VOV4.K’ho – Thủ tướng Chính phủ, ồng Nguyễn Xuân Phúc pa đơng lam ală Bộ, gah broă lơh, ală tiah sơlơ kơryan, lơh glài ală broă lơh blơ\ blac tàm mpồl bơtìan, kuơmàng là bơta blơ\ blac, blac pơr lồm tàm internet. Cribơyai mờ cau lơh [a\u kềng bơdìh hìu pơrjum Quốc hội dê, ală kuang bàng đơs là: broă lơh rơcang sơndră, tam dră, kơryan cau tìs ngui công nghệ cao ờ mìng là kơ nòl bơh Mpồl kuang àng dê gời, mờ pal geh bơta lơh broă bal jơh nùs bơh ală anih lơh broă geh gơnoar, ngan là cau ngui broă drơng ala ngân hàng tàm internet, cau ngui mạng viễn thông, mạng xã hội.

Ală kuang bàng Quốc hội đơs là, tơngai lài bơta blơ\ blac tàm internet ngai sơlơ gơguh ua\ bal mờ ală kal lac làu ngan, lơh ua\ cau gơ gơs là cau gơtìp pơr lồm, lơh gơbàn hoàc huơr jơh bal bè phan bơna mờ nùs nhơm. Den tàng, jơnau đơng lam bơh Thủ tướng dê di tu\ kơryan bơta blac pơr lồm tàm internet nàng sền gàr gơnoar atbồ, jơtài, phan bơna, pria\ sền mờ sền gàr pràn kơldang nùs nhơm làng bol dê.

Ồng Đỗ Đức Hồng Hà, Mpồl kuang bàng Quốc hội [òn dờng Hà Nội đơs nền: “Bơh ală broă blac pơr lồm gơlik geh ngan ngồn tàm tơngai lài, ngan là neh ai tơnggo\ kai blac pơr lồm. Bơh hơ\ 1 bơnah nàng làng bol in tơnguh nùs nhơm rơcang gàr is, ngui ală broă lơh rơcang sơndră broă lơh blac pơr lồm. Dơ\ 2 là git loh kơ nòl ală anih atbồ dà lơgar dê, ală anih lơh broă geh kơ nòl tàm broă ngui ală broă lơh kơryan broă lơh blơ\ blac tàm internet mờ di tu\ git go\, yal mờ anih lơh broă geh gơnoar mờ yal loh làng cồng nha lơh glài hơ\. Ờ mìng nàng kờ` lơh glài, mờ gam pơhìn lài,  bơ to tơngkah ală cau ờ hềt lơh tìs”.

Tơngai rềp ndo, neh gơlik geh ua\ broă blac pơr lồm bơh điện thoại, tin nhắn yal là geh khà jờng tus ală sồ điện thoại; pơr lồm là anih lơh broă lơh jat adat boh lam hòi điện thoại sồr làng bol tơmut pria\ tàm tài khoản nàng sền sơ wì, tơ nơ\ hơ\ sơ gràm ai tơn; sơ gràm ai gơnoar ngui tài khoản mạng xã hội nàng blac pơr lồm; blac pơr lồm bơh broă lơh cribơyai, tac, blơi phan tàm internet…

Ồng Bùi Thanh Tùng, Mpồl kuang bàng Quốc hội [òn dờng Hải Phòng sồr ală Bộ, gah broă lơh, mpồl lơh broă pal kờp sền ală gah [uơn gơlik geh ală broă lơh blơ\ blac; di tu\ git go\ ală bơta ờ niam nàng lơh gơs bơnàng jă adat boh lam; rơcang lài geh ală broă lơh kơryan tơl jơh mờ ală bơta ală broă lơh blơ\ blac do: “Dơ\ kac màng 4.0 bơtàu tơnguh, kung bè bơta bơtàu tơnguh internet dê tu\ do là broă kờ` ngan pal lơh nàng gàr niam broă lơh atbồ dà lơgar; gàr niam bơta sền gròi broă lơh cèng bơta blơ\ blac, lơh aniai tus gơnoar kuơ bơh cau ndai dê. Broă sền gròi geh dong ală anih lơh broă tư pháp gơtùi lơh glài broă lơh tìs jat jơnau cih adat boh lam dê gơ rềng tus broă lơh blac pơr lồm, gơ gràm ai, lơh aniai tus bơta kuơ dipal làng bol dê”.

Ring bal mờ jơnau đơs do, mò Nguyễn Thị Việt Nga, Mpồl kuang bàng Quốc hội càr Hải Duơng đơs loh kai blac pơr lồm tàm internet gam gơlik geh ua\ ngan tu\ do. Bơdìh  mờ broă blac pơr lồm nàng tac phan den ală cau blơ\ blac gam sơ mờm, ai kơ`au jơnau tơnggit cau dùl nsă să is dê nàng pơyua tin nhắn, email, hòi điện thoại jà blơi phan, yal tơnggit… Geh jơnau lùp là `chi bơh tài gơtùi ai jơnau tơnggit cau dùl nă sư dê [uơn bè hơ\.

Mò Nguyễn Thị Việt Nga sồr Bộ Thông tin mờ Truyền thông pal pơgồp bal mờ Bộ Kuang àng geh broă lơh atbồ mờ lơh glài krà` cau lơh tìs blơ\ blac tàm internet: “Bol he neh geh adat sền gàr lơngap lơngai tàm internet mờ adat do neh geh ngui tàm rài kis. Mơya, kơp kờ` geh 1 bơta tam gơl loh làng rlau mờ niam rlau. Ờ mìng gơ rềng tus mpồl tờm atbồ là Bộ Thông tin mờ Truyền thông mờ gam gơ rềng tus Bộ Kuang àng tai, bơta lơh broă bal mờ pơgồp bal đah 2 Bộ do là kuơmàng ngan, nàng bol he gơtùi kơryan broă lơh blơ\ blac. Ngan là tàm rài công nghệ 4.0 den geh lơh gơlik ală broă lơh blac pơr lồm pa, gơlik geh ua\ bơta ờ niam gơ rềng tus công nghệ, ală anih lơh broă geh gơnoar kung pal geh bơta lơh broă bal jơh nùs mờ di tu\ nàng lơh bè lơi kơryan niam ngan rlau jơh, nàng sền gàr rài kis làng bol in”.

Ờ mìng sơ mờm làng bol, mờ gơnoar atbồ kấp hơ đơm tàm ua\ tiah kung gơtìp ală bol blac pơr lồm sơ mờm sơl. Ồng Bùi Văn Xuyền, Mpồl kuang bàng Quốc hội càr Thái Bình đơs là: Tàm Adat sền gàr lơngap lơngai mờ Adat Dân sự kung neh geh jơnau cih gơ rềng tus jơnau yal ndơp ndơr bơh cau dùl nă să is dê. Mơya ală anih lơh broă geh gơnoar ờ hềt gơtùi lơh glài jơh tềng đap bơta gơguh ua\ pràn ngan bơh mạng xã hội dê. Ồng Bùi Văn Xuyền sồr: “Jat a` den do kung là dùl tàm ală broă mờ pal geh bơsong, tam gơl, ngan là Bộ Thông tin Truyền thông pơgồp bal mờ Bộ Kuang àng mờ să tờm làng bol tu\ sền go\ lài geh broă hơ\ den khi kung pal geh broă lơh kơryan sơl”.

Cau mblàng K’Duẩn