà dờng Đồng Nai. Hìu mai\ đèng geh bơta pràn  180MW, mờ khà bơcri lơh la 3.600 tơmàn pria\, bơh mpồl at bồ broa\ lơh hìu mai\ pờ tơlik ồs đèng 6, di gah ồs đèng Việt Nam la cau lơh tờm bơcri. Bulah broa\ lơh do neh mut tàm lơh broa\, pờ đèng di rlau 4 nam do, mơya tus tu\ do,  ala\ gơnoar  kuơ di pal ngan  bơh git nđờ rhiang na\ cau te\ khà ơm tàm broa\ lơh do di ntum Đinh Trang Thượng, kơnhoàl Di Linh, càr Lâm Đồng gam ờ hềt bơsong jơh. Cau te\ khà K’ Brền kis tàm bòn 4, ntum Đinh Trang Thượng ai git, tài ua\ ir bòl glar, ờ suk den tàng làng bol neh ua\ dơ\ ngan geh sra\ ya\ bal geh pơyua tus ala\ gơnoar at bồ ala\ kơna\ kờ` geh tus bal bơsong, gơya gam ờ hềt geh dùl anih lơh broa\ geh gơnoar lơi bơsong jơh làng bol in. Cau te\ khà K’ Brền geh jơnau dan mờ Gơnoar ala mat dà lơgar kờ` geh broa\ lơh pràn nàng geh tus bal  bơsong broa\ gam gơbàn do:“Dan ngan mờ Gơnoar ala mat dà lơgar lơh mbè lơi nàng mhar tus bal bơsong tus sền, sền wơl slơ gờ` slơ niam nàng làng bol geh kơnờm. Gờ` geh ù ơm kis lơh sa pa, ai bơh jo\ do sùm lòt lơh ơpah”.

            Tàm 370 hìu nha\ làng bol tàm ntum Đinh Trang Thượng, kơnhoàl Di Linh gơbàn aniai bơh broa\ lơh hìu mai\ pờ tơlik ồs đèng Đồng Nai 3, geh 130 hìu nha\ làng bol kòn cau K’ho di la hìu nha\ pal tus ơm kis ù tiah bòn pa. Geh gơbàn tus tu\ do broa\ ai ơm kis pa tus ala\ hìu nha\ làng bol do gam gơbàn gơ kòl la bơh cau tờm lơh hìu mai\ geh ờ lơh jơh kơnòl tàm broa\ at bồ, nàng lời mơr 3 rhiang lồ ù mờ dà lơgar neh jàu tus broa\ lơh tus ai ơm kis pa bơh làng bol dê gơbàn sơ gràm tis jơh mờ neh geh lơh sa niam bơh ua\ nam lài. Ờ hềt  kờp tus broa\, tus tu\ do,  neh geh 40 lồ kơphê, phan tam mờ hìu ơm làng  bol tàm ù tiah gơbàn gơ ngơr dà bơt gơlik geh tai bơdĩh bơta gơbàn aniai bơh rơndap broa\ lơh hìu mai\ pờ tơlik ồs đèng Đồng nai 3 kung ờ hềt geh sền gròi bơsong geh tơm pria\. Cau te\ khà Nguyễn Văn Đô kis tàm bòn 5, ntum Đinh Trang Thượng, kơnhoàl Di Linh moat ngan đơs:“Tus tu\ do a` neh trờn 5 dơ\ lơh hìu, dơ\ do ờ hềt git ơm tềng lơi tai tài ờ gam ù. Bơh hơ\ tus ndo ờ geh cau lơi sền gròi ờ, sền gơ lơh bè ờ git. Dà ngơr bam jơh phan tam den tàng ờ geh pria\ ai oh kòn in lòt bơsram, neh pal lòt pic ơpah kơphê, lòt jì nhơt, jòi geh dùl ngai 2, 3 sơlòng phe sa kờp ngai”.

            Ồng K’ Wệ kuang at bồ anih duh broa\ làng bol ntum Đinh Trang Thượng, càr Lâm Đồng ai git, tài bơh ờ hềt dờp geh ù ai tus ơm kis pa den tàng rài kis bơh làng bol cau te\ khà  gơbàn aniai ngan tài bơh hìu mia\ pờ tơlik ồs đèng Đồng Nai 3 gơmut tàm bơta bòl glar kla ke ngan. Khà pria\ tơm den ê\t ngan bơh phan tam neh ngui dơ\ jơh gơ bloh, làng bol pal lòt lơh ơpah làm tiah. Tus tu\ do,  neh geh nđờ jơt hìu nha\ gơbàn tàm bơta rbah wơl, oh kòn pal sang bơsram gùl gùng. Tềng đap mùl màl do,  gơnoar at bồ bòn lơgar gơ lơh  ờ git lơh bơta lơi tai. Ồng K’ Wệ đơs:“Đơs ngan la làng bol tàm do neh geh dan ua\ dơ\ ngan gơbloh,  geh tus kơnhoàl, tus hờ càr nàng  geh dan, gơya gam ờ hềt geh go\ bơta lơi. Bơnah ai ù tus ơm kis pa den làng bol gam kơp mờ ù hơ\ nàng gơtùi lơh sa wơl, mơya tu\ do gam ờ hềt geh den kan ngan tàm bơtàu tơngguh lơh sa hìu nha\. Mpồl đơng lam Đảng, anih duh broa\ ntum kung neh dan ua\ dơ\ ngan, dan mờ anih  tờm bơtàu tơngguh ù, anih duh broa\ làng bol kơnhoàl mờ gah at bồ broa\ lơh hìu mia\ đèng 6 mờ gam ờ hềt geh bơsong jơh làng bol in den kung kal ke ngan tus mờ làng bol”.

            Tềng đap bơta  bòl glar kal ke do tài bơh ala\ gơnoar di pal bơh làng bol dê neh ờ geh sền gròi bơsong jơh, sùm lời  jo\ jòng tàm rlau 4 nam do, làng bol  cau te\ khà tàm do kơp kờ` Gơnoar ala mat dà lơgar pal sền gròi bơsong geh. Mơ kung, geh dan mờ Gơnoar ala mat dà lơgar kờ` pal lơh geh broa\ lơh sền gròi tơl làm tus jơh ala\ broa\ lơh hìu mai\ đèng, ngan la broa\ lơh đèng tàm tiah sar  lơgar ngài, tiah làng bol kòn cau kòl yan kal ke tàm Tây Nguyên, geh bè hơ\, den hơ\ sồng gàr niam gơnoar kơ màng di pal tus mờ làng bol.

                                                                                            Cau mblàng K’ Brọp