Nùs nhơm sơnam pa gơlơh bè gam tus gờñ rlau mờ ală bồt tiah đah Jum Mat tơngai mut bơh Dà lơgar dê mờ nùs nhơm kờñ gơboh bơh làng bol hơđang ù gờl pơyoa tus kwang bàng mờ cau ling, làng bol tàm ală bồt ngài in.

Dơ̆ yồng bồng bi tàm bồt Hòn Khoai, kơnhoàl Ngọc Hiển, càr Cà Mau, ơm ngài mờ hơđang ù gờl pơgăp 14 kơi sồ. Tiah do là tiah lam lài tŭ bơh dà lềng tiah đah mat tơngai Lik mut tàm tiah dà lềng đah Jum Mat tơngai mut bơh Dà lơgar dê, geh pơn yơu bè dùl tiah lam lài ơm gak sền gàr kơl wàng trồ mờ tiah dà lềng mờ ală ù tiah đah Jum Mat tơngai mut Dà lơgar dê. Geh sền gŏ bồng bi pơn yờ să par tàm cồng càl tàm gùl dà lềng, đơs mpoong jơnau đơs crih Dà lơgar uă cau ờ gơtùi mpồn jai bơta ngoh rơngăc tŭ dơ̆ sơnrờp geh yồng bồng bi tàm nggùl bồt ngài dê: “Tŭ ñă bal mờ ală cau ling tàm bồt, tus bal dùl dơ̆ yồng bồng bi oh gŏ hơ̆ là dùl bơta hờn chờ dờng màng ngan gơwèt mờ să tờm oh dê”

Mờ rlau 150 nơm bồt dờng dềt, lă jòng ơnàng tàm jơh gùt tiah dà lềng đah Jum Mat tơngai mut dê, tiah geh làng bol ơm kis, tiah mìng geh mpồl ling lơm. Bàr pe tiah bồt ù tiah kơh ngan, bơnơm lŭ lơm, lòt rê kal ke. Mơya sơrlèt gan jơh ală bơta, ală cau ling bơh mpồl rada, mpồl ling sền gàr tiah nhàr lơgar... ndrờm ià kơ̆ ngkơr phàu, 24 jơ tàm 7 ngai ơm gak sền gàr kơl wàng trồ, tiah dà lềng, jat sền tơl broă lơh bơh ală ơhò, plung mờ jơnau kờñ tềng hơđang kơlwàng trồ lơyah nàng yal mờ cau đơng lam in di tŭ; là tiah kơldìng kơ̆ kơl jăp ai làng bol tras kŭp ka in tŭ ờ bơtoah gơtìp kòp tê jê să halà rềs àr tàm ơhò tŭ gam tras kŭp phan tàm dà lềng. Đại úy Nguyễn Tuấn Anh, Atbồ Anih ra đa 625, trung đoàn 551, Gah đơng lam tiah 5 Ling dà lềng pà gĭt: “Anih neh lam lơh jat niam kơnòl broă crăp rcang sền gròi gĭt gŏ yal jơnau kờñ tàm tiah do dờp lơh gàr niam ngan ală broă lơh ơm gak, is ồn là ơm găk crăp rcang tam lơh di tŭ yal jơnau yal bơta tàm tiah dà lềng tềng hơđang kơl wàng trồ lơyah yal ai Sở đơng lam ală kấp in pơgồp bơnah atbồ, sền gàr kơ̆ kơl jăp tiah dà lềng geh jàu kơnòl”.

 Geh bơta sền gròi bơh Đảng, Dà lơgar, bơta sơm bat tê bal bơh làng bol dê, ală tiah bồt đah Jum mat tơngai mut tŭ do gam tam gơl pa pah ngai, ală phan bơna bơt bơtàu gùng lòt rê, hìu sơnơm, sơntèk dơng dà bè ờs, gùng che ồs đèng, hìu bơsram mầm non tus kấp 2 lơh dồ ròt bal, dong làng bol ƀuơn rlau tai tàm rài kis pah ngai mờ bơtàu tơnguh lơh sa. Geh Dà lơgar mờ Anih priă jền ai càn priă dong kờl ờ sa priă cồng uă, den tàng tŭ do bơdìh mờ broă tras kŭp ka tàm dà lềng, uă cau tras kŭp ka kung neh khin cha bơcri priă ròng ka gŭ pơgồp bal mờ bơtàu tơnguh lòt nhơl den tàng rài kis ngai sơlơ bơtàu tơnguh rlau: “Añ gŏ broă ròng phan tàm dà den gơ geh bơta ƀuơn, bơta pràn. Tàm do geh bơta ƀuơn là tàm vịñ den ờ geh càl rbŭt, dà sàng ngan den ală bơta phan tàm dà dờng mhar, bơta niam uă. Nam 2024 tăc geh 10 tấn phan tàm dà priă cồng lơh geh bàr pe rơhiang tơlak đong”.

Nùs nhơm nam pa gơ lơh bè gam rê gờñ rlau tàm ală bồt mờ ală dơ̆ đơs crih tam ya, pà phan sa tềp cèng bơta bơkah pơn rơ bơh ală kơnhoàl ù tiah dê  mờ mpồl lơh broă gam jàu pà ai ală phan cau ling mờ làng bol tàm bồc in tai; mờ is ồn dùl broă lơh ờ gơtùi ờ geh là klơm mbar lơm pòng mờ nha prìt, phan lơh mbar den geh ală cau ling lơh bơh nha lơ u.

Bơh dơ̆ lòt lơh broă dơ̆ do, tơl nă cau tàm mpồl wă rlau tai bè rài kis lơh sa- mpồl bơtiàn, bơta bơsram sră, rài kis pah ngai, lơh broă mờ nùs nhơm rcang chờ hờp sơnam pa bơh kwang bang, cau ling mờ làng bol tàm kơnhoàl tiah dà lềng đah Jum Mat tơngai mut dê, wă rlau tai bè ală tă pơgồp, phi să ngềt ngơ̆t bơh cau ling dà lềng dê; bè bơta khin cha bơh làng bol tàm bồt dê tềng đăp ală bơta kal ke, gàr kơ̆ kơl jăp gơnoar tờm bồt bơlào, bơtàu tơnguh lơh sa sơm bat tê bal ai ală bồt gơ gơs ală tiah bồt tơlir niam, pas gơs tàm nggùl dà lềng Dà lơgar dê.