VOV4.K’ho- Broă lơh sră Căn cước làng bol neh mờ gam geh Bộ Kuang àng, Kuang àng ală càr, ƀòn dờng tàm làm gùt lơgar jal mhar lơh, nàng kờñ tus lài mờ ngai 01/07/2021, lơh sir jơh broă lơh sră căn cước làng bol ai jơh tơl nă làng bol geh tơl bơta in. Broă do gơ sồr bơta dong kờl bơh ală kấp, ală gah dê mờ kuơmàng là bơta gĭt wă bơh tơl nă làng bol dê. Nàng broă lơh lơh sră căn cước làng bol lơh jăt di tơngai den làng bol pal lơh jăt kơnòl bơh he dê, lơh jăt niam ală jơnau sồr bơh Adat Căn cước làng bol dê. 

Ală ngai do, tàm làm gùt lơgar, ală kuang bàng, cau ling Kảnh sát Ătbồ sră pơ àr dà lơgar bè rơndăp tăp sèng mpồl bơtiàn sơlơ tơnguh tai tŭ jiơ lơh broă sùm, ờ gŏ ngòt ngai mang lòt tus tàm tiah sar lơgar ngài, mŭt tàm ală hìu bơnhă nàng lơh căn cước làng bol crăp chíp nàng kờñ lơh jăt geh cồng nha “broă lơh” tus nhai 7/2021 geh lơh 50 tơlak sră căn cước làng bol ai làng bol in. Ală kuang bàng, cau ling kảnh sát neh sơrlèt gan jơh ală bơta kal ke nàng lơh bè lơi tơl nă làng bol ndrờm geh lơh ală sră nggal dà lơgar pa tŭ do, gơmù sră pơ àr, tŭ tơngai lòt rê...

Bộ Kuang àng neh geh broă rơndăp lơh ai tai kuang bàng, cau ling kuang àng bal mờ măy mok, phan bơna drơng broă lơh lơh sră căn cước làng bol ai ală tiah in. Mờ Bộ Kuang àng kung sồr Kuang àng ală tiah tơrgùm jơh ală mpồl cau, ai tai kuang bàng drơng broă lơh lơh sră căn cước làng bol nàng kờñ lơh broă ết ngan rlau jơh kung là bơh 15 jiơ pah ngai bơh 7 jiơ drim tus 10 jiơ mang; mơkung jàu khà lơh sră căn cước làng bol ai Kuang àng ală tiah in jăt pah ngai; sùm sùm jờng rơ ală tiah geh broă lơh bơceh pa, lơh sir gơs mờ sơrlèt khà jàu lơh sră căn cước làng bol. Bulah gam kal ke, bơnah broă uă ir pal lơh tàm tŭ tơngai lơyah, kuang bàng, cau ling kảnh sát ătbồ sră pơ àr dà lơgar bè rơndăp tăp sèng mpồl bơtiàn mờ Kuang àng ală tiah kung gam lơh ngan, pơđơl pràn ngai mang sùm, lòt tus tơl xã, sơnah ƀòn, tus tàm tơl ƀòn, thôn tiah kơh bơnơm, geh ală ù tiah ơm ngài ngan, rềp tiah nhàr lơgar, bồt bơlào mờ tiah bơnơm nàng lơh sră căn cước làng bol.

Kờp tus ngai 06/5, jơh gùt lơgar neh dờp mờr 40 tơlak sră nggal lơh sră căn cước làng bol; neh lơh mờ jàu ai ƀòn lơgar in 7 tơlak 400 rbô sră căn cước làng bol. Gơwèt mờ broă lơh lơh dipal sră nggal làng bol ơm kis pal “di, tơl, dipal, kis”, tus tŭ do, Cục Kảnh sát ătbồ sră pơ àr bè rơndăp tăp sèng mpồl bơtiàn neh dùl ròt bal tơmŭt tàm anih lơh broă mờr 99 tơlak nă làng bol tàm gùt lơgar tàm anih ơn prăp sră pơ àr dà lơgar bè làng bol ơm kis; neh lơh dipal sră nggal geh pơgăp 42 tơlak sră nggal. Geh uă tiah lơh niam ngan, bè: Nam Định, Hải Dương, Thái Bình, Ninh Bình, Thừa Thiên– Huế, Hà Nam… Bàr pe tiah neh lam lơh di tŭ mờ geh cồng nha jơnau bơto pơlam bơh Bộ dê bè lơh jăt dờp sră nggal lơh sră căn cước làng bol gơwèt mờ làng bol ơm kis ing, là: Quảng Ninh, Bình Dương mờ ƀòn dờng Hồ Chí Minh.

Thượng tá- ồng Trần Thanh Phong, Phó Kuang ătbồ Phòng Kảnh sát ătbồ sră pơ àr dà lơgar bè rơndăp tăp sèng mpồl bơtiàn- Kuang àng càr Đồng Tháp dê neh geh ală jơnau yal, nàng broă lơh sră căn cước làng bol jăt di tơngai mờ di broă rơndăp tăp sèng den làng bol tŭ tus lơh sră nggal lơh sră căn cước làng bol pal lơh jăt jơnau sồr bơh Adat Căn cước làng bol dê mờ kơrnoat boh lam geh gơrềng. Thượng tá- ồng Trần Thanh Phong, pà gĭt: Tàm broă lơh sră căn cước làng bol tŭ do den bol he pal lơh jăt broă rơndăp tăp sèng lơh sră căn cước làng bol geh Bộ Kuang àng dê ai, yal uă tàm ală anih yal tơngĭt jơnau mpồl bơtiàn mờ ù tiah ƀòn lơgar làng bol ơm kis nàng làng bol in gĭt. Tàm bơta tŭ do, tŭ làng bol lòt lơh sră căn cước làng bol den làng bol pal kah ală bơta tơnơ̆ do: Dùl là làng bol pal dùl nùs bal iăt kơno mờ yal tơngĭt jơnau yal bơh gơnoar ătbồ tiah hơ̆ dê tŭ gơnoar ătbồ tiah hơ̆ yal tơngĭt jơnau, ai tơlik sră pơyua jà nàng làng bol tus di anih, di jiơ, di tŭ nàng lơh sră căn cước làng bol, nàng ờ lơh roh tŭ jiơ mờ ƀươn soh tàm ală tŭ he lơh. Dơ̆ bàr là, làng bol ờ geh jơnau cih yal ngai deh, nhai deh tàm sră nggal sră cih mat cau tàm hìu bơnhă mờ tiah ơm kis sùm kung bè sră kim ta làng bol den làng bol kung pal lòt lùp mờ gơnoar ătbồ tàm tiah hơ̆, mờ mùl màl là tus mờ cau lơh broă đah sền gàr adat boh lam tàm xã, sơnah ƀòn, thị trấn, là tiah làng bol ơm kis nàng geh kuang bàng bơto pơlam lơh mờ bơtơl lơh sră yal ngai deh mờ bơtơl jơnau cih yal ngai deh, nhai deh nàng drơng jăt jơnau sồr căn cước làng bol nàng gơ in lơh geh cồng nha mhar ngan.

Bè hơ̆, tŭ làng bol lơh sră căn cước làng bol kờñ pal kah, là:

Lơh jăt jơnau sồr bơh Adat Căn cước làng bol mờ kơrnoat boh lam geh gơrềng dê;

Lơh sră nggal lơh, tam gơl, lơh wơl sră căn cước làng bol jăt jơnau sồr bơh Adat Căn cước làng bol dê;

Yal tơngĭt wil tơl, dipal, di tơngai sồr yal tơngĭt jơnau, sră nggal bơh să tờm dê nàng cih tàm sră nggal dà lơgar bè làng bol ơm kis mờ sră nggal căn cước làng bol jăt jơnau sồr bơh Adat Căn cước làng bol mờ kơrnoat boh lam geh gơrềng dê;

Tă ai sền sră căn cước làng bol tŭ cau geh gơnăp gơnoar sồr sền swì jăt jơnau sồr bơh kơrnoat boh lam dê;

Ơn prăp, sền gàr sră căn cước làng bol neh geh lơh; tŭ roh pal di tŭ lòt yal mờ anih lơh broă ătbồ căn cước làng bol in;

Jàu wơl sră căn cước làng bol ai anih lơh broă geh gơnăp gơnoar in tàm tŭ dilah tam gơl, gơtìp ai wơl, prăp gàr ing sră jăt jơnau sồr geh cih tàm Bơta 23 mờ Bơta 28 bơh Adat Căn cước làng bol dê.

Cau cih Việt Phú- Cau mblàng Lơ Mu K’Yến