Đơs tàm dơ̆ sồr lơh tàm pơrjum, Tổng Ƀí thư ồng Tô Lâm đơs nền, măi mok pa là bơta pràn tờm ngan tàm broă bơtàu tơnguh lơh sa mpồl bơtiàn bơh uă lơgar tàm dunia dê, dong kờl lơh gơguh cồng nha lơh broă bal mờ bơta pràn tàm pơrlòng bơh dà lơgar dê.

Den tàng, mờ jơnau kờñ gơs lơgar lơh sa mờ măi mok pa tàm nam 2030 mờ lơgar bơtàu tơnguh, priă geh uă tàm nam 2045, gùt lơgar pal sền măi mok pa, tam gơl bơceh lơh mờ tam gơl sồ là bơta pràn tờm ngan. Bè kơnòl bơh gùt mpồl lơh broă cíñ trị dê tàm tơngai tus, Tổng Ƀí thư sồr, nàng ai Jơnau lơh nền mŭt tàm rài kis geh cồng nha mờ di tŭ; ală kấp, ală gah lơh broă, ală càr, ƀòn dờng pal at tê mơ tàm lơh broă, ờ gơtùi lơyài. Tổng Ƀí thư sồr jal mhar lơh gơs gùng dà broă lơh tàm nam 2025, sơlơ gờñ sơlơ niam pal lơh gơs broă tam gơl, bơtơl ha là ai tơlik pa ală jơnau geh ai tàm adăt boh lam dê, gùng dà broă lơh, bơsong jơh ală tiah gơtìp kòl, lơh kal ke nàng bơtàu tơnguh măi mok pa, tam gơl pa bơceh lơh mờ tam gơl sồ, tơnklàs uă ngan bơta pràn bơceh lơh, pơlam broă khin kơlôi, khin lơh, khin dờp kơnòl.