VOV4.K’ho- Sở Lao động, Thương binh mờ Xã hội pơgồp bal mờ Tỉnh đoàn Lâm Đồng bơyai lơh dơ̆ dờp ai Kes priă Sền gàr dong kờl kơnòm dềt càr in mờ broă lơh jàu priă dong kờl bơsram ai kơnòm bơsram tàm ù tiah ƀòn dờng Dà Làc in.

Tàm dơ̆ bơyai lơh, Công ty Cổ phần nhơl chờ Sài Gòn- Đại Ninh neh jàu pà 2 tơmàn đong ai Kes priă Sền gàr dong kờl kơnòm dềt càr Lâm Đồng in. Tơnơ̆ tŭ dờp tơn, Mpồl bơyai lơh neh jàu 500 bơnah priă dong kờl bơsram, tơl bơnah kờp priă là 1 tơlak đong ai ală kơnòm bơsram geh rài kis kal ke gam ơm kis mờ bơsram sră tàm ală hìu bơsram mờ ală anih sền gàr dong kờl mpồl bơtiàn tàm ù tiah ƀòn dờng Dà Làc. Do là broă lơh geh kuơ ngan tơngŏ bơta sền gròi dong kờl bơh ală mpồl lơh broă mpồl bơtiàn mờ mpồl lơh sa kă bro dê kơlôi tus ală kơnòm bơsram geh rài kis kal ke.

            Cau mblàng Lơ Mu K’Yến