VOV4.K’ho- Sơlơ tơnguh ală rơndap broă lơh, rơndap broă lơh tơrmù rƀah, bơtàu tơnguh lơh sa- mpồl bơtiàn tàm tiah làng bol jơi bơtiàn kòn cau tàm càr Lâm Đồng uă nam do geh bơta tă pơgồp bal kuơ màng bơh ală cau geh bơngă pin dờn, cau kra ƀòn, kuang atbồ ƀòn tàm broă mblàng yal, hòi jà. Gùt càr tŭ do geh 479 nă cau geh bơngă pin dờn gam ơm kis, lơh broă sa tàm ală thôn, ƀòn tiah làng bol jơi bơtiàn kòn cau. Uă ngan ală cau geh bơngă pin dờn tàm Lâm Đồng ndrờm geh pơlam tàp, bơto bơtê jơnau gĭt wă adat boh lam, bơta chài mblàng yal nàng ngui tàm bơta geh ngan tàm rài kis pah ngai tàm tiah làng bol ơm kis.

Cau geh bơngă pin dờn lơh krơh niam lam lài tàm broă bơtàu tơnguh lơh sa- mpồl bơtiàn

Pah nam, Ủy ban Mặt trận dà lơgar càr dê bơyai lơh dơ̆ jờng rơ, pà khà jờng, dong kờl, pà phan gơwèt mờ cau geh bơngă pin dờn pơn rơ jak, geh uă tă pơgồp ngan. Lâm Đồng neh lời pơgap 3 tơmàn 700 tơlak đong pah nam nàng dong kờl, lơh jat broă lơh chính sách gơwèt mờ cau geh bơngă pin dờn tàm càr dê.

Cau mblàng K’Hạnh