Kis tàm tiah ƀòn lơgar rơƀah kơnhoàl Ea Súp, càr Dăk Lăk dê, broă bơsram sră gam uă bơta kal ke, ùr ơruh kòn cau Mường oh Hoàng Thị Thu Phương neh sơrlèt mờ ală bơta kal ke, gơkòl nàng lơh geh jơnau kơ̆p kờñ. Tŭ do là cau bơsram dờng nam dơ̆ 4 gah Atbồ Cau lơh broă tàm hìu bơsram Đại họk Lơh broă Mpồl bơtiàn ƀòn dờng Hồ Chí Minh dê, Phương ờ mìng geh cồng nha bơsram sră jăk ngan, mờ gam là cau tàm mpồl lơh broă mpồl bơtiàn tàm hìu bơsram đại họk mờ tàm ƀòn lơgar tờm, sùm tus bal ală broă lơh nùs nhơm dong kờl is. “Cau lơh broă ờ gơtùi ờ tơl nàng bơtàu tơnguh dùl dà lơgar, den tàng añ kơlôi rơ̆p geh dùl gùng dà broă lơh jŏ jòng tus tơnơ̆ do. Mờ tàm hơ̆ tai añ kơlôi là să tờm añ kung geh bơta pràn nàng đơng lam bồ ha là atbồ dùl mpồl lơh broă lơi, den tàng añ bơsram gah atbồ cau lơh broă do. Añ kung kờñ geh lơh broă, geh rê lơh broă mờ ƀòn lơgar, di lah geh den añ rơ̆p rơcang ngan nàng lơh broă tàm kơnhoàl”.

H’ Uyên Byă, ùr ơruh kòn cau Rơđê kis tàm kơnhoàl Krông Bông, càr Dăk Lăk tŭ do là cau bơsram dờng hìu bơsram đại họk tàm ƀòn dờng Hố Chí Minh. Bơh nam bơsram lài ngan tàm hìu bơsram đại họk, H’ Uyên neh ai uă ngan tơngai tus bal ală broă lơh nùs nhơm dong kờl is Kàl rơlôi bơkang tơlir, ai mhàm dong kờl mờ ală broă lơh bơdìh ơdŭ bơsram tàm hìu bơsram đại họk bơyai lơh. Broă lơh bơtơl mờ ală broă lơh dong kờl nùs nhơm is neh dong kờl H’ Uyên geh bơsram tai jơnau git wă, pin dờn, lơh bơnàng jă kơ̆ kơl jăp nàng să tờm gơtùi lơh geh cồng nha mờ broă lơh bơh dùl nă cau pơgru tàm ƀòn lơgar dê. “Tŭ geh bơsram tàm ƀòn dờng Hồ Chí Minh, dùl ƀòn dờng bơtàu tơnguh ngan den añ kơlôi là añ gơtùi ngui ală jơnau tàm broă bơsram sră, ală jơnau git wă mờ añ geh bơsram geh nàng gơtùi rê mờ ƀòn lơgar tờm añ dê, bơto wơl ală jơnau ngăc ngar, ală jơnau git wă hơ̆ nàng ală kơnòm bơsram in, mờ dong kờl añ kơ̆ kơl jăp rơlao tai tàm mpồl bơtiàn tơrgùm bal bè tŭ do”.

Gam gơwèt mờ H’ Sian Êban, kòn cau Rơđê, kis tàm kơnhoàl Krông Păc kơ̆p kờñ geh dong kờl làng bol wă rơlao tai bè adăt boh lam mờ tơrmù uă ngan hoàc huơr tŭ geh broă gơrềng tus mờ adăt boh lam dê, bơh dềt oh neh kờñ lơh ngan bơsram jăk nàng gơs dùl nă cau chài cah rơña niam ƀòn lơgar dê. Tŭ do gam bơsram nam dơ̆ 3 tàm hìu bơsram Anih cah rơña ƀòn dờng Hà Nội, H’ Siam ờ mìng geh cồng nha bơsram sră jăk mờ gam là cau geh pơnrơ ngan at gơnoar broă cau lam bồ broă lơh, ñhăp ñhar tàm ală broă lơh mpồl cau dê. H’ Sian lơh ngan bơsram jăk nàng rê mờ ƀòn lơgar tŭ neh jơh bơsram. “Bơh sơnrờp jơnau kơ̆p kờñ lòt bơsram añ dan mờ mè bèp là kòn rơ̆p rê tàm Dăk Lăk nàng bơtàu tơnguh ƀòn lơgar. Geh uă ngan bơta tàm bơdìh ne, mơya ală cau lùp là lơh broă niam bè hơ̆, lơh ngan bơsram bè hơ̆ den gơtùi ơm tơn tàm do lah ờ nàng bơtàu tơnguh, añ đơs là ờ, añ rơ̆p rê càr Dăk Lăk nàng bơtàu tơnguh jơi bơtiàn añ dê”.

Càr Dăk Lăk geh git nđờ rơbô nă cau bơsram dờng jơi bơtiàn ờ gal cau gam bơsram tàm ală hìu bơsram đại họk, cao đẳng tàm gùt lơgar. Tàm hơ̆ geh uă cau bơsram dờng neh lơh ngan tàm broă bơsram sră, tus bal ală broă lơh tài mpồl bơtiàn tàm hìu bơsram mờ bơdìh hìu bơsram. Do kung là ală bơta tờm niam tàm ală broă lơh đoàn mpồl tàm hìu bơsram đại họk, cao đẳng kung bè tŭ rê mờ ƀòn lơgar ơm kis mờ lơh broă.

Lŏ H’ Giang Niê, Ƀí thư Tỉñ đoàn, Củ tịc Mpồl Cau bơsram dờng Việt Nam càr Dăk Lăk pà git, mờ gơnoar broă bal mờ kơnòl bơh să tờm dê, mpồl lơh broă đoàn, mpồl cau bơsram dờng sùm ai tơl bơta niam nàng ală cau bơsram dờng in, tàm hơ̆ uă ngan là cau bơsram dờng jơi bơtiàn ờ gal cau tus bal tàm broă lơh đoàn, mpồl. Ală mpồl “Cau bơsram dờng 5 niam” tàm ală hìu bơsram đại họk geh lơh mờ tơngu me bal mờ broă lơh geh uă bơta ngan, hòi jà geh gal cau bơsram dờng tus bal. “Bol añ kờñ wèt tus là ală bơyô cau bơsram dờng pal wă is să tờm, ai is gùng dà broă lơh bơh să tờm kờñ lòt mờ bol añ lơh broă bal mờ ală bơyô tàm broă bơsram tàp jơnau git wă boh bơr mpồl bơtiàn. Bơdìh jơnau bơsram tàm hìu bơsram, pal geh jơnau git wă tàm mpồl bơtiàn, tàm hơ̆ geh bơta kwơ màng ngan bol añ kờñ ală bơyô git là, he pal geh gơnoar, kơnòl tàm broă prăp gàr, ngui niam bơta niam chài bơh tơl jơi bơtiàn dê mờ bơh tŭ hơ̆ ală bơyô rơ̆p là cau lam lơh ñhăp ñhar nàng lơh geh uă ală bơta niam, niam bơnĕ tàm mpồl bơtiàn”.

Tơngăc ƀòn lơgar, ală cau bơsram dờng jơi bơtiàn ờ gal cau tàm càr Dăk Lăk neh lơh ngan bơsram sră, tơrgùm jơnau ngăc ngar, bơsram tàp jơnau git wă tàm ală hìu bơsram đại họk, cao đẳng kung bè pơgồp bal bơta pràn tàm uă broă lơh tài mpồl bơtiàn. Geh tus bal mờ ală tiah bơsram sră pa, ală cau bơsram dờng lơh ngan sùm, lơh ngan mờ kung gam wèt nùs nhơm kờñ rê mờ ƀòn lơgar, kơ̆p kờñ geh lơh broă nàng bơ̆t bơtàu ƀòn lơgar tờm. Do là ală bơta tờm, niam pơgồp bal geh bơta pràn tàm broă bơtàu tơnguh càr Dăk Lăk dê kung bè mpồl bơtiàn bơh tơl jơi bơtiàn dê tàm tơngai tus.