VOV4.K’ho- Broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021- 2030 lơh ngan tus nam 2030 gơmù 50% xã kal ke uă ir mờ gơmù 70% thôn, ƀòn làng bol jơi bơtiàn pơndrờm mờ tŭ do. Nàng lơh geh jơnau kờñ do, bơdìh mờ priă bơcri bơh Dà lơgar, bơta lơh ngan jơh nùs bơh jơh ală anih lơh broă chính trị dê den kờñ ngan bơta dùl nùs bal, tơrgùm bal pràn bơh ală rơnàng làng bol dê.

 Ngai 18/6/2021, Ủy ban Jơi bơtiàn kòn cau ai ngui Kơrnoat sồ 433, kĭ ring bal 22 rbô 27 thôn kal ke uă ir tiah làng bol jơi bơtiàn kòn cau dùl êt nă cau mờ tiah kơh bơnơm gơwèt 40 càr, ƀòn dờng. Do là cơng tàng nàng lam lơh ală broă lơh bơcri priă, dong kờl bơtàu tơnguh lơh sa- mpồl bơtiàn bơh priă jền kes priă Dà lơgar tơngai bơh nam 2021- 2025.

Jăt hơ̆, thôn kal ke uă ir là thôn geh khà hìu bơnhă rƀah bơh 20% rlau hơđang (gơwèt mờ tiah ring dà dờng Cửu Long là bơh 15% rlau hơđang halà geh rlau 30% hìu bơnhă jơi bơtiàn kòn cau dùl êt nă cau rƀah tàm dùl thôn). Ală thôn geh khà hìu bơnhă rƀah bơh 15% tus hơđơm 20% (gơwèt mờ tiah ring dà dờng Cửu Long bơh 12% tus hơđơm 15%), dilah geh rlau 60% hìu bơnhă rƀah là hìu bơnhă jơi bơtiàn kòn cau dùl êt nă cau tàm kờp jơh khà hìu bơnhă rƀah bơh thôn dê; Ờ hềt geh gùng lòt bơh thôn tus tiah tờm xã halà geh gùng mơya lòt rê kal ke ngan, ngan là kàl mìu; Ờ hềt geh gùng che ồs đèng dà lơgar halà neh geh mơya rlau 30% khà hìu bơnhă ờ hềt geh ngui gùng che ồs đèng dà lơgar den geh sền là thôn kal ke uă ir.

Broă jàu nền nòn rlau pơndrờm mờ tơngai lài den tàng tàm tơngai bơh nam 2021- 2025, khà thôn kal ke uă ir gơwèt tiah jơi bơtiàn kòn cau dùl êt nă cau mờ tiah kơh bơnơm gơmù uă. Bơta do lơh gơdờp tus broă lơh jăt broă lơh tàm ală tiah dê; tàm hơ̆ lơh gơdờp loh làng ngan, mhar ngan là tàm gah broă lơh sơnơm mờ bơto bơtê.

Bơta geh ngan pà gŏ, tŭ ƀòn ơm kis gơ ơm tàm sră cih mat kal ke uă ir, làng bol geh dờp broă dong kờl bơh Dà lơgar dê tàm dùl tŭ tơngai jŏ. Den tàng bè hơ̆, tŭ ờ gam geh dờp tai, bàr pe bơnah làng bol geh nùs nhơm muăt jrùm mờ lùp bè bơta tam gơl do.

Ồng Giàng A Sáu- Kuang ătbồ thôn Đồng Ruộng, xã Kiên Thành, kơnhoàl Trấn Yên, càr Yên Bái là dùl tàm ală thôn lik klàs bơh sră cih mat thôn kal ke uă ir tàm tơngai tus yal bè jơnau kờñ hòi jà làng bol tàm tơngai pa. Ồng Giàng A Sáu, yal bè do: Lơh ngan mblàng yal, hòi jà ală oh lòt bơsram tơl, ƀan lời cau lơi gơtìp lời ơm wơl bơh ngkời. Tơnơ̆ hơ̆ kung mblàng yal ai làng bol in blơi sră bảo hiểm y tế 100%.

Pal đơs ngan là, ală tam gơl bè ƀòn lơgar kal ke uă ir jăt Kơrnoat sồ 861 mờ Kơrnoat 433 ngan ngồn geh lơh gơdờp tus broă lam lơh broă lơh tàm kơnă hơđơm; kuơmàng là lơh gơdờp tơn tus uă hìu bơnhă, ngan là hìu bơnhă làng bol jơi bơtiàn kòn cau dùl êt nă cau rƀah. Ƀòn lơgar kal ke uă ir geh bơta tam gơl kung lơh gơdờp tus uă cau, ngan là kơnòm bơsram, cau pơgru, kuang bàng, công chức, viên chức, cau lơh broă ơm kis mờ lơh broă tàm tiah kal ke uă ir. Kơnòm bơsram ờ geh dờp broă dong kờl pơn jăt bal bơta pal geh bơh ală hìu bơnhă làng bol jơi bơtiàn kòn cau dùl êt nă cau tiah kơh bơnơm, tiah sar lơgar ngài ờ gàr tơl digơlan geh gơlam tus broă hòi jà kơnòm bơsram lòt bơsram kal ke, gơguh jơnau digơlan kơnòm bơsram sang tĕ bơsram mờ gơmù khà tơryang lòt bơsram, lơh gơrềng tus cồng nha bơto bơtê, bơto bơtơl, tơn jơh bơta ờ gĭt sră, ngan là gơwèt mờ ală kơnòm bơsram hìu ngài ir mờ hìu bơsram, mè bèp kơnòm bơsram ờ geh tơl bơta lòt jun rò kòn pah ngai. Mơya, nàng mè bèp mờ kơnòm bơsram in gĭt wă bè broă dong kờl pa bơh dà lơgar dê, gah bơto bơtê càr do neh rơcăng lài tơlik ală broă bơsong.

Ồng Đào Anh Tuấn- Phó Sở Giáo dục mờ Đào tạo càr Yên Bái, pà gĭt: Sở neh đơng lam, pơgồp bal mờ ală anih lơh broă geh gơrềng, ală tiah nàng lơh pràn broă lơh mblàng yal, hòi jà, hòi tơrgùm kơnòm bơsram lòt bơsram. Sở neh geh broă rơndăp lơh, lam lơh srơh tàm dong tàm ròng bal tàm jơh gùt gah bơto bơtê, nàng kờñ dong kờl ală kơnòm bơsram tiah jơi bơtiàn kòn cau dùl êt nă cau, tiah làng bol geh rài kis lơh sa- mpồl bơtiàn kal ke bal mờ jơnau đơs là “hìu bơsram dong hìu bơsram, ơdŭ dong kờl ơdŭ, kơnòm bơsram tiah geh rài kis niam rlau dong kơnòm bơsram geh rài kis kal ke”. Tơrgùm kờp sền ală cau ờ geh dờp bơta dong kờl tài bơh ală xã, thôn neh geh lik bơh tiah kal ke uă ir, nàng hòi jà tă pơgồp ală priă jền jăt gùng dà mpồl bơtiàn lơh bal, dong kờl ală oh là kơnòm bơsram geh rài kis kal ke, rơndăp ai ală kơnòm bơsram ơm ngài mờ hìu bơsram mơya ờ gơtùi rê tàm ngai mờ ờ geh dờp ală bơta dong kờl den geh pơn jăt tai geh ơm wơl tàm hìu ơm sa ngai bơh hìu bơsram dê.

Tơl nă làng bol pal gĭt wă geh là, lơh sa- mpồl bơtiàn ngai sơlơ bơtàu tơnguh, rài kis phan bơna mờ nùs nhơm geh sơlơ tơnguh tai ndrờm bal mờ broă ală broă dong kờl bơh Dà lơgar geh gơmù tĕ. Nàng lơh jăt ngan ngồn jơnau kơ̆p kờñ ngan brồ guh lơh pas den ờ gơtùi geh nùs nhơm “rơngòt pas” mờ pal lơh ngan jơh nùs, bơta kơ̆p kờñ pơđơl pràn is, lơh ngan is, kơ̆p kờñ sùm mhar brồ guh.

Ai gơwèt mờ gơnoar ătbồ mờ mpồl kuang bàng, kuang đơng lam bồ tàm kơnă hơđơm, ngan là ală ƀòn lơgar kong gơrềng bơh broă lơh dê, ờ geh jơnau đơs kal ke, mìng geh bơta lơh ngan jơh nùs lơh. Bal mờ hơ̆, ală tiah pal rơcăng lài, bơceh pa tàm tŭ hòi jà tă pơgồp, pơgồp bal, ngui geh cồng nha priă jền bơcri ai broă lơh gơmù rƀah in, sền ngac tus broă lơh niam broă bơto broă lơh, bơsong broă lơh, rề ơnàng broă lơh broă sa, tơnguh uă priă lơh geh ai làng bol tàm ală ƀòn lơgar in nàng làng bol in ờ gam kơlôi sơnơng, kơlôi rơcăng tai tŭ kong gơrềng tài bơh broă dong kờl pa.

Bơta mŭt lơh bal geh kơnòl bơh gơnoar ătbồ kơnă hơđơm dê, bal mờ bơta tơrgùm bal pràn, dùl nùs bal bơh ală rơnàng làng bol dê geh lơh ai priă bơcri, dong kờl bơh kes priă dà lơgar dê ngui geh cồng nha. Nàng bơh hơ̆, tiah làng bol jơi bơtiàn kòn cau dùl êt nă cau mờ tiah kơh bơnơm “ờ gơtìp lời ơm wơl bơh ngkời”, bal mờ jơh gùt lơgar lơh geh jơnau kờñ bơh Kơrnoat Pơrjum dờng dơ̆ XIII bơh Đảng dê là ai dà lơgar he gơ gơs là lơgar bơtàu tơnguh geh priă lơh geh uă tàm nam 2045.

Jăt VOV4- Cau mblàng Lơ Mu K’Yến