VOV4.K’ho- Tềng đăp bơta gơbàn kal ke bơh kòp Covid-19 dê, Gah đơng lam Mpồl ling sền gàr tiah nhàr lơgar ală càr mờ ƀòn dờng tàm gùt lơgar bal mờ ală mpồl cau geh gơrềng bal neh mờ gam lơh jăt kràñ ngan broă ătbồ lik mŭt mờ lơgar ndai, kơryan kòp bơtờp lơh bơtờp tus tàm lơgar, lơh bơtờp gan gùng lòt tàm tiah nhàr lơgar. Tàm hơ̆, lam lơh jăt niam broă drơng gak tàm ală mpồng nhàr lơgar, ală anih drơng gròi sền, gùng dềt, gùng kòn, gùng pờ jăt kềng gah tiah nhàr lơgar.

Tŭ do, Gah đơng lam Mpồl ling sền gàr tiah nhàr lơgar gam gàr sùm rlau 1 rbô 600 mpồl drơng kơryan bal mờ rlau 7 rbô 500 nă kuang bàng, cau ling pơgồp bal mờ 3 rbô nă cau bơh ală mpồl cau geh gơnoar ndai dê; Mơkung bơyai lơh uă dơ̆ mblàng yal uă bè rơcăng sơndră kòp Covid-19 tàm jơh gùl gơl gùng tiah nhàr lơgar bal mờ rlau 6 rbô dơ̆ ai mờr 1 tơlak nă làng bol in; pà pơgăp 1 tơlak pang sră pang, pang sră rơklŭp bal mờ 2 rbô 700 pang sră dềt lùp hơ bè kòp Covid-19, kung bè rơcăng kơryan lài ală broă lơh lik mŭt mờ lơgar ndai tìs mờ kơrnoat boh lam. Bơta ndai, ală gah yal tơngĭt jơnau mpồl bơtiàn kung mblàng yal mờr 6 rbô jơnau tơngĭt, jơnau cih, đơs bè broă kòp bơtờp, broă chài rơcăng pleh ai gal ngan làng bol ală jơi bơtiàn kòn cau in bal mờ làng bol in.

Jăt ồng Lê Đức Thái- Thiếu tướng, Kuang ătbồ Mpồl ling sền gàr tiah nhàr lơgar dà lơgar dê đơs, bơh bồ nam tus tŭ do, Mpồl ling sền gàr tiah nhàr lơgar neh gŏ mờ lơh glài mờr 14 rbô nă cau mŭt tàm lơgar tìs mờ kơrnoat boh lam, pơgồp bơnah ờ dùl êt tàm broă kơryan, gơmù ƀà bơta pơhìn lơh bơtờp kòp Covid-19 jăt gơl gùng tiah nhàr lơgar bơh lơgar he dê. Ồng Lê Đức Thái, đơs: Tus tŭ do neh dùl nam mờ nggùl rao, kuang bàng, cau ling mpồl ling sền gàr tiah nhàr lơgar bal mờ ală mpồl cau, ală tiah tàm gơl gùng tiah nhàr lơgar lam lơh jăt kơnòl broă ătbồ, sền gàr tiah nhàr lơgar mờ rơcăng sơndră, kơryan broă lik mŭt mờ lơgar ndai tìs mờ kơrnoat boh lam, rơcăng sơndră kòp bơtờp. Gơtùi đơs là oh mi neh jơh nùs jơh tồr lơh ngan, jơh nùs jơh tồr kràñ cê ngan, ai jơh bơta pràn he dê nàng lơh jăt ală kơnòl broă do tàm bơta kal ke ngan, bòl glar ngan, geh bal là broă sàu sa ơm kis, geh bal là bè trồ tiah, bè broă lơh sền gàr rài kis phan bơna mờ nùs nhơm.

 Tàm broă lơh ngan kơryan kòp Covid-19 lơh bơtờp gan tiah nhàr lơgar, tàm tơngai tus, Mpồl ling sền gàr tiah nhàr lơgar pơn jăt tai sơlơ lơh uă tai broă lòt sền, gròi sền tàm ală mpồng tiah nhàr lơgar, gùng dềt, gùng kòn, gùng pờ, rbòng dà, croh dà tàm tiah nhàr lơgar, tiah dà lềng, tơrgùm ală gah, ƀòn lơgar kuơmàng, kal ke. Mơkung pơgồp bal mờ ală mpồl cau gĭt nền bơta gơlik geh; yal lài di tŭ, cribơyai mờ kấp ủy, gơnoar ătbồ tàm tiah hơ̆ nàng geh gùng dà đơng lam sồr lơh sơndră wơl gơ in dipal mờ tơl bơta kòp bơtờp, dipal mờ bơta geh ngan.

Bal mờ hơ̆, sơlơ lơh broă bal tai mờ dunia, lơh broă bal mờ lơgar ndai sền gàr tiah nhàr lơgar; rơcăng lài cribơyai, tàm yàl tơngĭt bal jơnau mờ mpồl cau sền gàr tiah nhàr lơgar bơh ală lơgar rềp nhàr bal dê nàng ring bal gùng dà broă lơh kơryan, bơsong jăt di jơnau cih bơh kơrnoat boh lam dê; sơlơ tơnguh tai broă lơh mblàng yal, hòi jà làng bol tàm tiah nhàr lơgar, tiah dà lềng ờ gŏ di dong kờl, ờ gŏ di tus bal, tàm mpồn, lam jun cau lik mut mờ lơgar ndai tìs mờ kơrnoat boh lam; lùp khàu, lơh glài kràñ ală cau, mpồl cau lam jun cau lik mŭt mờ lơgar ndai tìs mờ kơrnoat boh lam. Ồng Trần Tiến Hiền- Đại tá, Phó Kuang ătbồ Gah đơng lam Mpồl ling sền gàr tiah nhàr lơgar càr Quảng Nam, pà gĭt: Tềng đăp broă tiah nhàr lơgar đah Việt Nam mờ Lào, kuơmàng là đah lơgar Lào gơbàn kal ke ngan, Gah đơng lam Mpồl ling sền gàr tiah nhàr lơgar càr dê neh sồr ală mpồl ling, kuơmàng là ai tai mpồl ling tàm dà lềng lòt tus tiah nhàr lơgar nàng rơcăng sơndră kòp. Lơh sùm kràñ cê jơh nùs ngan ală anih, ală mpồl gròi sền kơryan kòp, ală gùng dềt, gùng kòn, gùng pờ, lòt sền làm bă tiah nàng kơryan jơnau cau bơh lơgar ndai mŭt tàm lơgar tìs mờ kơrnoat boh lam mut tàm Việt Nam. Mblàng yal, hòi jà làng bol tơnguh uă bơta gĭt wă, di tŭ gŏ cau krơi, cau mŭt tàm lơgar tìs mờ kơrnoat boh lam nàng yal mờ mpồl lơh broă geh gơnoar in kŭp mờ jun tơmŭt tàm tiah ơm yah ngài, bơsong jăt di jơnau cih bơh kơrnoat boh lam dê.

 Tàm dơ̆ lòt lơh broă tàm càr An Giang pa do, mò Võ Thị Ánh Xuân- Phó Chủ tịch lơgar đơs nền, ală càr mờ ƀòn dờng tiah đah jum dà lơgar, ngan là càr An Giang geh ù tiah nhàr lơgar rềp mờ ală càr bơh lơgar ndai dê geh bơta kòp gơbàn kal ke ngan, den tàng broă gròi sền tiah nhàr lơgar, rơcăng sơndră kòp bơtờp geh bơta kuơ dờng màng ngan tus broă lơh rơcăng sơndră kòp bơtờp bơh gùt lơgar dê. Mò Võ Thị Ánh Xuân- Phó Chủ tịch lơgar, đơs sùm bè do: Tàm tơngai tus, añ sồr ală oh mi, dùl đah lơh jăt niam gùng dà broă lơh bơh Đảng dê, jơnau sồr bơh kơrnoat boh lam dê, rềp ndo ngan rlau jơh là Jơnau sồr bơh Thủ tướng dê là kơnòl broă dơ̆ lĕ bal tàm rơcăng sơndră kòp. Gơwèt mờ broă rơcăng sơndră kòp den lơh jăt 5K bal mờ vaccine. Tài bơh kòp bơtờp bơh lơgar ndai gam kal ke ngan, bal mờ bơta đơng lam bơh Gah đơng lam Mpồl ling sền gàr tiah nhàr lơgar dà lơgar dê, Gah đơng lam Quân khu 9 dê, pơn jăt tai lơh kràñ gròi sền tiah nhàr lơgar, ờ gŏ di mìng là kơryan ờ ai mŭt tàm lơgar tìs mờ kơrnoat boh lam lơm gời ờ mờ gam sền gàr tiah nhàr lơgar tai tàm bơta gơlik geh tŭ do; tam dră kă bro kơñau, mờ tam dră mờ ală cau lơh tìs ndai tai.

Tŭ do, nàng kờñ sền gàr ƀòn lơgar tàm tiah nhàr lơgar lơngăp lơngai ờdo ờdă, pơgồp bơnah kơryan bơta lơh bơtờp bơh kòp Covid-19 dê, ală mpồl ling gơwèt Mpồl ling sền gàr tiah nhàr lơgar neh cribơyai, pơgồp bal mờ kấp ủy, gơnoar ătbồ ală kấp lam lơh srơh “Jơh gùt làng bol tus bal rơcăng sơndră kòp Covid-19 mờ lik mŭt mờ lơgar ndai tìs mờ kơrnoăt boh lam”. Bơdìh hơ̆ tai, cribơyai mờ kấp ủy, gơnoar ătbồ lơh ală “Thùng sră pơyua yal yă cau lik bơh lơgar mờ mŭt tàm lơgar tìs mờ kơrnoat boh lam” tàm Ủy ban Nhân dân ală xã, sơnah ƀòn nàng lơh jăt niam gơnoar broă, bơta pràn bơh làng bol dê.

Ờ mìng lam lơh jăt srơh, Mpồl ling sền gàr tiah nhàr lơgar ală càr mờ ƀòn dờng gam sồr ală pôs đồng ling sền gàr tiah nhàr lơgar pơgồp bal mờ kuang àng tàm ƀòn lơgar tus tàm tơl hìu làng bol dê nàng mblàng yal, cih hơ ờ kă bro kơñau mờ jun lam cau lik bơh lơgar mờ mŭt tàm lơgar tìs mờ kơrnoat boh lam. Bal mờ nùs nhơm “tam dră mờ kòp bè tam dră mờ bol sò tơm” mờ geh ai tai mpồl cau, rơndeh rơndồ, măy mok, phan ngui lơh broă, Mpồl ling sền gàr tiah nhàr lơgar jơh nùs lơh ngan bal mờ ală mpồl cau, kuơmàng là làng bol ală jơi bơtiàn, lơh gơlik gơs “pơngàr kơryan lòs” rơcăng sơndră kòp Covid-19 tàm ală tiah nhàr lơgar bơh Dà lơgar dê.

Cau cih Văn Hải- Cau mblàng Lơ Mu K’Yến