Jơnau lơh nền tàm pơrjum sồ 57 bơh Ƀộ Cíñ trị dê ai lơh jăt ngai 22 nhai 12 nam 2024 đơs sùm bơtàu tơngguh jak chài, măy mŏk, tam gơl pa bơceh lơh mờ tam gơl sồ gam là jơnau lơh nền bơtàu tơngguh bơh ală dà lơgar dê; là bơta lài ngan lơh nền, tŭ jiơ niam ngan rlau jơh nàng lơgar he bơtàu tơngguh pas pràn, khin cha jak chài tàm rài pa- rài brồ să bơh jơi bơtiàn dê. Mpồl Sồr lơh Dà lơgar bè bơtàu tơngguh jak chài, măy mŏk, tam gơl pa bơceh lơh mờ tam gơl sồ geh tơnggơs, bơh Tổng Ƀí thư ồng Tô Lâm lơh Cau Lam bồ Mpồl. Tơnggơs Mpồl duh broă Tă pơgồp jơnau đơs Dà lơgar bè bơtàu tơngguh jak chài, măy mŏk, tam gơl pa bơceh lơh mờ tam gơl sồ bal mờ bơta tus bal bơh ală cau gĭt wă jrô broă do tàm lơgar mờ bơdìh lơgar.

Uă cau gĭt wă jrô broă do dê đơs là, Jơnau lơh nền tàm pơrjum sồ 57 bơh Ƀộ Cíñ trị dê nhơm càl pa, sòl pơnđàng gùng lòt brồ guh hờ đăp bơh jơi bơtiàn Việt Nam dê. Hơ̆ là mìng geh lòt mŭt tàm măy mŏk pa, tam gơl sồ pràn kơldang, Việt Nam hơ̆ sồng gơtùi guh mhar, guh pràn mờ kơ̆ kơljăp nàng pas pràn khin cha jak chài, tơngơh jơnhoa bồ mờ tơ ƀă pơnì bal mờ ală lơgar dờng pràn pram câu. Bal mờ hơ̆, Jơnau lơh nền tàm pơrjum pơn jờng khin cha, geh ală gùng dà broă lơh lơh tơrlòng lài, is rơmis nàng gơhòi gơ jà cau jak mờ lơh mhar tam gơl pa bơceh lơh dà lơgar dê. Jơnau lơh nền tàm pơrjum tơnggŏ geh bơta kơ̆p kờñ sùm brồ guh bơh jơi bơtiàn dê.