Tus tŭ do, broă lơh neh lơh sir, tàm jàu rlau 44 rbô nơm hìu nàng ală hìu bơnhă in geh mŭt ơm tàm hìu pa; mơkung gam lơh rlau 34 rbô nơm hìu. Tus tŭ do, jơh gùt lơgar gam pơgăp 240 rbô nơm hìu ing, hìu ồm sèt ñhăt dà mìu kờñ pal tơrgùm lơh pa mờ lơh niam wơl nàng lơh sir bơh tŭ do tus lồi nam 2025. Ala măt Mpồl Sồr lơh dê, Thủ tướng ồng Phạm Minh Chính cih dờp, đơs niam ngan mờ jờng rơ Ƀộ Lơh broă Cau ling sồt să mờ Mpồl bơtiàn, Ƀộ Ling klàng, Ƀộ Kwang àng, ală ƀộ, anih lơh broă, ală tiah neh rơcăng lài, jơh nùs lơh jăt geh cồng nha ală kơnòl broă, broă lơh neh sồr lơh, pơgồp bơnah tàm ală broă lơh geh bơh sơnrờp niam ngan bơh Broă lơh dê.

Thủ tướng ồng Phạm Minh Chính đơs sùm, broă lơh sir tơn jơh hìu ing, hìu ồm sèt ñhăt dà mìu là dùl kơnòl broă cíñ trị is ồn kwơmàng neh geh tơnggŏ loh tàm ală Jơnau đơs pơndŭt, Jơnau lơh nền tàm pơrjum, Jơnau sồr lơh bơh Đảng Dà lơgar dê, Ƀộ Cíñ trị, Mpồl Đơng lam Đảng Dà lơgar, Quôk hội, Cíñ phủ, Thủ tướng Cíñ phủ dê, wèt tus tơngkah kir sơnrai ală ngai chờ dờp tàm nam 2025 mờ tàm pơrlòng lơh geh cồng nha hờn chờ wă rò Pơrjum dờng Đảng ƀộ ală kâp, wèt tus Pơrjum dờng Đảng gùt lơgar dơ̆ XIV.