VOV4.K’ho- Ală nam pa do, Đảng ủy, Gah đơng lam Mpồl ling sền gàr tiah nhàr lơgar dà lơgar neh rơcăng lài cribơyai mờ Đảng, Dà lơgar mờ Bộ Quốc phòng ai tơlik uă gùng dà, broă lơh; sồr ală mpồl ling sền gàr tiah nhàr lơgar bơh uă broă lơh bơceh pa, geh cồng nha bal mờ jơnau đơs “kơldìng tàm làng bol, ai làng bol lơh tờm, làng bol là cau tờm” nàng ătbồ, sền gàr gơnoar tờm ù tiah dà lơgar, lơngăp lơngai tiah nhàr lơgar dà lơgar dê. Bơh hơ̆, bơ̆t bơtàu geh mpồl làng bol rơcăng sơndră kòp Covid-19, mờ kơryan broă lik mờ mŭt mờ lơgar ndai tìs mờ kơrnoat boh lam tàm tiah nhàr lơgar.

Lơh jăt jơnau sồr bơh Đảng ủy, Gah đơng lam Mpồl ling sền gàr tiah nhàr lơgar bè lam lơh srơh “Jơh gùt làng bol tus bal rơcăng sơndră kòp Covid-19 mờ kơryan broă lik- mŭt mờ lơgar ndai tìs mờ kơrnoat boh lam” tàm tiah nhàr lơgar, bơh ngai 13 nhai 5 tus tŭ do, ală pôs đồng ling sền gàr tiah nhàr lơgar gơwèt Mpồl ling sền gàr tiah nhàr lơgar bơh 44 càr mờ ƀòn dờng neh pơgồp bal mờ 923 xã, lam lơh dơ̆ lơh uă mblàng yal, lam lơh srơh mờ bơyai lơh ai 5 rbô 229 thôn, ƀòn in kĭ hơ mờ xã, gĭt nđờ jơ̆t rbô hìu bơnhă làng bol kĭ hơ mờ thôn bè rơcăng sơndră kòp Covid-19, bañ lik- mŭt mờ lơgar ndai tìs mờ kơrnoat boh lam, bañ tu yu, bañ tàm mpồn ai broă lơh lik- mŭt mờ lơgar ndai tìs mờ kơrnoat boh lam in. Bơh hơ̆, tơrgùm geh bơta pràn jơh gùt làng bol tus bal rơcăng sơndră mờ kơryan broă lik- mŭt mờ lơgar ndai tìs mờ kơrnoat boh lam tàm tiah nhàr lơgar, kơryan ờ gŏ di lời kòp lơh bơtờp bơh lơgar ndai bơtờp tàm lơgar he.

Pơnrơ bè Broă lơh pờ tơlik jơnau đơs bal mờ tơngume bè rơcăng sơndră kòp Covid-19 bơh Pôs đồng Mpồl ling sền gàr tiah nhàr lơgar Huổi Luông gơwèt Gah đơng lam Mpồl ling sền gàr tiah nhàr lơgar càr Lai Châu dê pơgồp bal mờ gơnoar ătbồ tàm tiah do geh pờ tàm tŭ 6 jiơ mho pah ngai, mblàng yal tus làng bol Hà Nhì, Dao mờ Mông in tàm ù tiah do. Tài bơh geh gùng tiah nhàr lơgar ƀươn mờ mìng kờñ cơnđoà lòt bàr pe jơng lơm là gơtùi lòt tus tơn hờ đah ne tiah nhàr lơgar, den tàng xã Huổi Luông sùm gơlik geh jơnau dô gan nhàr lơgar tìs mờ kơrnoat boh lam. 

Bơh ală jơnau yal bơh làng bol dê yal, mpồl ling sền gàr tiah nhàr lơgar càr Lai Châu neh gŏ mờ jun lòt ai ơm yah ngài tàm mpồng nhàr lơgar Ma Lù Thàng 48 dơ̆, 101 nă cau mŭt tàm lơgar tìs mờ kơrnoat boh lam. Sồr wơl rê wơl hờ ƀòn lơgar 49 dơ̆, 85 nă cau geh jơnau kờñ lik dô bơh lơgar tìs mờ kơrnoat boh lam tus lơgar Lo; kơryan 3 dơ̆, 3 nă cau Lo geh jơnau kờñ mŭt tàm ù tiah do. Bơh ală broă lơh pờ tơlik jơnau đơs ƀươn wă mờ ƀươn kah, làng bol ờ mìng tơnguh uă nùs nhơm rơcăng ngăc kơrhia lài tềng đăp ală jơnau jòi kai pơrlồm pơn jồ mờ ală broă lơh mŭt tàm lơgar tìs mờ kơrnoat boh lam tàm ù tiah ƀòn lơgar dê; bơta ndai, să tờm làng bol neh gơ gơs là anih kơldìng ai mpồl ling sền gàr tiah nhàr lơgar in, lơh gơs khèl căng kơryan kis tàm kơnòl broă rơcăng sơndră kòp Covid-19 tàm tiah do.

Tàm tiah nhàr lơgar đah jum măt tơngai mŭt dà lơgar dê, làng bol ală jơi bơtiàn tàm do kung gam ngai mang sùm tàm sơmbăt tê bal tă pơgồp bal pràn bal mờ mpồl ling sền gàr tiah nhàr lơgar mờ gơnoar ătbồ tiah do, kơryan broă lik- mŭt mờ lơgar ndai tìs mờ kơrnoat boh lam, rơcăng sơndră kòp, sền gàr bơta lơngăp lơngai ờdo ờdă bơh Dà lơgar dê. Lơh jăt jơnau hòi jà jơh gùt làng bol tus bal rơcăng sơndră kòp Covid-19 mờ kơryan broă lik- mŭt mờ lơgar ndai tìs mờ kơrnoat boh lam, mìng tàm tŭ tơngai ờ hềt tus 2 poh lơm, jơh ală làng bol ală xã, sơnah ƀòn rềp tiah nhàr lơgar ndrờm tus bal kĭ sră hơ dong kờl mpồl ling sền gàr tiah nhàr lơgar, mơkung yal mờ gơnoar ătbồ tiah do in gĭt tŭ gŏ cau pròc mhàm mờ ală cau krơi muh măt gan nhàr lơgar mŭt tàm lơgar Việt Nam. Ồng Lê Quốc Anh- Chủ tịch Ủy ban Nhân dân ƀòn dờng Hà Tiên, càr Kiên Giang, pà gĭt: Srơh do neh pơgồp bơnah tơnguh uă bơta gĭt wă bơh làng bol Hà Tiên dê tàm gơl gùng tiah nhàr lơgar. Ƀòn dờng Hà Tiên geh pơn jăt tai rề ơnàng lơh uă srơh do nàng jơh gùt gơl gùng tiah nhàr lơgar jòng rlau 13 kơi sồ, làng bol ndrờm gĭt wă wil tơl. Bal mờ hơ̆, tàm gơl gùng tiah nhàr lơgar tàm dà lềng, ală mpồl ling sền gàr tiah nhàr lơgar mờ làng bol kung geh là măt gŏ tồr kơno sơl bơh mpồl cau rơcăng sơndră kòp dê.

Lơh Pôs đồng tàm ù tiah xã Phú Lợi mờ xã Phú Mỹ, kơnhoàl Giang Thành, càr Kiên Giang là pôs đồng mpồl ling sền gàr tiah nhàr lơgar Phú Mỹ. Do là ƀòn lơgar geh rlau 40% làng bol jơi bơtiàn Khmer ơm kis. Gơwèt mờ làng bol jơi bơtiàn Khmer jăt Yàng Phờk, den hìu Yàng Phờk là tiah làng bol ơn pơyua bơta pin dờn gah Yàng phờk, lơh jăt bơta tàm adat boh lam sră goh yàng Phờk dê nàng lơh niam wơl is să tờm bơh jơnau bơto bơtê bơh ală cau duh broă yàng phờk dê. Bơh ală cau duh broă yàng phờk mờ uă broă lơh mblàng yal mùl gŏ is bơh ală cau ling sền gàr tiah nhàr lơgar dê, làng bol ală jơi bơtiàn tàm do ờ mìng tơnguh uă bơta gĭt wă mờ gam jơh nùs ngan dong kờl ală cau ling tàm dơ̆ tam lơh nàng kơryan kòp bơtờp. Uă hìu bơnhă làng bol kis tàm tiah nhàr lơgar kung geh nùs nhơm is tă pơgồp bơta pràn bơh he dê tàm broă lơh sền gàr tiah nhàr lơgar. Ồng Lý Văn Nhợi ơm tàm xã Phú Mỹ, kơnhoàl Giang Thành, càr Kiên Giang là dùl nă cau ai lơh pơnyơu. Bồ nam lài, bơh tŭ lơh kràñ broă lòt rê gan tiah nhàr lơgar, ùr bơklau ồng Nhợi neh bal mờ oh mi cau ling tàm pôs đồng ling sền gàr tiah nhàr lơgar Phú Mỹ lơh anih gak mờ dong kờl anih ơm rlô ai kuang bàng, cau ling in. Ồng Lý Văn Nhợi yal: Mpồl ling sền gàr tiah nhàr lơgar mờ kuang àng xã tàm do gơwèt mờ añ gơlơh bè oh kòn, kòn sau tàm hìu bơnhă sơl. Tàm do, he ơm bal, sa bal, kong bòl glar kal ke bal, chờ hờp muăt jrùm geh bal. He pal drơng sền kòp bơtờp Covid-19 lơm. Trồ mang ală sau lòt sền, nàng rơcăng ngăc ngòt geh jơnau kă bro kơñau phan mờ lơgar ndai, lik- mŭt mờ lơgar ndai tìs mờ kơrnoat boh lam. Broă ơm bal sa bal gơlơh ndrờm bal bè dùl hìu bơnhă sơl. Ală mpồl ling sền gàr tiah nhàr lơgar, kuang àng, ling klàng làng bol, tus 1, 2 jiơ mang den hơ̆ sồng rê tus.

Ngui niam gơnoar broă bơh mpồl bơtiàn ală jơi bơtiàn kòn cau dùl êt nă cau dê tàm tiah nhàr lơgar bal mờ bơta tus bal jơh nùs bơh mpồl ling sền gàr tiah nhàr lơgar dê, hơ̆ ngan là mpồl căng kơryan kră kơldang bè lòs sơl pơgồp bơnah sền gàr gơtùi jơnau kờñ kơryan jơh kòp bơtờp kung bè kơryan jơh ală broă lơh lik- mŭt mờ lơgar ndai tìs mờ kơrnoat boh lam, sền gàr gơnoar tờm ù tiah dà lơgar, lơngăp lơngai tiah nhàr lơgar bơh dà lơgar dê.

Cau cih Hải Huyền- Cau mblàng Lơ Mu K’Yến