VOV4.K’ho -  Lồi poh lài, tàm [òn dờng Dà Làc, Mpồl lơh broa\ bơh Bộ Y tế bơh Bộ trưởng mò Nguyễn Thị Kim Tiến lam bồ, geh bùi lơh broa\ mờ UBND càr Lâm Đồng. Ua\ bơta kal ke, kòl yan tàm broa\ lơh kham sơm kòp, sền gàr pràn kơldang sa\ ja` làng bol neh geh đơs tus.

             Jat Sở Y tế Lâm Đồng, nam 2018, ala\ hìu sơnơm tàm càr neh bơyai lơh kham sơm kòp ai tus rlau 2 tơlak 400 rbô na\ cau gơbàn kòp, kham rcang lài  ai mờr 400 rbô na\ cau in,  bơta pràn ngui jơ nờng  cau piam kòp geh rlau 106%. Tàm hơ\, rlau 21 rbô 600 na\ cau kòp geh kham sơm kòp ờ sa pria\, rlau 3 rbô 260 na\ cau rbah mờ cau gơbàn kòp jrua\, geh dong kờl kham sơm kòp.

            Bulah bè hơ\,  broa\ kham sơm kòp, sền gàr pràn kơldang sa\ ja` làng bol tàm Lâm Đồng gam gơbàn ua\ ngan ờ niam. Jat ồng Huỳnh Ngọc Thành, kuang atbồ Hìu sơnơm dờng II Lâm Đồng, tài bơh ờ tơl cau lơh broa\ den tàng broa\ kham sơm kòp bơh hìu sơnơm  gơbàn ua\ ngan kal ke, sùm gơmut tàm  bơta gal ir cau kòp:

             Bơta krơi is bơh càr Lâm Đồng mờ kuơ màng ngan la  tàm Bảo Lộc den slơ gơbàn ờ tơl cau lơh broa\ ua\ ngan, ngan la cau bác sĩ. La hìu sơnơm càr mơya mìng geh 72 na\ cau bác sĩ geh tơl sra\ nggal nàng lơh broa\, geh lơh làm ala\ khoa den la ờ tơl cau lơh broa\. Dùl ngai kham di bơh 1 rbô tus 1.300 na\ cau kòp sơm kòp hờ hìu mờ rlau 500 na\ cau kòp gam piam kòp tàm hìu sơnơm den bác sĩ lơh broa\ la gam ờ tơl. Hìu sơnơm kung neh tus ala\ hìu bơsram đại học nàng rwah cau lơh broa\ mơya bơh ờ geh chính sách den tàng ala\ oh ờ bài rê lơh broa\ mờ dilah rê den tơnơ\ do mut lơh ngan  18 nhai bloh  hơ\ sồng geh ai chứng chỉ lơh broa\ hơ\ sồng kung sang lòt hờ Sài Gòn lơh broa\. Den tàng,  lơh kal ke ngan tàm broa\ lơh cau lơh broa\.

            Bal mờ ờ tơl cau lơh broa\, broa\ mut lơh  adat kham sơm kòp,  adat bảo hiểm  y tế mờ ala\ bơta sra\ nggal geh pơlam mut ngui ala\ pơlam bơh Bộ,  gah sơnah lơh broa\ geh đơs la geh ua\ bơta gam ờ di pal, kung lơh kal ke tus broa\ lơh kham sơm kòp. Bè jat Thông tư sồ 13 nam 2012 bơh Bộ Y tế bè broa\ lơh gây mê hồi sức,  bơh Lâm Đồng gam 13 tàm 18 mpồl lơh sơnơm ờ hềt geh bác sĩ gây mê den tàng gơlam hoàc hươr ngan tus mờ cau kòp tu\ pal guh hờ hìu sơnơm dờng rlau, kal ke ngan  tus ala\ hìu sơnơm tu\ Bảo hiểm xã hội ờ bài tơm pria\ bơta kỹ thuật reh tài ờ geh bác sĩ gây mê.

             Bal mờ hơ\,  bơta ờ tơl sơnơm tàm ala\ hìu sơnơm kung sùm gơbàn ua\.  Mò Bùi Thị Nga Giang, Phó kuang atbồ Bảo hiểm xã hội càr Lâm Đồng đơs la,  gơbàn geh bơta do la gơbàn bơh ờ ua\ bơta geh cih tàm Thông tư sồ 11 nam 2016 bơh Bộ Y tế bè ta\ khà blơi sơnơm:

             Ua\ trạm y tế  đơs la ờ geh sơnơm, bơta ờ tơl sơnơm bơh ta\ khà ờ tơl gơlik geh bơh ua\ bơta gơbàn mơya tờm ngan la bưh cơ chế ta\ khà sơnơm he dê gam ua\ bơta gơbàn ờ niam. Mut lơh jat thong tư sồ 11 den geh broa\ lơh nền nòn rlau mơya bơh bơta ờ tơl sơnưm gơlik geh. Den tàng,  jơnau đơs geh cih bè ta\ khà sơnơm geh ala\ bơta gam ờ niam kờ` pal  geh lơh niam di pal wơl.

            Bơh bùi lơh broa\, ala mat mpồl lơh broa\ bơh Bộ Y tế neh dơ\ rhời bơsong ala\ bơta gam gơ kòl mờ cih dờp ala\ jơnau đơs bơh gah lơh sơnơm  càr Lâm Đồng. Mìng is ala\ broa\ lơh ờ tơl sơnơm gơlik geh, Bộ trưởng Bộ Y tế mò Nguyễn Thị Kim Tiến đơs,  gah lơh sơnơm mờ ala\ mpồl geh gơ rềng bal càr Lâm Đồng kờ` pal lơh ngan lơh niam, ờ lời broa\ do gơbàn tàm tơngai tus:

             Ta\ khà sơnơm tàm broa\ lơh lơh jat drà ka\ bro phan bơna bơh bơta atbồ dà lơgar dê, bol he ba` lơh at bồ jat sra\ nggal. Mờ gam tu\ Sở y tế kal ke den bol he pal lùp ala\ anih lơh broa\ jơnhua rlau nàng bơsong, pleh bơta lơh ờ tơl sơnơm.  Drà ka\ bro geh lài sơnơm bè hơ\ den lơh bè lơi bol he lơh jat  mờ cơ hế,  hìu sơnơm tư ờ  lơh bè hơ\.  Bơh tài lời sơnơm ai làng bol tàm ala\ bơta lơh sơnơm bơh trạm y tế xã ờ geh, bơta do, Sở y tế mờ ala\ gah lơh broa\ geh gơnoar bal mờ Bảo hiểm xã hội pal kong kơnòl.

          Cau mblàng K’ Brọp