VOV4.K’ho– Bơh ngan ngồn lơh broă tơngai lơh broă khóa 14 dê ai gŏ: Broă làng bol ală jơi bơtiàn kòn cau jơh nùs tus bal mờ pồ ală kuang bàng Quốc hội ngan ngồn jak chài, neh pơgồp bơnah uă ngan tàm cồng nha bơh Quốc hội dê, ngan là tàm broă bơt bơtàu mờ bơyai lam lơh niam ală broă lơh dong kờl kòn cau. Do là ală broă lơh kuơmàng kờñ tơnguh bơta bơtaù tơnguh mờ bơtaù tơnguh niam rài kis bơh làng bol tiah kơh bơnơm, tiah làng bol kòn cau dùl êt nă cau dê. Jat kờp dŭ, Quốc hội khóa 15 lơh ngan êt ngan rlau jơh geh 18% kuang bàng là cau jơi bơtiàn kòn cau dùl êt nă cau.

Quốc hội khóa 14 geh 86 nă kuang bàng là cau jơi bơtiàn kòn cau dùl êt nă cau, geh 17,3%, pơn drờm mờ khà kờp dŭ ờ tơl 4 nă. Bulah bè hơ̆, ală kuang bàng Quốc hội ala mat ai tiah làng bol kòn cau dùl êt nă cau in neh ai tơnggŏ loh làng bơta lơh ngan, geh kơnòl tus bal jơh nùs ngan tàm ală broă bơt bơtàu adat boh lam, sền gròi mờ lơh nền ală broă kuơmàng bơh dà lơgar dê. Nàng Quốc hội khoá 15 in pơn jat tai tàm pơ dờn mờ tơnguh ală cồng nha neh lơh geh, ngan là tàm broă bơt bơtàu mờ lam lơh jat broă dong kờl jơi bơtiàn kòn cau sồr pal tơnguh rlau tai bơta niam ală kuang bàng Quốc hội, pồ ală kuang bàng ngan ngồn geh pơn rơ gơguh jak tú bal Quốc hội là bơta geh uă cau tĕ khà kơp gơn tŭ tơngai bơyai lơh tĕ khà Quốc hội khóa 15 mờ kuang bàng Hội đồng Nhân dân ală kấp rơcang geh lơh tàm ngai 23/5 tus do. Cau tĕ khà Phạm Giáo, ơm tàm kơnhoàl Đức Phổ, càr Quảng Ngãi kơp kơnờm: “Sơlơ tơnguh kuang bàng ai tiah kal ke, tiah sar lơgar ngài, tiah làng bol jơi bơtiàn kòn cau dùl êt nă cau in den gơtùi ơm rềp rlau, git uă rlau tiah làng bol kòn cau dùl êt nă cau sùm geh uă bơta kal ke, bồ tơngoh bơsram sră làng bol dê ờ huan uă, broă lơh sa gam kal ke. Den tàng, sơlơ gơtùi git uă kal ke, git ală bơta kơp kờñ bơh làng bol dê den geh cèng tus Quốc hội in nàng gơtùi geh ală broă lơh dong kờl gơ wèt tus mờ ală tiah do, dong tơnguh niam rài kis làng bol dê, gơtùi tơrmù ƀà ală kal ke khi in”.

Tơngai lơh broă lài, Quốc hội neh ring bal 2 Nghị quyết kuơmàng, hơ̆ là Nghị quyết sồ 88 ring bal rơndap broă tơrgùm jơh ală bơta bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021 tus nam 2030 mờ Nghị quyết sồ 120 ring bal gùng dà bơcri priă broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol kòn cau jơi bơtiàn dùl êt nă cau mờ tiah kơh bơnơm tơngai bơh nam 2021 tus nam 2030. Bơta pal sền gròi là Nghị quyết sồ 88 ai tơlik lài gùng dà, jơnau kờñ tus nam 2030 là tơrmù khà hìu bơnhă rƀah gam hơđơm 10%. Ờ gam ală xã, thôn uă kal ke; 70% khà xã tiah làng bol jơi bơtiàn kòn cau dùl êt nă cau tơl khà ƀòn lơgar pa. Ồng Nguyễn Lâm Thành, mpồl kuang bàng càr Lạng Sơn đơs: “Quốc hội neh ring bal Nghị quyết là ală bơta cèng kơrnuat pal jat kuơmàng tàm ală broă lơh dong kờl bơh làng bol kòn cau mờ ală jơnau kờñ pal bơsong. Gơtùi sền do là dơ̆ sơn rờp Quốc hội geh Nghị quyết dờng. Do ai tơng gŏ kơnòl broă mờ nùs nhơm gơ wèt tus mờ làng bol kòn cau tiah kơh bơnơm. Do kung là tŭ nàng bol he in pơn jat tai kah ưn ngài mờ ai tơng gŏ kơnòl he dê gơ wèt tus mờ ală tiah gam kal ke nàng dong tiah do in bơtàu tơnguh bal mờ dà lơgar mờ gàr bơta bơtàu tơnguh ring bal đah ală jơi bơtiàn kòn cau”.

Ồng Y Khút Niê (kòn cau Rơđê), Phó Kuang atbồ Mpồl kuang bàng lơh broă sùm Kuang bàng Quốc hội càr Dak Lak khoá 14 tìp mat cau tĕ khà

Tài bơta krơi is bè ù tiah kơh bơnơm, gùng lòt kal ke, kờp bal mờ jơnau git wă làng bol kòn cau dê... dilah broă lơh cribơyai, lam sồr tĕ khà mờ bơyai lơh tĕ khà lam lơh ờ niam den geh gơ rềng tus gơnoar kuơ bơh làng bol kòn cau dê kung bè gơ rềng tus cồng nha bal bơh dơ̆ tĕ khà dê. Nàng gơtùi lơh geh khà êt ngan rlau jơh 18% kuang bàng là cau jơi bơtiàn kòn cau dùl êt nă cau tàm tơngai lơh broă Quốc hội khoá 15, nàng gơtùi rơ wah ală cau ngan ngồn dipal, ala mat làng bol jơi bơtiàn kòn cau dùl êt nă cau in sồr pal geh bơta kơlôi sơnơng nền nòn mờ git loh jơnau tơnggit să tờm bơh ală cau tơlik mat tĕ khà dê. Kuơmàng là broă lơh yal tơnggit, mblàng yal pal geh sền gròi nàng làng bol in gơtùi gŏ bơta kuơ màng, tơngume, broă lơh bơh dơ̆ tĕ khà dê, jơh nùs tus bal mờ hòi jà cau tờm tus bal tĕ khà nàng lơh gơs gơnoar kuơ, kơnòl bơh cau tĕ khà, bơh làng bol dê. Tài, pồ ală cau ala mat bơh làng bol pồ là cau geh ala mat làng bol in tus bal bơt bơtàu broă lơh, ai tơlik broă dong kờl mờ sền gròi broă lam lơh bơta dong kờl.

Kuang bàng Quốc hội Khoá 14, ồng Quàng Văn Hương, mpồl Sơn La đơs nền: “Mlàng yal pal geh broă lam lơh nàng làng bol in gơtùi git bè jơnau tơnggit să tờm, pràn jak, bơta chài mờ kuơmàng là pal jơh nùs, geh kơnòl bơh ală kuang bàng mờ he pồ. Pal mblàng yal ală cồng nha, nùs nhơm bơh cau ngan ngồn jak chài, bơh hơ̆ làng bol gơtùi gŏ cau ala mat he in. Tàm hơ̆, dilah rơ wah cau jơi bơtiàn kòn cau dùl êt nă cau halà kuang bàng kis tàm tiah làng bol kòn cau tus bal Quốc hội den hơ̆ là ală cau đơs jơnau đơs bơh làng bol kòn cau dê, đơs bơta kơp kờñ bơh làng bol kòn cau dê tus Quốc hội”.

 Cau mblàng K’Duẩn