VOV4.K’ho- Sền gàr kơ̆ kơljap tiah nhàr lơgar ờ mìng là kơnòl broă bơh mpồl ling sền gàr tiah nhàr lơgar dê lơm gời mờ gam là kơnòl broă bơh gùt làng bol dê. Bơta hơ̆ neh geh Pôs đồng ling sền gàr tiah nhàr lơgar Dak Tiên, gơnoar atbồ, làng bol xã Thuận Hà, kơnhoàl Dak Song, càr Dak Nông lơh jat ngan, dùl nùs bal gàr kơ̆ kơl jap tiah nhàr lơgar bơh Dà lơgar dê.

Ờs mờng pah nhai dùl dơ̆, ồng Trần Bá Tuyết bal mờ ală cau tàm mpồl atbồ is gùng tiah nhàr lơgar, jrong tiah nhàr lơgar thôn 8, xã Thuận Hà den bal mờ Kuang bàng, cau ling Pôs đồng ling sền gàr tiah nhàr lơgar Dak Tiên wàs rŭ rơm, lòt sền, sền gàr gùng tiah nhàr lơgar tàm ù tiah do dê. Ồng Trần Bá Tuyết gĭt là: “Broă dùl nùs bal sền gàr bơta lơngap lơngai tiah nhàr lơgar là pơgồp bơnah sền gàr gơnoar tờm bơh dà lơgar dê, cồng nha lơh broă sa bơh he dê. Den tàng, làng bol sùm rcang lài tus bal mờ mpồl ling sền gàr tiah nhàr lơgar lòt sền, sền gròi, koh rŭ rơm, wàs gùng tiah nhàr lơgar. Să tờm kung sùm lòt hòi jà, mblàng yal nàng làng bol in gĭt loh rlau tai gơnoar broă, bơta kuơ màng mờ kơnòl broă bơh broă sền gàr gơnoar tờm tiah nhàr lơgar mờ rcang lài tam dră mờ ală cau lơh tìs”.

Jat Đại úy Lương Văn Phú, Chính trị viên phó Pôs đồng ling sền gàr tiah nhàr lơgar Dak Tiên yal, broă lơh pơgồp bal lòt sền, sền gròi, koh rŭ rơm, wàs goh gùng lòt tiah nhàr lơgar geh mpồl ling mờ ală mpồl atbồ is lơh jat niam ngan, geh cồng nha ngan. Ală cau tus bal ngan, jơh nùs ngan, sền do là kơnòl broă bơh he dê. Ờ mìng bè hơ̆ lơm, pah dơ̆ lơh broă tàm mìr, dilah sền gŏ bơta tềl tơngŏ, ală cau pa, làng bol mhar ngan yal mờ gơnoar atbồ, mpồl ling sền gàr tiah nhàr lơgar in gĭt.

                                         Làng bol tus bal mờ mpồl ling lòt sền tiah nhàr lơgar

Gơl gùng tiah nhàr lơgar Việt Nam mờ Campuchia bơh Pôs đồng ling sền gàr tiah nhàr lơgar Dak Tiên atbồ jòng pơgap 10 kơi sồ. Sền gĭt sền gàr kơ̆ kơl jap tiah nhàr lơgar ờ mìng là kơnòl broă bơh mpồl ling sền gàr tiah nhàr lơgar dê lơm mờ gam là kơnòl broă bơh gùt làng bol, mpồl ling neh sền gròi ngan, sền gròi lơh niam broă lơh cribơyai bal, bal mờ kấp ủy, gơnoar atbồ tiah do dê lơh pràn srơh làng bol tus bal atbồ is gùng tiah nhàr lơgar, jrong nhàr lơgar, sền gàr bơta lơngap lơngai thôn, ƀòn.

Jat Trung tá Nguyễn Huy Hiếu, Kuang atbồ Pôs đồng ling sền gàr tiah nhàr lơgar Dak Tiên đơs, mờ jơnau đơs rềp mềr, gĭt loh bơhiàn, rài kis bơh làng bol dê, bơh kấp ủy, gah đơng lam tus tơl nă kuang bàng, cau ling, ngan là Mpồl hòi jà làng bol, tàm tŭ lơh jat kơnòl broă sùm pơgồp bal mờ kấp ủy, gơnoar atbồ, ală mpồl cau tàm tiah do dê lơh pràn broă lơh mblàng yal ai làng bol in bè ală jơnau sồr geh gơrềng tus tiah nhàr lơgar bơh dà lơgar dê.

                                              Làng bol tus bal sền gàr jrong nhàr lơgar

Tàm ală nam pa do, lơh jat Chỉ thị sồ 01 bơh Thủ tướng Chính phủ dê bè broă bơyai lơh srơh “Gùt làng bol tus bal sền gàr gơnoar tờm kơnhoàl ù tiah, bơta lơngap lơngai tiah nhàr lơgar bơh dà lơgar dê tàm tơngai pa” mờ Nghị quyết sồ 33 bơh Bộ Chính trị dê bè “Broă lơh jŏ jòng sền gàr dà lơgar tàm tơngai pa”, mpồl neh lơh niam broă mblàng yal, hòi jà làng bol lơh jat gùng dà broă lơh bơh Đảng, adat boh lam bơh Dà lơgar dê. Mờ ală mpồl atbồ is gùng tiah nhàr lơgar, jrong nhàr lơgar geh crơng gơs, mờ cau tàm mpồl là làng bol, geh kơnòl broă bal mờ mpồl ling sền gàr tiah nhàr lơgar bơh dà lơgar dê.  

Pôs đồng kung neh ai 1 nă Kuang bàng tus bal tàm Đảng ủy xã mờ mờ ai ală đảng viên rê pơrjum bal mờ ală Chi bộ thôn, ƀòn, drơng broă hìu bơnhă. Ală mpồl lơh broă tàm ù tiah do dê bal mờ cau geh bơngă pin dờn bè kra ƀòn, Kuang atbồ thôn, ƀòn nàng mblàng yal, hòi jà, dong làng bol gĭt tơl bơta tềl tơngŏ gùng tiah nhàr lơgar, jrong tiah nhàr lơgar, nàng gĭt gơnoar atbồ, yal di tŭ ală cau lơh tìs mờ gơnoar tờm kơnhoàl, ù tiah...

Nam 2020, lơh jat kơnòl broă dơ̆ lĕ bal, sền gròi, sền gàr tiah nhàr lơgar mơkung rcang sơn dră kòp Covid-19, Pôs đồng ling sền gàr tiah nhàr lơgar Dak Tiên crơng gơs 3 anih sùm lơh broă mờ sùm pơgồp bal mờ ală mpồl ling, mpồl atbồ is lòt sền, sền gròi, kơryan gùng dềt, gùng pờ, sền gàr kràñ, ờ lời gơlik geh cau mut tàm tiah nhàr lơgar tìs mờ kơrnoat boh lam.

Pôs đồng ling sền gàr tiah nhàr lơgar Dak Tiên gam dong làng bol lơh broă sa, tơn hào phan tam, lùp còp, pà phan, kham sơm kòp, tă pơgồp dong kờl tàm ală kes priă tàm tiah do dê. Mpồl ling neh jàu pà kơnrồ me ai hìu bơnhă rƀah in tàm xã Thuận Hà mờ dờp ròng 1 nă oh kơnòm bơsram geh rài kis kal ke, dong kờl 2 nă oh kơnòm bơsram rƀah bơsram jak...Ală broă lơh ngan ngồn pah ngai bơh Kuang bàng, cau ling tàm Pôs đồng ling sền gàr tiah nhàr lơgar Dak Tiên dê neh lơh ngan tai bơta pin dờn bơh làng bol dê tàm Đảng, Dà lơgar, ling klàng, pơgồp bơnah bơt bơtàu bơta rcang sơn dră lài tàm nùs nhơm làng bol dê ngai sơlơ kơ̆ kơljap, sền gàr gơnoar tờm, bơta lơngap lơngai tiah nhàr lơgar bơh dà lơgar dê.

Ồng Trần Lê Cường Bí thư Đảng ủy xã Thuận Hà, kơnhoàl Dak Song, càr Dak Nông đơs nền: “Lòt bal mờ làng bol bơt bơtàu ƀòn lơgar pa, Kuang bàng, cau ling Pôs đồng ling sền gàr tiah nhàr lơgar Dak Tiên neh dong kờl tiah do in uă bơnah broă geh kuơ ngan. Tàm hơ̆, gơtùi đơs tus broă bơt bơtàu ală broă lơh chính trị tàm kơnă hơđơm, bơtàu tơnguh đảng viên pa, dong kờl ngai lơh broă, lơh gùng lòt, rbòng dà, bơtơ̆t rƀòng dà, lam lơh ală broă lơh bơtàu tơnguh lơh sa. Bơh hơ̆, tơl nă làng bol geh kơnòl broă rlau tai tàm broă tus bal sền gàr gơnoar tờm, kơnhoàl, ù tiah, bơta lơngap lơngai tiah nhàr lơgar, ngan ngồn lơh geh nùs nhơm rcang lài sền gàr dà lơgar kơ̆ kơljap tàm làng bol”.

Quốc Học jat băo Dak Nông- Cau mblàng K’ Hạnh