VOV4.K’ho - He rơcang mŭt tàm ngai gùt làng bol lòt đùh sră tĕ khà nàng rơwah ală cau jăk chài ala măt jơnau đơs bơh cau tĕ khà tàm pơrjum Quốc hội, pơrjum HĐND ală cấp. Dùl broă mờ làng bol sùm sền gròi, hơ̆ là tơnơ̆ mờ tŭ neh geh pồ, kuang bàng geh lơh jăt jơnau hơ mờ cau tĕ khà bè lơi, broă sền gròi jơnau hơ bơh kuang bàng bè lơi.

Săp nggồr lơngañ ngan bơh broă đơs karaoke, bơh loa thùng tăc kẹo kéo pờ dờng ir lơh gơlĭk geh, neh geh Chủ tịch Ủy ban Mặt trận Dà lơgar ƀòn dờng Hồ Chí Minh tơrgùm jơnau yal bơh cau tĕ khà mờ yal tàm pơrjum dơ̆ 20 bơh HĐND khoă 09 neh lơh geh dùl dơ̆ lùp mờ hơ jơnau lùp duh hồl ngan.

Ồng Nguyễn Thành Phong, Chủ tịch Ủy ban Nhân dân ƀòn dờng Hồ Chí Minh mờ là kuang bàng HĐND khoă 09 kung geh dờp tin nhắn tơn bơh cau tĕ khà yal bè jơnau ờ sŭk do. Ồng Phong pà gĭt, tŭ dờp geh tin nhắn bơh làng bol, ồng neh pơyoa wơl ai kuang bàng đơng lam ală tiah in geh jơnau yal nàng sền gròi mờ bơsong. Ƀòn dờng Hồ Chí Minh kung mhar nàng geh dùl broă lơh mùl màl, nàng kơrian broă đơs karaoke, loa kẹo kéo... pờ dờng ir lơh aniai tus mờ làng bol. Jăt ồng Nguyễn Thành Phong yal, ồng sùm lơh ngan bơsong tơl broă tàm gơnoar geh, bañ lời dơ̆ tơnơ̆ cau tĕ khà pal yal tai: “Bè ờs tŭ tìp mờ cau tĕ khà den bơh tàm jơnau đơs bơh làng bol tĕ khà, den tơnơ̆ mờ hơ̆ văn phòng ủy ban tơrgùm wơl mờ pơyoa ală jơnau đơs bơh cau tĕ khà hơ̆ tus mờ tơl sở, jơnau lơi gơwèt gơnoar quận den quận bơsong; jơnau lơi gơwèt gơnoar mờ jơnau pơlam bơh sở den geh jơnau hơ mờ bơsong nàng dơ̆ tơnơ̆ tìp mờ cau tĕ khà ờ gơtìp tai bơta do, jơnau làng bol neh yal tai bơh lài mờ hơ̆”.

Hơ̆ là dùl tàm ală jơnau hơ bơh kuang bàng mờ cau tĕ khà geh lơh jăt. Mơya kung gam geh ờ uă jơnau hơ jŏ ngan. Gĭt nđờ 10 nam do, hiù nhă mò Phạm Thị The gam kis tàm bă ù geh rơndăp broă lơh neh gơtìp lời ing Bình Quới-Thanh Đa. Hìu nhă mò ờ gơtùi lơh niam wơl hìu, tăc hìu ha là ờ gơtùi tam pà ai ală oh mi ndai in tài ờ gơtùi lơh jăt sră nggal adăt boh lam. Jăt mò The yal, broă do geh ai tơlĭk tàm uă dơ̆ tìp mờ cau tĕ khà bơh kuang bàng geh làng bol pồ, mơya tus tŭ do làng bol mìng geh dờp jơnau hơ. Mò The mờ gĭt nđờ rơbô hìu làng bol kis tàm do mìng kơ̆p kờ gơnoar atbồ bơsong mhar broă ai rơndăp broă ù tiah nàng ring niam rài kis.

Mờ cau tĕ khà, bơta mờ cau tĕ khà ờ sŭk ngan hơ̆ là tài bè lơi uă kuang bàng ai tơlĭk jơnau hơ mờ cau tĕ khà, mơya tus dŭt ndơl tơngai lơh broă den ờ lơh jăt bè broă lam sồr tĕ khà sơnrờp ngan, tàm jơnau hơ bè tŭ tơlĭk măt tĕ khà.

Bè broă sền gròi jơnau hơ bơh kuang bàng, jăt cau chài cah rơña Trương Thị Hoà, Kuang bàng geh jơng tàm đah Mặt trận Dà lơgar Việt Nam ƀòn dờng Hồ Chí Minh yal, den mìng bơh jơnau yal tàm dơ̆ tìp mờ cau tĕ khà. Jơnau yal dong kờl cau tĕ khà gĭt geh jơnau hơ bơh kuang bàng neh lơh tus tàm bơta lơi, kal ke tàm bơta lơi tài ờ di jơnau hơ lơi kung gơtùi geh bơsong gơs niam, ờ di jơnau lơi kung gơtùi lơh jăt dùl drim dùl mho. Mơya, broă do tàm ală dơ̆ tìp mờ cau tĕ khà ờ hềt geh lơh jăk: "Sền gròi broă do añ đơs là di lah he ai tàm jơnau yal bè lơi tàm dơ̆ tìp mờ cau tĕ khà. Den he yal là pơn drờm mờ broă lam sồr tĕ khà den kuang bàng neh lơh geh broă lơi? Den añ gŏ là tơngu me tàm ală dơ̆ tìp mờ cau tĕ khà ờ tơl tơngai gơmờn den tàng ờ hềt geh jơnau do. Bơdìh mờ tìp cau tĕ khà kung pal geh gùng dà broă lơh nàng kuang bàng lơh geh broă lơi yal làng bol in gĭt. He ờ hềt ai geh bơta niam".

Ồng Trần Việt Anh, Kuang geh jơng tàm Ủy ban Mặt trận Dà lơgar Việt Nam pà gĭt: Đah măt trận Dà lơgar Việt Nam ală cấp pơgồp bal mờ ală anih lơh broă kuang bàng làng bol pồ bơh Quốc hội mờ càr, ƀòn dờng sùm sền wơl ală broă lơh bơh ală kuang bàng dê. Mơya, ồng Trần Việt Anh ai tơlĭk jơnau lơh mùl màl jơh mờ kơrnoăt bal mờ jơnau kơlôi sơnơng lơh jăt adăt jơh jơnau hơ. Geh bè hơ̆, hơ̆ sồng geh dong kờl cau tĕ khà in gĭt jơnau hơ bơh kuang bàng neh lơh jăt bè lơi mờ sơlơ̆u wơl kuang bàng kung gơtùi ai cau tĕ khà in gĭt, jơnau hơ bơh să tờm gam gơtìp kal ke tàm ală bơta lơi: “Adăt bơ̆t bơtàu tàm tơngu me broă lơh bơh kuang bàng Quốc hội mờ kuang bàng HĐND. Hơ̆ sơnđan là adăt lơh broă bơh kuang bàng làng bol dê. Do là bơta añ kơlơi là geh kuơ, mơya lài jơh là pal geh kơrnoăt nàng lơh jăt mờ ală kơrnoăt do pal lơh ndrờm bè dùl broă lơh mờ bi pal lơh”.

Ai broă lơh jăt kơrnoăt gơwèt mờ broă sền gròi jơnau hơ bơh kuang bàng, Tiến sĩ Vũ Trung Kiên, Phó kuang atbồ khoa bơ̆t bơtàu Đảng, Hìu bơsram Học viện Chính trị tiah 2 đơs là, broă sền gròi bơh cau tĕ khà dê là kuơ màng ngan. Di lah cau tĕ khà mùl màl sền gròi den geh lùp kuang bàng; sồr pal yal wơl tơngu me jơnau lùp tàm dơ̆ tìp tơnơ̆: “He bañ kơ̆p kờñ ală cau tĕ khà ndrờm gơtìp geh nùs nhơm ờ di pal mờ chính trị, mơya he kơ̆p kờñ geh ờ uă cau bè ală kuang bàng neh jơh sơnam lơh broă, ală kuang bàng sĩ quan, ală cau ngăc ngar jăk chài, ală cau ling yau... lơh ngan nàng jăt ală kuang bàng mờ lùp ală kuang bàng”.

Gơtùi đơs, kuang bàng làng bol pồ là pơnyờ să ngan bơh khăt dùl nă cau lơi dê, tài ală cau do là cau mờ gĭt nđờ tơlăk tơlăk nă cau tĕ khà ai nùs nhơm pin dờn, lơh cau ala măt bồ tơngoh ngăc ngar, jơnau kơ̆p kờñ bơh làng bol dê; ala măt làng bol lơh jăt gơnoar bơh Dà lơgar. Kơrnoăt rơwah geh lơh nền nòn ngan, bơta geh kuơ màng ngan là pal tơnguh niam ngan nùs nhơm lơh tờm tàm broă bơyai lơh, tàm làng bol nàng rơwah geh ală kua ng bàng mùl màl di pal; ală kuang bàng mùl màl tài Dà lơgar, tài làng bol dê.

Cau mblàng Ndong Brawl