VOV4.K’ho– Tàm càr Kon Tum, broă lơh mblàng yal bè tĕ khà Quốc hội khóa 15 mờ Hội đồng Nhân dân ală kấp gam geh chồl pràn lam lơh. Kơnờm gơtùi lam lơh li la broă mblàng yal den tàng làng bol ƀuơn git jơnau yal, git loh rlau bè jơnau gơtha mờ bơta kuơmàng bơh dơ̆ tĕ khà dê kung bè gơnoar, kơnòl bơh he dê gơ wèt tus mờ broă dờng màng ngan jơi bơtiàn dê.

Ală ngai do, tus jơh 84 thôn, tổ dân phố 11 xã, thị trấn bơh kơnhoàl Đăk Hà dê, tềng lơi kung sền gŏ duh hồl ngan nùs nhơm wèt hờ ngai chờ dờng bơh jơi bơtiàn dê, ngai tĕ khà Quốc hội khóa 15 mờ Hội đồng Nhân dân ală kấp. Mò Nguyễn Thị Thắm, Kuang atbồ Phòng Văn hóa- Thông tin kơnhoàl Đăk Hà pà git, tàm broă lơh mblàng yal bè tĕ khà dơ̆ do, bal mờ ală broă lơh ờs mờng, kơnhoàl neh sền gròi, gơtùi tơnguh bơta pràn bơh công nghệ thông tin dê dong cau tĕ khà mờ làng bol geh uă bơta sac rơwah tàm broă dờp jơnau yal: “Bol hi ngui công nghệ thông tin tàm broă lam lơh broă mblàng yal. Làng bol gơtùi iat tơn ală jơnau tơnggit mblàng yal tĕ khà bơh điện thoại at tê ngac ngar is he dê. Bol hi kung sền gròi ngan tus broă mblàng yal bơh Zalo, Facebook, hơ̆ là pang web jơnau yal tơnggit gơlik geh pah ngai Đăk Hà, jơnau tơnggit Đăk Hà, Đăk Hà 24 jơ. Hơ̆ là ală pang web bơh ală anih lơh broă, ală mpồl ling mblàng yal tơn crơng gơs mờ atbồ nàng lam lơh broă mblàng yal tus mờ làng bol”.

Mblàng yal tĕ khà tàm pang web jơnau tơnggit kơnhoàl Đăk Hà

Đal git broă lơh mblàng yal bè tĕ khà là kơnòl chính trị kuơmàng, gơnoar atbồ bal mờ ală cơldŭ lơh broă, mpồl lơh broă geh gơnoar bơh kơnhoàl Đăk Hà dê lời ai bơta sền gròi uă ngan ai kơnòl broă do in. Mò Phạm Thị Thương, Phó Chủ tịch Thường trực Ủy ban Nhân dân kơnhoàl Đăk Hà, Phó Kuang atbồ Ủy ban tĕ khà kơnhoàl pà git, nàng làng bol in ƀuơn git jơnau yal, kơnhoàl neh lam lơh mblàng yal bè tĕ khà jat tơl tơngume, tơl tŭ tơngai mùl màl mờ sền gròi tus broă lam lơh li la broă yal tơnggit, mblàng yal: “Kơnhoàl pờ ală pang web, tơngume tàm anih pờ tơlik jơnau đơs, sơñio rùp bơh kơnhoàl dê. Hơ̆ sồng pờ tơlik tàm ală pang web yal tơnggit tàm điện tử, ală pang mạng xã hội mờ kơnhoàl crơng gơs. Ală anih lơh broă mờng chài ală xã, thị trấn den mblàng yal tàm rơndeh làm bă tiah mờ tàm loa pờ tơlik jơnau đơs ờ geh che. Mblàng yal mờ broă lơh pơn jờng ƀàng điện tử, hơ̆ sồng pano, áp phích. Bal mờ hơ̆, kơnhoàl kung đơng lam, pơlam lơh jat tus mờ kuang bàng, công chức, viên chức mờ làng bol in nàng git loh ală jơnau cih, jơnau sồr, bơh hơ̆ lam lơh gơnoar mờ kơnòl tĕ khà he dê mờ să tờm he lòt is tĕ khà”.

Mblàng yal tĕ khà bơh loa pờ tơlik jơnau đơs tàm kơnhoàl Đăk Hà

Kơnờm lam lơh li la bè broă bơyai lơh, tơngume mblàng yal den ƀuơn kah, ƀuơn wă den tàng jơh ală cau tĕ khà mờ làng bol kơnhoàl Đăk Hà ndrờm git loh bè tĕ khà, bè gơnoar, kơnòl he dê tàm tĕ khà. Ồng Trần Đình Vân, 72 sơnam ơm tàm tổ dân phố 7, thị trấn Đăk Hà pà git, tàm tổ dân phố ồng dê, cau tĕ khà mờ làng bol ndrờm git loh jơnau yal bè tĕ khà. Ală ngai do làng bol gam cribơyai duh hồl ngan bè 8 nă cau tơlik mat tĕ khà kuang bàng Quốc hội khóa 15, 85 nă cau tơlik mat tĕ khà Hội đồng Nhân dân càr, 58 nă cau tơlik mat tĕ khà kuang bàng Hội đồng Nhân dân kơnhoàl mờ ală cau tơlik mat tĕ khà Kuang bàng Hội đồng Nhân dân thị trấn nàng ngai 23/5 do in ai tơnggŏ gơnoar, kơnòl he dê bơh tơl sră pồ. 

Mpồl lòt sền broă tĕ khà bơh Ban Thường trực Ủy ban Mặt trận dà lơgar Việt Nam dê đơs niam broă mblàng yal bè tĕ khà bơh kơnhoàl Đăk Hà dê

Ồng Trần Đình Vân pà git: “Nam do geh broă dờng màng ngan là tĕ khà Quốc hội mờ Hội đồng Nhân dân ală kấp. Bol hi là ală cau kis tàm ƀòn lơgar den sùm sền gròi ngan, dờp jơnau yal mờ uă gah bè bơh tàm loa pờ tơlik jơnau đơs, sơñio rùp, pơrjum tàm tổ dân phố, pơrjum chi bộ, pơrjum cau dờng sơnam. Jơh ală dơ̆ pơrjum hơ̆ ndrờm mblàng yal mờ ndrờm đơs tus tĕ khà Quốc hội mờ Hội đồng Nhân dân ală kấp. Bol hi pin dờn ngan là geh rơ wah ală cau geh nùs nhơm, geh pràn jak, geh bồ tơngoh mờ geh bơngă pin dờn gơ wèt tus mờ làng bol”.

 Cau mblàng K’Duẩn