Bơh iăt jơnau yal, Tổng Ƀí thư ồng Tô Lâm đơs niam ngan ală cồng nha pơnrơ bơh càr Bắc Ninh dê lơh geh tàm jơh ală broă. Bal mờ broă ai gĭt loh ală bơta pràn bơta ƀươn bơh tiah do dê, Tổng Ƀí thư sồr, tơngai tus, càr Bắc Ninh pơn jăt tai tơrgùm sền gròi broă lơh bơ̆t bơtàu lơh niam wơl Đảng, ală anih lơh broă cíñ trị, tam gơl pa gùng dà đơng lam, nàng jơnau sồr jơnau lơh nền tàm pơrjum Đảng dê mùl màl gơlòt mŭt tàm rài kis; Tềng đăp măt sồr lơh geh cồng nha Pơrjum dờng Đảng ƀộ ală kâp mờ Pơrjum dờng Đảng ƀộ càr dơ̆ XXI tơngai lơh broă bơh nam 2025- 2030; pơn jăt tai lam lơh jăt kràñ broă rơndăp tăp sèng rơndăp mpồl lơh broă cíñ trị tiah do dê tơrmù dipal, lơh broă pràn, lơh broă gơtùi mờ geh cồng nha jăt di jơnau sồr bơh Dà lơgar dê.

Tổng Ƀí thư kung sồr càr Bắc Ninh tơrgùm sền gròi, bơtàu tơngguh uă rài kis làng bol tàm ù tiah do dê, sền gròi prăp gàr bơtàu tơngguh ală bơta kwơ niam chài gơcèng uă bơhiàn niam chài krơi is tiah do dê. Di dơ̆ rơcăng wă rò sơnam pa Sa tềp bơhiàn dà lơgar nam Ất Tỵ 2025, Tổng Ƀí thư ồng Tô Lâm neh còp mờ nting bơr chờ gờm Sa tềp cau lơh phan cau lơh broă mờ đơs sồr sơnđờm lơh “Hìu duh kah Wa Hồ mờ sươn nhơl bal Văn Miếu”, tàm ƀòn dờng Bắc Ninh.