VOV4.K’ho - Drim òr (22/04), Ủy ban Mặt trận dà lơgar Việt Nam càr Kon Tum lam sồr dơ̆ lam sồr nàng lơh tam gơl nùs nhơm kơlôi sơnơng, broă lơh bơh làng bol kòn cau, dong kờl làng bol sơrlèt mờ rơƀah kơl jăp.

                                        Dơ̆ kĭ hơ bal lơh jăt broă pơrlòng bơh dơ̆ lam sồr

Càr Kon Tum geh rơlao 53% khà kờp làng bol là kòn cau geh rài kis gam gơtìp kal ke. Geh bơta do tài bơta ngăc ngar tàm broă bơsram sră gam ờ uă; gam geh nùs nhơm kơ̆p gơn, kơnờm tàm broă dong kờl bơh Dà lơgar; ờ hềt gĭt ngui khoa học kỹ thuật tàm broă lơh sa.

Nàng tam gơl nùs nhơm kơlôi sơnơng, broă lơh bơh làng bol kòn cau, lơh làng bol kòn cau in klàs mờ rơƀah kơl jăp, Ủy ban Mặt trận dà lơgar Việt Nam càr Kon Tum ai 5 kơnòl tờm, hơ̆ là: Lam sồr, yal ală gùng dà broă lơh, tàm hơ̆ uă ngan là gah ù tiah, tơmù rơƀah kơl jăp, bơ̆t bơtàu ƀòn lơgar pa tus mờ làng bol kòn cau; yal ală broă lơh niam, broă lơh geh cồng nha; bơto sồr làng bol kòn cau rơƀah mờ ndrờm mờ rơƀah ngui geh cồng nha bơta pràn hìu nhă, priă càn nàng tơnguh bơtàu broă lơh sa; bơto sồr làng bol tam gơl ală bơta phan tam, phan ròng; tus bal tam brê, sền gàr mờ atbồ brê.

Cau mblàng Ndong Brawl