VOV4.K’ho– Nhai 6 nam do, ală xã, thị trấn bơh kơnhoàl Ia Grai, càr Gia Lai dê ndrờm lik bơh sră cih mat xã, thị trấn kal ke mờ uă kal ke jat Kơrnuat sồ 861 ngai 04/6/2021 bơh Thủ tướng Chính phủ dê. Do là bơta pơn iờ să ngan bơh gơnoar atbồ mờ làng bol tiah do dê tài lơh ngan bơt bơtàu lơh sa mpồl bơtiàn, tơn jơh jơgloh tơrmù rƀah, neh lơh geh cồng nha. Bulah bè hơ̆, bơta do lơh uă hìu bơnhă ờ gơtùi càn priă chính sách nàng pơn jat tai bơtàu tơnguh lơh sa, tàm tŭ uă kal ke pa neh gơlik geh.

Nam 2017, bi Rmah Blich ơm tàm ƀòn Doch Tung, xã Ia Grái, kơnhoàl Ia Grai, càr Gia Lai là hìu bơnhă geh càn priă bơh broă lơh hìu bơnhă lơh sa kă bro tiah kal ke nàng bơtàu tơnguh ròng phan. Bơh bơnah priă càn 30 tơlak đong, bi Blich neh tă lơh wàng ròng mờ ròng kơnrồ, bơtàu tơnguh lơh sa mờ neh tơm jơh dùl bơnah priă dồs. Mơya, pa do, mpồl kơnrồ hìu bơnhă dê gơtìp chơt tài bơh kòp as sồt kơltau gơlik pơ nời. Bi Blich kờñ geh priă nàng ròng wơl, mơya xã neh gơs tiah 1, ờ gam là tiah kal ke bè lài tai, den tàng bi ngòt là he ờ geh càn priă wơl: “Lài do, añ càn priă bơcri lơh sa, kă bro, tŭ do neh gơs tiah 1 den ală hìu bơnhă neh càn priă bè bol hi tàm do neh tơm dồs den làng bol ờ hềt git nền là gơtùi càn wơl halà ờ, tài ờ gơ gơm tàm mpồl cau geh càn priă den tàng kung kơp kờñ kấp hơđang dong kờl làng bol in”.

Ndrờm bè do sơl, mò Puih Phyim, cau ơm tàm ƀòn bal kung geh càn 40 tơlak đong bơh broă lơh do nàng tam kơphe. mò Puih Phyim yal, xã neh lik bơh tiah kal kemơya làng bol kung gam gơtìp kal ke tài bơh kòp Covid-19. Dilah ờ geh càn priă bè lài den làng bol kal ke ngan nàng bơtàu tơnguh lơh sa: “Priă càn geh dong kờl priă cồng den tŭ do xã Ia Grái neh gơ wèt tiah 1, ờ geh ai càn bè lài tai, làng bol tàm ƀòn gam gơtìp kal ke. 2 nam do gơtìp gơ rềng tài bơh kòp Covid-19 ờ gơtùi lơh sa, điều, kơphe gơmù khà priă den tàng kung lơh gơbàn kal ke sơl. Kơp kờñ lơh bè lơi dà lơgar kơlôi sơnơng, lơh gơlik bơta niam dong làng bol in”.

Ồng Nguyễn Đức Tấn, Chủ tịch Ủy ban Nhân dân xã Ia Grái pà git, xã geh rlau 10 rbô nă làng bol, khà làng bol jơi bơtiàn kòn cau dùl êt nă cau geh mờr 45%, khà hìu bơnhă rƀah, hìu bơnhă ndrờm bè cau rƀah bơh xã dê gơmù hời rơhời jat tơl nam, tus tŭ do, mìng gam mờr 500 hìu bơnhă. Ồng Tấn kung kơlôi rơcang tŭ xã guh gơs tiah 1. Kòp Covid-19 gam lơh gơbàn ală kal ke dờng. Dilah ờ geh càn priă chính sách bè lài do, khà gơbàn rƀah wơl tàm xã geh gơguh jơnhua: “Tŭ do, nàng geh priă bơcri lơh sa, bơtàu tơnguh lơh sa, tam chi lơyah ngai, chi sa plai den uă ngan pal càn priă bơh ngân hàng chính sách. Dilah ngan ngồn tŭ do ờ geh broă lơi nàng dong kờl ala ai bơnah priă càn tàm ngân hàng chính sách den đơs ngan là kal ke ngan ai làng bol jơi bơtiàn kòn cau dùl êt nă cau tàm tiah do in. Xã neh dan geh dùl broă lơh dong kờl ndai nàng dong kờl ală hìu bơnhă in nàng geh dờp broă dong kờl ai càn priă mờ ală bơnah priă càn dong kờl ndai bơh Chính phủ, dà lơgar dê nàng lơh gơlik bơta niam ai làng bol in bơtàu tơnguh lơh sa”.

Bi Rmah Blich moat jrùm tài mpồl kơnrồ hìu bơnhă dê neh chơt tài kòp bơtờp, mìng gam wàng gời, tàm tŭ tơngai hơ tơm dồs neh tus rềp

Tơnơ̆ tŭ Kơrnuat sồ 861 ngai 04/6/2021 bơh Thủ tướng Chính phủ dê geh ai ngui ngan ngồn, 13 tàm 13 xã, thị trấn tàm kơnhoàl Ia Grai ndrờm là xã tiah 1. Hơ̆ là kơnhoàl geh tus 10 xã gam là tiah 2 gơ gơs tiah 1 tŭ lơh jat kơrnuat. 1 rbô 800 hìu bơnhă gam càm priă bơh Broă lơh hìu bơnhă lơh sa, kă bro, tơnơ̆ tŭ tơm ngân hàng 60 tơmàn đong, geh ờ jòi geh bơnah priă càn ala. Ồng Đỗ Văn Đông, Phó Chủ tịch Ủy ban Nhân dân kơnhoàl Ia Grai pà git: “Bơta kal ke tŭ do den làng bol ờ geh càn priă tai, den Ủy ban Nhân dân kơnhoàl sồr Ngân hàng chính sách pơn jat tai kờp sền, geh ală broă ngui ală cơ chế dipal nàng lơh gơlik bơta niam ai làng bol in geh dong kờl càn priă tàm tơngai kal ke bè tŭ do. Pơn jat tai mblàng yal làng bol pal git là, broă lơh do là dipal nàng làng bol in geh jơnau git wă di, geh bơta brồ guh. Bơta dong kờl bơh dà lơgar dê kung là dùl tŭ tơngai lơm, ai gùng dà tơnơ̆ do là rài kis phan bơna nùs nhơm bơh làng bol dê geh tơnguh niam, den tàng ală broă lơh pal koh tơrmù nàng rơcang lài tàm broă lơh sa, tàm broă kă bro he dê”.

Lik bơh mat là tiah kal ke mờ uă kal ke là bơta pơn iờ să ngan gơ wèt tus mờ kơnhoàl Ia Grai, càr Gia Lai. Mơya mìng is gơ wèt mờ mờr 2 rbô hìu bơnhă gam ngui priă càn chính sách xã hội lời ai hìu bơnhă kă bro tiah kal ke in, den làng bol geh roh bơta kơnờm càn priă chính sách. Tàm tŭ hơ̆, ală kal ke pa tài bơh kòp bơtờp tàm phan ròng, kòp Covid-19 neh gơlik geh mờ làng bol gam kờñ ngan ală broă lơh tă bơsong.

Cau mblàng K’Duẩn