VOV4.K’ho– Pơrjum Quốc hội khóa 14 neh tơn jơh geh cồng nha mờ broă lơh gơs broă lơh kuang bàng dờng màng, tàm hơ̆ geh Chính phủ tơngai lơh broă pa. Tơnơ̆ bơnah yal bơr guh at gơnoar broă, Thủ tướng Chính phủ pa, ồng Phạm Minh Chính kung bè ală kuang bàng pa bơh Chính phủ dê, ală kuang bàng Quốc hội neh ai tơnggŏ bơta pin dờn mờ kơp kờñ dùl Chính phủ lơh nùs lơh broă nàng bơt bơtàu, lơh broă, sàng goh, song dơpă.

Ală kuang bàng cih dờp mờ đơs niam Thủ tướng Chính phủ pa, ồng Phạm Minh Chính là cau kràñ cê, jơh nùs, geh bồ tơngoh tam gơl pa, bơceh pa, nùs nhơm geh kơnòl, pràn jak lơh broă geh ai tơnggŏ loh làng bơh ală gơnoar broă mờ ồng neh at mờ bơta ngan ngồn đềt mềr mờ kấp hơđơm. Ồng Bùi Sĩ Lợi, Mpồl kuang bàng Quốc hội càr Thanh Hóa đơs: Gơ wèt mờ Thủ tướng Chính phủ, do là rùp să bơh dùl nă kuang đơng lam bồ kràñ cê ngan, sền gròi tus kấp hơđơm tŭ ồng gam lơh Bí thư Tỉnh ủy Quảng Ninh, tơnơ̆ hơ̆ là Kuang atbồ Mpồl bơyai broă dà lơgar mờ là cau git loh ngan ală kơrnuat lơh broă bơh Đảng dê. Mờ nùs nhơm hơ̆, bơta tă pơgồp hơ̆, đềt mềr mờ bơta geh ngan, añ jơh nùs kơp kơnờm Thủ tướng là cau kràñ cê, jơh nùs, tơrgùm tàm ală broă kuơmàng bơh dà lơgar dê, bơsong ală broă ờ suk mờ làng bol gam kơp gơn”.

Geh tŭ tơngai jŏ jòng lơh broă bal mờ Thủ tướng ồng Phạm Minh Chính tŭ ồng là Bí thư Tỉnh ủy Quảng Ninh, mò Đỗ Thị Lan, mpồl kuang bàng càr Quảng Ninh đơs là: “Thủ tướng Chính phủ, ồng Phạm Minh Chính sùm ai tơnggŏ loh làng là cau geh bồ tơngoh bơceh pa, geh broă wèt sền bơh ngài mờ là cau lơh broă sùm geh kơnòl, lơh jat gùng dà bơh dà lơgar dê mờ tài gơnoar kuơ bơh làng bol dê, tài bơta bơtàu tơnguh bơh dà lơgar dê. Tàm tơngai lơh broă tàm Quảng Ninh, bol hi kung sền gŏ loh làng ală cồng nha mờ Thủ tướng neh lời wơl, pơn yơu bè broă hòi jà ală bơta tă pơgồp tàm broă bơcri priă bơt bơtàu phan bơna, tàm broă crơng gơs broă rơndap ù tiah, ai broă rơndap ù tiah lam lơh ngan ngồn bè broă rơndap ù tiah bơtàu tơnguh ală khu công nghiệp, tiah lơh sa, tơrbŏ bal đah tiah lơh sa mờ dà lơgar, hòi jà bơta tă pơgồp lơh gùng lòt ù gờl... hơ̆ sồng tàm broă tam gơl sră nggal hành chính”.

Ai ồng Nghiêm Vũ Khải, mpồl kuang bàng ƀòn dờng Hải Phòng đơs: Kal ke kung bè bơta lòng tŭ do tàm broă lơh đơng lam bồ đơs bal mờ đơng pơlam Chính phủ đơs is hơ̆ là tŭ tơngai sùm tam gơl. Hơ̆ là bơta mờ Thủ tướng Chính phủ pa mờ mpồl kuang bàng Chính phủ tàm tơngai lơh broă pa pal sền gròi: “Tàm tŭ tơngai dà lơgar geh uă tŭ niam, bơta ƀuơn mơya kung ờ di là dùl êt bơta lòng mờ geh ală bơta lòng tàm dơlam is he dê bè lơh niam sră nggal hành chính geh uă cồng nha mơya kung gam uă bơta ờ niam halà broă đơs lài jơnau tơnggit bè broă gơlik geh tàm dunia mờ bơsong jơnau tơnggit, do là broă lơh ngac ngar tềng đap tam gơl lơh sa, bè broă bơcri priă. Bol he pal ngui công nghệ cao, tam gơl pa, bơceh pa ờ mìng tàm broă lơh khoa học công nghệ mờ tàm broă lơh atbồ, đơs lài drà kă bro lơh gơlik phan bơna, kă bro dunia ndrờm tam gơl pa bơceh pa, rơcang lài mut gơ rờm bal mờ rơcang lài ai broă lơh lơh sa lơh geh cồng nha kơ̆ kơljap”.

Tàm dơ̆ pơrjum do, Quốc hội ring bal broă tơn pồ 2 Phó Thủ tướng Chính phủ mờ 12 nă Bộ trưởng, kuang atbồ gah broă lơh. Ală kuang bàng đơs, ală kuang bàng geh pồ lơh Phó Thủ tướng, Bộ trưởng, kuang atbồ gah broă lơh dơ̆ do là ală cau tàm tơngai lài neh geh mờng chài ngan ngồn tàm kấp hơđơm, geh mờng chài tàm broă atbồ gah broă lơh mờ  geh nùs nhơm lơh ngan lam lơh ală kơnòl broă he dê. Kuơmàng geh pràn jak, bồ tơngoh bơsram sră, nùs nhơm, lơh krơh lài mờ geh kuang bàng Quốc hội, ală kuang geh jơng tàm Chính phủ mờ làng bol pin dờn. Do là ală bơta ƀuơn ai ală kuang đơng lam bồ gah broă lơh lam lơh kơnòl broă he dê tàm tơngai tus.

Ồng Phạm Văn Hòa, mpồl kuang bàng càr Đồng Tháp đơs là: “Jat añ lài ngan ală kuang đơng lam bồ gah broă lơh pal lam lơh ală kơnòl broă bơh kuang đơng lam lài do dê lời wơl tus tŭ do ờ hềt gơtùi lơh bơh anih lơh broă, mpồl lơh broă dà lơgar dê, bơh ală bơta kơp kờñ bơh làng bol dê nàng đơng lam, pơlam lơh jat gơ in gơtùi kơnòl broă mờr tus. Nàng ală kuang đơng lam bồ gah broă lơh hơ̆ lam lơh kơnòl broă he dê nàng lơh jat bơta kơp kờñ bơh ală kuang bàng Quốc hội dê neh pin dờn pồ he. Ală bơta hơ̆ den bơta kal ke bơh làng bol dê tàm hơ̆, ală kuang đơng lam bồ gah broă lơh kung pơgồp bal, ai tơlik lam lơh kơnòl broă he dê nàng bơsong ală kal ke”.

Mìng is gơ wèt mờ gah Giáo dục mờ Đào tạo, mò Nguyễn Thị Việt Nga, mpồl kuang bàng càr Hải Dương kơp kờñ, Bộ trưởng pa geh mhar ai tơlik ală broă lơh ngan ngồn nàng gah do in geh ală bơta tam gơl tơl làm, kuơmàng bè cồng nha bơ to bơtê mờ bơsram jat bè nùs nhơm Nghị quyết pơrjum dờng dơ̆ 13 bơh Đảng dê: “Bol hi kơp kờñ ngan tàm tơngai lơh broă tus, Bộ Giáo dục mờ Đào tạo geh ală broă lơh dipal rlau. Bol he kơlôi sơnơng nàng bơtàu tơnguh halà tam gơl bơto bơtê mờ bơsram, do ờ di là broă lơh gơtùi lơh mơ, mờ pal kơlôi sơnơng nền nòn. Bol he bañ gơ jă gơ jal ir geh ală bơta tam gơl mờ khat dùl bơta tam gơl lơi bè broă lơh den ndrờm pal geh kờp dŭ lài. Bol he pal kờp sền nền nòn, geh gùng dà ngan ngồn, geh tŭ tơngai rơcang lài mùl màl, ờ di gơ jă gơ jal ờ”.

Bè jơnau yal bơr tềng đap Quốc hội, ồng Phạm Minh Chính hơ pơrgon bal mờ ală kuang bàng Chính phủ dê geh tă pơgồp jơh bơta pràn he dê, sơrlèt gan tơl kal ke, bơta lòng; tàm pơ dờn, tơnguh bơhiàn ờs mờng mờ mờng chài kuơmàng; lơh ngan bal mờ ală kuang bàng thường trực Chính phủ, kuang geh jơng tàm Chính phủ tam klac bal, sàng goh, song dơpă, lơh broă kràñ cê, jơh nùs, geh cồng nha, lơh ngan drơng broă dà lơgar, drơng broă làng bol in. Bol he pin dờn, kơp kơ nờm ală ngai niam bơnĕ rlau ai dà lơgar in.

 Cau mblàng K’Duẩn